RPK, konplexutasun handiko malgukien fabrikatzailea, medikuntzaren sektorean sartu da
RPK 51 urteko Gasteizko kooperatiba bat da, konplexutasun handiko malgukiak eta piezak fabrikatzen dituena. Datozen urteei begira, haztea eta medikuntzaren sektorean dibertsifikatzea dira erronkak. Plantillan 800 langilek dihardute, eta aurten 91 milioi euro inguru fakturatzea espero du. Konpainiak SPRI Taldearen adimen artifizialeko programaren laguntza bat jaso du. Hain zuzen ere, programaren helburua da Euskadiko enpresen artean AAn oinarritutako proiektuak babestea.
Enpresa Gasteizen sortu zen 1954an, Eibarko 19 ekintzailez osatutako talde baten eskutik. Hasiera-hasieratik, “erdigunean pertsonak jartzen zituen” kooperatiba baten modura sortu zen. “Hasiera zaila izan zen. Hala ere, Laboral Kutxaren laguntzari eta oso garrantzitsuak izan diren pertsonek —Sebastián Echevarría eta Nicolás Larrañaga— gerentzian izandako inpaktuari esker, kooperatiba malgukien fabrikazioko lider gisa sendotu zen estatuan, 80ko hamarkadan”, azaldu du Javier Gordok, RPK Technological Centereko zuzendariak.
Mendearen hasiera inflexio-puntu garrantzitsua izan zen RPKrentzat. “Nazioartekotzeko urteak izan ziren. Gure lehen filiala Mexikon zabaldu genuen 2002an, eta ondoren, Tarragonan, Indian eta Txinan. Hartara, hazten jarraitu ahal izan dugu urterik urte”.
Produktua malgukiak eta piezak dira, estanpazio- eta tolestaketa-teknologiak erabiliz. “Nolanahi ere, gure balio-proposamena askoz harago doa: balio-kate osoan nabarmentzen gara, ingeniaritzan hasi eta amaierako produktua osatzen duten prozesuetan buka. Gure hamar bezero nagusiak leial zaizkigu duela 40 urte baino gehiagotik hona”.
Bezero nagusia automobilgintza da: “Eragile nagusietako bat gara munduan, gure merkatuan, eta Tier 1 eta OEM gehienetan gaude”. Beste sektore batzuetan ere lan egin dute, adibidez, industrian, elektrizitatean eta kontsumo handian, eta horiek bultzatzen jarraitzen dute. “Izan ere, Mexikon hedatzen hasi ginen HPrekin egindako proiektu baten ondorioz, inprimagailuak tarteko”. Gaur egun, enpresak medical devicen aldeko apustu handia egin du, “geure egitura sortu eta inbertsio handi bat egin baitugu, datozen bi urteotan ikusiko dena”.
Plantilla 800 langilek osatzen dute mundu osoan, eta haietatik 250 Gasteizko instalazioan aritzen dira. Iaz, 86 milioi euro fakturatu zituen: mugarri bat izan zen, eta % 39ko hazkundea 2018aren aldean. “Aurten, 2025ean, 91 milioi euro ingururekin itxiko dugu ekitaldia, instalazio guztiak baturik”.
Taldearen barruan, I+G-a eta Gasteizko teknologia-zentroa oso-oso garrantzitsuak dira. “Ezagutza eta berrikuntza garatzeko gure huba da, eta talde osoaren eta instalazio guztien zerbitzura dago. 20 ingeniari baino gehiago gabiltza bertan, benetako ingeniaritza-erronketarako irtenbideak garatzen eta gure teknologiak merkatura eramaten”. Salmenten % 11 inbertsio eta proiektu berrietara bideratzen da.
SPRI Taldearen adimen artifizialeko programaren laguntza hainbat arlotako aginte osoko mahaiak egitera bideratu da. “Mahai horiekin, arloek negozio-adimen handiagoa dute, eta, hala, lan-arloak eraginkorragoak dira, erabakiak denbora errealean hartu daitezke eta konpainia modu dinamikoan kudea daiteke”.
Datozen urteei begira, haztea eta medikuntzaren sektorean dibertsifikatzea dira erronkak, “zehatz-mehatz, medical devicen sektorean. Hurrengo plan estrategikoari begira, ekoizpen-instalazio berriak jarri nahi ditugu RPKn, medikuntzaren sektorean soilik ariko direnak sektore horretako estandarrekin bat etorriz. Bezero izan daitezkeenei erreparatuta, konfiantzazko partnera izateko apustu irmoa da”.
SPRI Taldeak Euskadiko enpresei bere kanaletan jardueraren berri emateko aukera ematen die. Zure proiektua gure gaiekin (I+G+b arloa, digitalizazioa, nazioartekotzea, ekintzailetza, berrikuntza…) lotuta badago, Zutaz mintzo gara ekimenean parte har dezakezu.
