Japoniako Gobernuak goi mailako bisita instituzionala egin du Euskadira berrikuntza, energia eta lurralde-garapen arloko lankidetza indartzeko

Japoniako Gobernuko Berreraikuntzako ministroak, F-REI institutuko (Fukushima Institute for Research, Education and Innovation), ordezkariekin batera, astearte honetan Euskadira egindako bisita ofiziala hasi du eskualdeko berrikuntzaren ekosistema gertu-gertutik ezagutzeko asmoz. Horrekin lotuta, interes berezia jarri du arlo estrategikoetako startupei babesa emateko mekanismoetan eta, horien artean, bereziki aipatu beharrekoa da Foodtech arloa.

Jardunaldia hasteko, Bilboko Burtsa eraikinean erakunde mailako topaketa egin dute. Industria, Trantsizio Energetiko eta Jasangarritasuneko Sail baitako Teknologia, Berrikuntza eta Eraldaketa Digitalaren arloko sailburuordeak, Jaione Ganzarain andreak, zuzendu du topaketa. Saioan zehar, sailburuordeak eskainitako aurkezpenean, Euskadi oso eskualde berritzailea dela eta balio erantsi handiko sektoreetan espezializatuta dagoela azpimarratu dute; hala nola fabrikazio aurreratuan, energian eta biozientzian. Lurraldeko ekosistema zientifiko-teknologiko sendoa ere nabarmendu du, lankidetza publiko-pribatuan oinarritua eta BRTA (Basque Research and Technology Alliance) bezalako sareen bidez antolatua. Era berean, garapen jasangarriaren eragile gisa, espezializazio adimendunaren euskal estrategia, trantsizio energetikoaren aldeko apustua eta nazioartekotzearen eta lankidetza teknologikoaren aldeko konpromisoa nabarmendu ditu.

Honako hauek osatu dute Japoniatik iritsitako ordezkaritza: Norikazu Suzuki jauna, Japoniako Berreraikuntza Ministerioko ministrordea; Tomohito Arao doktorea, F-REI institutuko Nekazaritza, basogintza eta arrantzako zuzendariondokoa; eta Kei Maeda jauna, ministrordearen idazkari pertsonala.

Topaketaren ostean, Bilboko Udaleko ordezkariek harrera egin diote segizioari, eta garapen ekonomikorako, ekintzailetzari laguntzeko eta hirigintza arloko nazioartekotzearen tokiko estrategiak izan dituzte hizpide.

Arratsaldean, ordezkaritzak Foodtech eta ekonomia urdinean espezializatutako AZTI zentro teknologikoaren instalazioak eta nekazaritza eta ingurumeneko ikerketan erreferentea den NEIKER zentroa bisitatu ditu. Bi bisita horiei esker, berrikuntza teknologikoan sinergiak identifikatu eta lankidetza zientifiko eta enpresarialerako bide posibleak aztertu ahal izan dituzte.

Bisita ofizial hau Fukushimako prefekturak eta Eusko Jaurlaritzak energia berriztagarrietan, garapen jasangarrian eta elkartruke instituzionalean oinarrituta 2019an sinatutako lankidetza-hitzarmenaren barruan kokatzen da. Bidaia, halaber, F-REI institutuak Fukushimako eskualdea suspertzen lagunduko duten nazioarteko aliantzak ezartzeko duen interesari lotuta dago. Horren guztiaren oinarriak dira hauek: teknologia aurreratua, ikerketa aplikatua eta berrikuntzarako sare globalak.