Euskadik itsasoko energia eolikoan duen nazioarteko posizionamendua indartu du Japonian
Japoniako Akita hiriak Global Offshore Wind Summit Japan 2025 (GOWS) ekitaldia hartzen du aste honetan. Itsas energia eolikoaren industriako ekitaldirik garrantzitsuenetako bat da, eta 800 eta 1.000 parte-hartzaile artean bilduko ditu, aurrez aurre, eta beste 500 inguru modu birtualean, sektoreko enpresak eta adituak barne. Hiru jardunalditan, erakusketak eta hitzaldiak egingo dira, merkataritza-negoziazioetarako eta negozio-bileretarako guneak antolatuko dira, eta, horiekin batera, ekitaldi paraleloak ere bai, besteak beste, Europar Batasunaren Japoniako Ordezkaritzak antolatutako networking-bazkaria eta energia eolikoarekin lotutako tokiko instalazioetara bisitak.
Euskadiren ordezkari gisa, Basque Trade & Investment-ek (BasqueTrade) Japonian duen bulegoak Iberdrolarekin batera doa, itsasoko energia eolikoaren sektorean (Offshore Wind, OSW) euskal industria-sarearen ikusgarritasuna sustatzeko helburuarekin. Euskal ordezkaritzak erakusketarako gune bat du, eta Nagore Bonilla BasqueTrade-ko lehendakariordea da buru. Hainbat gune agendatutan parte hartzen du, hala nola Japoniako Ekonomia, Merkataritza eta Industria Ministerioak (METI) antolatutako mahai-inguru batean. Mahai-inguru horretan, itsasoko energia eolikoaren arloko politiken nazioarteko konparazioa lantzen da. Halaber, Japonian dauden Europako enbaxadetako ordezkariekin panel batean parte hartu du, Europako ekimenei eta herrialdearentzat sektore horretan dauden itxaropenei buruz.
GOWSeko euskal agendan, Energia Eolikoaren Japoniako Elkarteko (JWPA) eta FLOWRAko zuzendaritza-kontseiluko kideekin ere bilerak egiten dira, funtsezko erakunde horiekin harremanak sendotzeko eta enpresen arteko lankidetzarako aukerak sustatzeko.
Euskadik eta bere industria sareak GOWS 2025ean duten parte hartzea sektoreko enpresa liderrekin eta nazioarteko erakundeekin lankidetza esparru batean garatzen da, eta itsas energia eolikoaren euskal ekosistemak testuinguru globalean duen gaitasuna erakusteko aukera ematen du.
