Tecnipesa-k ahots bidezko picking konponbideak eta RFID teknologiak eskaintzen ditu biltegiak kontrolatzeko
Tecnipesa konpainia, Gipuzkoan sortua 1962an, biltegien automatizazio sektoreko erreferenteetako bat da. Egoitza soziala Donostian duelarik eta bulegoak Katalunia, Madril, Andaluzia eta Mexikon, berrikuntzaren aldeko apustua egin du, ahots bidezko picking-a eta RFID teknologiak erabiliz. Tecnipesa-ko zuzendari nagusi Joan Mari Bonet-ek euren kasu arrakastatsu batzuk azaldu dizkigu, eta logistikari aplikatutako teknologia berrien abantailez mintzatu zaigu.
Zer egiten duzue Tecnipesa-n?
Hornikuntza-katerako konponbideak eskaintzen ditugu, bai produkzioko logistikarako eta baita ere biltegikorako, betiere tresna modernoetan zentraturik, hala nola, barra-kodeak, RFID teknologia eta ahots bidezko kudeaketa-sistemak edo voice picking–a. Denak oinarritzen dira software eta hardware garapenetan. Azken finean, ingeniaritza bat gara, logistika eta tresna teknologikoak oinarri harturik, hornikuntza-katerako konponbideak eskaintzen dituena.
Horrelako konponbideen adibideren bat eman dezakezu?
Ahots bidezko picking tresna ahotsezko interfaze digital bat da. Papera hartu eta apalez apal kaxa bila ibili beharrean, sistema honek aginduak ematen dizkio langileari, nora joan behar duen jakin dezan. Behin hara iritsitakoan, sistemak berak baieztatzen dio behar den tokian dagoela, eta eskatutako unitate-kopurua hartzeko agintzen dio. Langileak haririk gabeko kaskoak erabiltzen dituenez komunikatzeko, libre dauzka eskuak, eta produktiboagoa da. Lehen kode-barra irakurle batekin ibili behar izaten zuen, eta irakurleari begiratu behar zion zer jaso behar zuen jakiteko. Orain, berriz, aginduak ahotsaren bidez iristen zaizkio eta libre izan ditzake eskuak. Hala, bere produktibitatea % 20-30 inguru handitzen da. Txorakeria bat dirudi, baina biltegi bateko 30 langileek bina segundo aurrezten badituzte operazio bakoitzean, urteko 230 lanegunak kontuan hartzen baditugu, diru asko da hori.
RFID teknologia irekiagoa da. Orain hainbat konponbide garatzen ari gara landa eremuetarako, nekazaritzarako, ontziak kontrolatzeko, baita ere industriako moldeak eta pneumatikoak kontrolatzeko, saskien mugimendua kontrolatu eta pieza lapurreta txikiak saihesteko, e.a. Hauxe da RFID txipen eta barra-kodeen arteko -bigarren horiek ere erabiltzen ditugu- aldea: RFID txipek, barra-kodeek ez bezala, gaitasun handiagoa dute eta informazio gehiago har dezakete; gainera, aukera ematen dute kontsultatzeko eta informazioa berriz grabatzeko. Barra-kodeak baditu bere aplikazioak, eta RFID txipak ere bai. RFID txipa barra-kodeak baino garestiagoa da, eta horregatik, beti izango dira bateragarriak. Argi dago RFID txipek askoz gehiago eboluzionatu dutela, eta lehen pentsaezinak ziren konponbideak eskaintzen hasi dela.
Nolako garrantzia du logistikak 4.0 Industriaren testuinguruan?
Ongi aplikatutako logistika errentagarriagoa da, eta bidea ematen du diru gehiago irabazteko. Gure konponbideei esker, gure bezeroak eraginkorrago eta errentagarriago egiten ditugu. Barra-kode bat edo RFID etiketa bat irakurtzen dudanean, informazioa eskuratzen dut segundo bat baino gutxiagoan eta, gainera, informazio hori zuzena da kasuen % 99,99an. Beraz, informazioa eskuratzen dut azkar eta akatsak drastikoki murriztuz. Tresna hori guk garatutakoa bezalako software konponbide batekin (Biltegien Kudeaketako Sistema) aplikatzen bada, hau da, software bat aukera ematen duena datuak kudeatzeko eta informazioa emateko denbora errealean, orduan enpresak eraginkorrago bihurtzen dira. Funtsezkoa da denbora errealean ezagutzea biltegian gertatzen dena. Izan zaitezke denik eta fabrikatzaile onena, eskain ditzakezu akabera eta kalitate onenak, baina txarra bazara entregetan, hau da, denboran huts egiten baduzu, porrot egingo duzu, eta kalitate okerragoa baina logistika hobea duen norbaitek irabaziko dizu.
Logistikaren eta biltegiratzearen munduan, azken urteotan hitzetik hortzera darabiltzagu etorkizuneko hainbat joera: garraiorako ibilgailu autonomoak, AGV, edo dronak erabiltzea lokalizazio-lanak egiteko biltegiratze-azalera handietan. Nola ikusten dituzue joera horiek?
AGV-ei dagokienez, ez gara sartu mundu horretan. AGV-ak elikatzen ditugu merkatu-gaiak mugitu ditzaten lantegi barruan. Dronei dagokienez, badaukagu proiektu pilotu bat arlo horretan, baina ez da erraza. Dron batekin irakurketa bat egiten bada inbentario baterako, dron horrek % 100eko eraginkortasun bermea eman behar du. Hau da, drona gai izango da inbentarioa irakurtzeko, baina kontuan izan behar da badaudela sakonera handiko apalak, eta drona ez dela iristen barruraino, beraz, irakurketak % 40-60 inguruko zehaztasuna du. Oraindik lanean jarraitu behar da eraginkortasuna hobetzeko.
