Abian da BBDWeek, sormena eta industria hibridatzeko aukerak
Kultura- eta Sormen-industriak garrantzia hartzen ari dira Europan sektore estrategiko bezala, aukera bat direlako ekonomia, gizarte eta ingurumen arloetako erronkei aurre egingo dieten konponbide berriak bilatzeko. Euskadin ere aukera-lurralde gisa identifikatuta daude 2020ko Zientzia, Teknologia eta Berrikuntza Planaren barruko Espezializazio Adimenduneko Estrategian (RIS3).
Joera horri jarraiki, sormen-sektoreen eta beste jarduera-eremu batzuen arteko hibridazio-aukerak dira Bilbao Bizkaia Design Week-en 2020ko edizioaren ardatza. Enpatia, mundu aldakor bat birdiseinatzen izenburupean, Diseinuaren Asteak topagune izan nahi du industria, diseinu, arte, kultura eta teknologia berrien artean, kolaborazioak sustatzeko eta kolaborazio horien bidez proiektu berritzaileak sortzeko.
Azaroaren 19an abiatu ziren jardunaldiak ekitaldi batekin, non hizpide hartu ziren Euskadiko KSIek eta Aclima klusterrak ordezkatutako ingurumen-sektoreak elkarrekin garatu dituzten esperientziak. Sormen aplikatuan aditu eta Sormen-Industrien Sareko zuzendari Juan Pastor Bustamantek eman zuen egitarauko lehen hitzaldia. Bustamenteren arabera, ekonomia sortzailea gai da pertsonak eta lurraldeak aktibatzeko, eta adibide bezala, hizpide hartu zituen administrazio publikoek, enpresek eta kultur sektoreak garatutako hainbat kolaborazio. “Euskadin aspalditik ari gara lanean kultur- eta sormen-industrien arloan; hauxe da unea espazio komun bat sortzeko beste sektore batzuekin batera” nabarmendu zuen.
Topaketan orobat aurkeztu ziren diseinua eta beste jarduera-eremu batzuk hibridatzen dituzten bi kasu praktiko, biak hala biak ekonomia zirkularrarekin erlazionatuak. Edu Uribesalgok Ternua Group arropa-enpresa gipuzkoarraren kasua azaldu zuen, zeinak jasangarritasunarekin lotutako balore sendoak sustatzen baititu. Konpainiak zigilu propio bat garatu du, Commitment izenekoa, bere lau marken (Lorpen, Ternua, Loreak Mendian eta Astore) produkzio-prozesuak gidatzeko. Pieza gehienetako materialen % 80 edo gehiago birziklatuak dira, eta ingurumena eta pertsonak errespetatzen dituzten oihalak erabiltzen dituzte. Arrasaten kokatutako konpainiak hondakin-materialak berreskuratzeko proiektuak ere garatzen ditu. Horietako bi dira RedCycle, erabiltzen ez diren 12 tona arrantza-sare berrerabiltzea helburu duena, eta Seacycle, itsasotik bildutako plastikoak aprobetxatuz kamisetak fabrikatzen dituena.
Bigarren kasu arrakastatsua Biribil proiektua da, Jon Abad eta Brigitte Sauvage diseinatzaileek bultzatua Getxoko Udalaren laguntzarekin. Prozesu parte-hartzaile baten ostean, hondakinez baliatu dira erabilpen publikoko altzariak sortzeko, kasu honetan, erabiltzen ez diren zaborrontzi horiak eta ontziak. “Ahalegintzen gara ekonomia zirkularra bultzatzen diseinuaren ikuspegitik, baina erabiltzaileak prozesu osoan inplikatuz” azaldu zuen Jon Abadek, “aztergai ditugu ko-sorkuntzako eredu berriak, oreka hirukoitza bilatzen dutenak: ekonomia, pertsonen ongizatea eta ingurumenaren zaintza”.
Azkenik, Kimera vs. Kimera aurkeztu zen, Aclima klusterrak, EIDE – Euskadiko diseinatzaileen elkarteak, Karraskan esperientzia sortzaileen sareak eta praktika kolaboratiboen Wikitoki laborategiak elkarrekin bultzatutako ekimena. “Erronkei erantzuteko modu berriak bilatzen ditugu” esan zuen Olga Martinek, Aclima klusterreko zuzendariak, “Kimera vs. Kimera ekimena topagune bat da ekoindustria eta sormen-sektorea batzeko, eta, lankidetzatik abiatuta, pertsonak eta planeta errespetatzen dituzten produktuak eta zerbitzuak garatzeko”.
