Hidrogenoaren euskal ekosistemak loturak estutu ditu Japoniarekin sektorearen nazioarteko foro nagusian
Hidrogenoaren energia sektoreko euskal enpresek World Hydrogen Summit 2025 topaketan parte hartzeko aukera izan dute astearte honetan. Hidrogenoaren garapenari buruzko nazioarteko ekitaldi nagusia Holandako Rotterdam hirian antolatu da aurten, eta mundu osoko energiaren arloko 15.000 profesional baino gehiago bildu ditu.
Testuinguru honetan, SPRI Taldeari atxikitako Basque Trade & Investment (BasqueTrade) euskal enpresak nazioartekotzeko agentziak, Japan External Trade Organization (JETRO) eta Euskadiko Energiaren Klusterraren lankidetzaz, enpresa-topaketarako gune bat antolatu du, Euskadiko eta Japoniako konpainiei aldebiko bilerak egin eta lankidetza teknologiko eta komertzialerako bideak esploratzeko aukera emanez.
Ekintza hau, hidrogenoa ardatz energetiko estrategikotzat garatzeko 2023az geroztik Euskadi eta Japoniaren arteko lankidetza bultzatzea xede duen ekimen zabalago baten barruan gauzatu da. Japoniak Espainian duen enbaxada, JETRO, Japoniako JH2A elkartea eta Energia Klusterra tarteko direla, azken bi urteotan ekintza bateratuak sustatu dira bi merkatuen arteko elkar-ulertzea indartzeko eta enpresen arteko egiazko sinergiak sortzeko.
Ildo horretan, B2B topaketetan parte hartu duten enpresek esperientziak partekatu, baterako interesak identifikatu eta Europan zein Asian elkarrekin garatzeko moduko proiektuak aztertu ahal izan dituzte. Ekitaldiak, gainera, hidrogenoaren euskal ekosistemaren potentziala erakusleiho global batean ikusarazten lagundu du, lurraldea garrantzizko eragiletzat sustatuz trantsizio energetikoaren eta deskarbonizazio industrialaren prozesuan.