Nolakoak dira zuen bezeroak? Zein sektoretakoak dira?
Edozein enpresa izan daiteke. Beste kontu bat da konpainia bakoitzak nolako politikak, printzipioak eta pentsamenduak dituen. Badauzkagu bezeroak automozioan, industria astunean, elikaduran, logistikan, farmazia nahiz medikuntza sektoreetan, eta baita sektore publikoan ere. 4.0 teknologia hau eta bere bertsio guztiak edozein enpresatan aplikatu daitezke, hala nahi bada. Adibidez, berriki ikastetxe bat hurbildu zaigu, otorduak, mantelak eta ahozapiak kontrolatu nahi zituelako. Kirolaren munduan, maratoietan erabiltzen dira RFID txipak: korrikalariek dortsalean eramaten dute txipa euren denborak kontrolatzeko. Izan litezke enpresa handiak edo txikiak, eta egiten dutenaren arabera, inpaktu handiagoa edo txikiagoa lortuko dute. Logistika kontrolatzea, ematen den urrats bakoitza kontrolatzea, zerbait egiteko zenbat denbora behar den jakitea, ordutan zenbateko kostua duen ezagutzea… informazio hori guztia baliagarri da produktiboago izateko. Mundu guztiak aplika dezake gelditzeko iritsi den teknologia hau. Eta 5Gak sekulako aldaketa eragingo du, informazioa alde guztietatik eta abiadura bizian etorriko baita.
Zeintzuk dira zuen etorkizuneko erronkak?
Ilusioz beterik begiratzen diogu etorkizunari eta gogotsu gaude koronabirusak ekarri duen krisiari aurre egiteko. Latinoamerikan zabaltzen jarraitu nahi dugu, eta bultzada bat eman nahi diogu gure I+G+B sailari, ikertzen jarraitzeko eta mundu industrialak planteatzen dituen premiei erantzuteko puntako konponbideekin. Halaber, merkatu-kuota irabazten jarraitu nahi dugu, bezeroek gero eta hobeto balora gaitzaten.
Lotutako albisteak
Lantekek, software industrialean munduko liderrak, 36.000 bezero baino gehiago ditu dagoeneko
Arabako Parkean kokatuta dagoen enpresak 400 langile baino gehiago ditu, eta SPRI Taldearen zibersegurtasuneko programako laguntza bat jaso du
Lowerton, adimen artifizialarekin enpresak berritzea eskaintzen duen startupa
Bere teknologiak aukera ematen du lau hilabeteko lana eskatzen duten hobekuntzak bi egunetan bakarrik ezartzeko
Duplostock industria-irtenbide pertsonalizatuen diseinatzaile eta fabrikatzaile bihurtu da
Zuzendaritzan izandako aldaketaren ondoren, euskal enpresak eraldaketa digitalaren, efizientzia energetikoaren eta bere prozesuen automatizazioaren aldeko apustua egin du.
Novaut, blog batetik jaio zen marketplace industrialaren finkapena
Merkatuan bost urte daramatza, eta Arabako enpresak lortu du bere lekua egitea ordezko pieza kritikoen sektoreko erraldoien artean
GM2k digitalizazioaren eta nazioartekotzearen aldeko apustua egin du, motorraren sektorearen hazkundea bultzatzeko
Motorzaleentzako ekipamenduaren banaketan espezializatutako enpresa arabarrak adimen artifizialean oinarritutako laguntzaile birtual bat garatu du, ereduaren araberako ordezko piezen bilaketa errazteko, eta Mediterraneo inguruko herrialdeetan hedatzen hasi da.
Veiss-ek 20 urte baino gehiago dihardu tokiko enpresa eta erakundeen eraldaketa digitalean laguntzen
Arabako enpresak webgune korporatiboak, mugikorretarako aplikazioak edo online dendak garatzen ditu sektore mota guztietarako.
Lancor, altxatzeko motor elektrikoen fabrikazioan Europako liderra
Abanto-Zierbenako enpresak SPRI Taldearen Gaitasun Digital Profesionalen programako laguntza jaso du eta esportaziorako produktu propioak garatzearen aldeko apustua egiten du.
Rebel Tickets, sarreren birsalmentan iruzurrari eta gehiegizko prezioei aurre egiteko sortutako enpresa bizkaitarra
Gaur egun, beren publikoari baimendutako birsalmenta eskaini nahi dioten jaialdi, kontzertu eta bestelako ekitaldien sustatzaileekin lan egiten du.
Mercanza: “Bezeroa bere datuen ustiapenean espezializatua bihurtzen dugu”
Enpresak eraldaketa digital tradizionala gaindituz soluzioak eta zerbitzuak eskaintzen ditu, enpresen eraginkortasuna eta produktibitatea bultzatzeko.
Zabalgarbik denbora errealeko analisi-tresnekin modernizatu du bere azpiegitura
Besteak beste, biki digitala eta adimen artifizialean oinarritutako teknologiak ezartzeaz gain, lurrun-gainberogailu bat instalatzea du helburu enpresak, energia-eraginkortasuna eta jasangarritasun operatiboa hobetzeko ekimen estrategiko bat.