Wikitokitik Colaborabora sarearen fundatzaile Ricardo Antónek esan zuenez, “kultur- eta sormen-industriak ekarpenak egiteko gaude, irudimena eta lankidetza eskainiz beste modu batera pentsatzeko; uste dugu ildo estrategiko horiek elkartu egin behar direla, nahasketak zer ematen duen ikusteko”. Kimera vs. Kimera ekimenaren barnean, onlineko bi tailer egingo dira abenduan aukera berriak aztertzeko, eta bertan bilduko dira arlo industrialeko zein sormen arloko eragileak.
Bizkaiko Foru Aldundiak eta Bilboko Udalak bultzatzen dute BBDWeek. Seigarren edizio hau azaroaren 19tik 26ra luzatuko da eta elkarrekin konbinatuko ditu onlineko jarduerak eta jarduera presentzialak.
Lotutako albisteak
Eusko Jaurlaritzak 13,65 milioi euro bideratuko ditu enpresen berrikuntzara
SPRI Taldeak maiatzean zabalduko ditu Fast Track Innobideak, Hazinnova eta BDIH Konexio programak
Mikel Jauregi Industriako sailburuak Aernnova enpresa bisitatu du, soluzio aeronautiko aurreratuetan liderra
Aernnova enpresak Araban du egoitza, eta lider espezializatua da aeroegituren eta horien osagaien diseinuan, fabrikazioan, mantentze-lanetan eta zerbitzuetan. Ia 6.000 langile ditu 7 herrialdetan, eta 2025ean 1.000 milioitik gorako fakturazioa izatea espero du.
ETEentzako produktuen eta prozesuen berrikuntza babesten dugu Hazinnovarekin
Hazinnova euskal ETE-ei doako aholkularitza eskaintzen dien programa da, produktu eta prozesuetan berrikuntza-mikroproiektuak bultza ditzaten. Eska ezazu 2025eko maitzaren 6tik urriaren 29ra.
ESGI 188 (European Study Group with Industry) Bilbon izango da 2025eko maiatzaren 26tik 30era
Enpresek problema matematikoak aurkezten dituzte azterketa-taldeak konpon ditzan, askotan modelizazio edo optimizazio moduan.
Kontsulta irekia: Spri Taldearen laneko prebentzio-zerbitzuak definitzeko zure aukera
Sprik merkatuko aurretiazko kontsulta jarri du abian, lan-arriskuen prebentzioaren eta osasunaren zaintzaren sektorearen benetako beharretara egokitutako lizitazioa diseinatzeko. Horren bidez, operadore ekonomikoen ekarpenak bildu nahi dira, kontratazio-prozesu lehiakor, garden eta merkatuko jardunbide egokienekin lerrokatua egituratzeko.
Sustatu berrikuntza-proiektuak zure enpresan Fast Track Innobideak ekimenarekin
Fast Track Innobideak Euskadiko enpresa berritzaileen kopurua handitzeko eta sustatzeko sortu zen. Merkatuan ondasun edo zerbitzu berriak sartu dituzten edo enpresan negozio-prozesuak hobetzen dituzten berrikuntza-jarduerak babesten ditu, enpresa lehiakorrago bihurtzeko.
NudgeXperience Bilbon: CX eta Portaera Zientzien ekitaldia
Zuzendariei eta gerenteei, Cx-eko arduradunei eta berrikuntza eta marketineko profesionalei zuzendua
Innobideak Prestakuntza prestatu zure lantaldea balioan lehiatzeko eta ez prezioan
Euskadiko ETEen % 60k berrikuntzaren alde egiten du, baina gehienek kostua murrizteko edo kalitatea hobetzeko egiten dute eta ez dute benetako abantaila lehiakorra sortzen merkatuan. Alabaina, berrikuntza ez da etorkizunean mantentzeko tresna soila, etorkizunean liderra izateko estrategia baizik. Horretarako, gakoa teknologia ez ezik, pertsonak, estrategia eta egokitzeko gaitasuna ere badira.
Imanol Rego, Innobasque Berrikuntzaren Euskal Agentziako presidente berria
Manuel Salaverriaren lekukoa hartu du. Salaverriak euskal ekosistema publiko pribatuaren balioa sustatzen jakin du, Euskadi garatzeko bide estrategiko gisa
UNIREn bigarren edizioak 80 enpresa baino gehiago bildu ditu FICOBAn
Soldaduran eta beste lotura-teknologietan espezializatutako Estatuko azoka bakarra da