Euskadik Hego Korearekin digitalizazioan eta 5G sareetan duen lankidetza indartu du
Eusko Jaurlaritzako ordezkaritza instituzional eta enpresarial bat Hego Koreara joan da aste honetan Knowledge Sharing Program-en (KSP) baitan, Hego Koreako Finantza Ministerioak bultzatutako eta Koreako Merkataritza eta Inbertsioa Sustatzeko Agentziak (KOTRA) kudeatutako ekimena.
Programa honen helburua lankidetza-esparru estrategiko bat sortzea da, praktika egokiak partekatzeko, ezagutza sortzeko eta elkarren intereseko eremuetan aukera berriak identifikatzeko, besteak beste, 5G sare pribatuetan eta eraldaketa digitalean.
Basque Trade & Investment Coreak antolatu du misioa eta ordezkaritza instituzional zabala izan du. Zehazki, Jaione Ganzarain Epelde Teknologia, Berrikuntza eta Transformazio Digitaleko sailburuordea eta Elixabete García Caballero Transformazio Digitaleko zuzendaria izan dira ordezkaritzaren buru, SPRI Taldeko (Enpresen Garapenerako Euskal Agentzia) eta Seulen Basque Trade & Investment-ek duen bulegoko ordezkariekin batera.
Ordezkaritza instituzionalarekin batera, hainbat erakundek ere parte hartu dute, hala nola Basque Research and Technology Alliance-k (BRTA) Oihana Otaegui Madurga ikertzailearen bidez. Horren gain, erreferentziazko bi euskal enpresa ere izan dira; Aingura IIoT, digitalizazio eta mantentze prediktiboko soluzioetan espezializatua eta Titanium Industrial Security, zibersegurtasun industrialera bideratua.
Bisitaren baitan, ordezkaritza Samsung SDS, HFR eta Innowireless bezalako konpainia liderrekin bildu da, baita Korean Railroad Research Institute (KRRI) bezalako erreferentziazko erakundeekin ere, berrikuntza digitalean, konektibitatean eta mugikortasun adimendunean egon daitezkeen lankidetzak aztertzeko.
Aurkezpena Koreako enpresen aurrean
Misioan zehar, “KSP Basque Country Industry 4.0 & Private 5G Seminar” jardunaldia egin zen. Topaketa horretan, Koreako erakundeak eta 30 enpresa bildu ziren, eta aukera eman zuen Euskadiren gaitasun industrialak eta teknologikoak aurkezteko, Europako berrikuntza hub izaera erakusteko eta Koreako enpresekin elkarrizketa gune bat irekitzeko, 4.0 Industrian, 5Gn, adimen artifizialean eta zibersegurtasunean, besteak beste.
Misio horrek indartu egiten du Euskadi Europan bazkide fidagarri eta berritzaile gisa kokatzeko estrategia, industria-sektore aurreratuetan lidergoa sendotuz eta nazioarteko lankidetza-bide berriak irekiz. Hego Korearekiko lankidetzak industria digitalago, jasangarriago eta erresilienteago baten ikuspegi partekatua indartzen du.
