Jauregik Renove Smart Industry programa abian jarriko dela iragarri du, euskal industriaren modernizazio teknologikoa bizkortzeko
Industria, Trantsizio Energetiko eta Jasangarritasuneko sailburu Mikel Jauregik gaur iragarri du datorren ostiralean irekiko dela Renove Smart Industry programaren laguntzak jasotzeko eskaera-epea. Aurten, 9 milioi euroko aurrekontua du programa horrek.
Laguntza horiek makina-erremintaren industriaren modernizazio teknologikoa, automatizazioa eta digitalizazio aurreratua bultzatzeko dira.
Jauregik BIEMH 2026 – Makina Erremintaren Nazioarteko Biurtekoan parte hartzen duten fabrikazio aurreratuko euskal enpresa txiki eta ertainetara egin duen bisitan egin du iragarpen hori.
Renove Smart Industry programaren bidez euskal industriari makineria berria eta ekipamendu aurreratua —bai hardwarea, bai softwarea— erosteko laguntza ematen zaio. Horrek aukera emango dio makina-erremintaren industriari ingurune produktibo adimendun, konektatu eta efizienteagoetara eboluzionatzeko, eta, hala, Fabrikazio Aurreratuaren esparruko 4.0 Industriako proiektuak garatzea erraztuko da.
Renove Smart Industry
Fabrikazio aurreratua gure industriaren trakzio-sektorea da, eta IRABAZI sektore estrategiko gisa definituta dago, Euskadi 2030 Industria Planaren esparruan.
Sektore hori euskal industriaren eta esportazioen motorra da. Fabrikazio aurreratuko euskal industria aurre egiten ari zaie Estatu Batuetako muga-zergen politikaren ziurgabetasunari, Txinaren lehiari, energia-kostuei eta munduko merkataritzaren ezegonkortasunari.
Jauregik nabarmendu duenez, “Euskadik makina-erremintan lider izaten jarrai dezan, inork baino azkarrago egin behar dugu korrika”. Ildo horretan, Eusko Jaurlaritzak Renove Smart Industry programa indartu duela jakinarazi du, “gure industriaren modernizazio teknologikoa bizkortzeko helburuarekin”.
2025ean, Renove programak 49,8 milioi euro mobilizatu zituen inbertsio pribatuan, 8 milioi euroko laguntza publikotik abiatuta, eta 185 proiektutako makineriaren modernizazioa ekarri zuen.
Fabrikazio Aurreraturako funtsezkoak diren teknologiak ditu ardatz programak, hala nola robotika, adimen artifiziala edo biki digitalak. “Enpresa txiki eta ertainetan jartzen dugu arreta, haien lehiakortasunean irabazteko eraldaketa bultzatuz”, azpimarratu du sailburuak.
