Heuristik: “Pazienteen identifikazioan munduko erreferente bihurtu nahi gara”
Euskal teknologia aurrera doa osasun digitalaren arloan. Honen adibide da Heuristik, Bizkaian egoitza duen adimen artifizialeko enpresa. Heuristik-ek pazienteak zalantzarik gabe identifikatzeko gai den softwarea garatu du, IArekin konbinatutako hatz-marken bidez. Helburua: segurtasuna hobetzea, identifikazio akatsak saihestea eta ospitaleen funtzionamendua optimizatzea.
Antxon Caballerok, konpainiako CEOak, enpresaren jatorria, aurrerapenak eta teknologiak nazioarteko osasunean izan dezakeen eragina azaltzen ditu.
Zein da Heuristik-en jarduera nagusia eta zer ekarpen egiten dio bere teknologiak osasun arloari?
Heuristik software bat da, hatz-markak eta adimen artifiziala konbinatuz pazienteak identifikatu eta kudeatzen dituena. Osasun-erakundeei aukera ematen die pazientea prozesu mediko osoan identifikatzeko eta haren funtzionamendua optimizatzen duten estatistikak denbora errealean lortzeko. Gure helburua pazientearen segurtasuna hobetzea eta ospitaleen eraginkortasuna handitzea da.
Nola sortu zen Heuristik sortzeko ideia eta zer behar antzeman zuten merkatuan?
Enpresa duela sei urte sortu zen, kasu pertsonal baten ondorioz. Erizain batek nire aitona beste gaixo batekin nahastu zuen eta okerreko botika eman zion. Esperientzia horretatik abiatuta, honelako akatsak saihesteko tresna bat garatzeko beharra ikusi nuen.
Osasunaren Mundu Erakundearen arabera, akats medikoen % 10 identifikazio-akatsen ondorio dira. Ez da osasun-langileen errua, egungo sistemena baizik: osasun-txartela eta besokoak ez dira oso fidagarriak, higatu egiten dira edo trukatu egin daitezke. Estatistikek erakusten dute beharrezkoa dela identifikazio eredu berri bat hartzea.
Zer eginkizun du adimen artifizialak zuen lanean eta zer lorpen izan ditu orain arte?
Adimen artifizialeko enpresa gara jatorritik. IA ez da gehigarri bat, gure negozioaren muina da. Gure irtenbidea Portugaleko bigarren ospitale-talde handienean ezarri dugu, eta, Chicagoko Unibertsitatearekin batera, pazienteen % 100 inguru kliniko errealetan identifikatzen direla frogatzen duen nazioarteko lehen ikerketa argitaratu dugu.
Nola laguntzen du teknologiak ospitaleen digitalizazioan eta jasangarritasunean?
Gure soluzioak digitalizatu egiten du pazientearen jarraipen-prozesua, eta erabili eta botatzeko materialen erabilera murrizten du, hala nola plastikoena edo paperarena. Zereginak automatizatzen ditu eta trazabilitatea hobetzen du, kudeaketa iraunkorragoa eta seguruagoa egiten duena.
Zer laguntza edo kolaborazio izan dira funtsezkoak?
Garapen guztia berezkoa da, eta horrek aukera ematen digu azkar aurrera egiteko eta teknologia osasun-sektorearen benetako beharretara egokitzeko. Aurten, gure bigarren Hazitek jaso dugu, eta nazioarteko azeleragailuetan parte hartu dugu, hala nola MIT, MassChallenge, GE Healthcare, Oxfordeko Unibertsitatea eta NVIDIA, eta gure teknologia ingurune global batean kontrastatzen lagundu digute.
Zein dira Heuristiken hurrengo urratsak?
Gure erronka pazienteak identifikatzeko gold standard bihurtzea da. Espainiako, Europako, Amerikako eta Mexikoko ospitaleekin batera, zentro anitzeko analisi bat garatzen ari gara, gure teknologiaren eragin ekonomikoa eta klinikoa ebaluatzeko. Ikerketa hau pazientearen segurtasunean, adimen artifizialean eta osasun digitalizazioan nazioarteko liderrekin batera argitaratuko da.
SPRI Taldeak euskal enpresen I+G bultzatzen du tresnekin, aktiboekin, laguntzekin, lantalde eta aliantzekin, ikerketa sustatzeko eta teknologia berriak sortzeko. Elkartek, Emaitek edo Hazitek bezalako I+Grako laguntza programak kontsulta itzazu.
