Lurmetrika Labs, adimen artifiziala eta Big Data turismoaren sektorerako
Innolab Bilbao-n sortutako startup honek 4.0 Industriari lotutako tresnak baliatzen ditu jomuga turistikoei buruzko datuak bildu eta aztertzeko
Datuen analitika eta adimen artifiziala bezalako tresna eta teknologien erabilerak gero eta aplikazio gehiago ditu arlo desberdinetan. Arlo horien artean turismoa da berritzaileenetako bat eta potentzial handienetakoa duena. Horrelako teknologien bidez posible izango da okupazio-mailak edo prezioak aurreikustea, eta baita ere bezero bakoitzarentzako esperientzia turistiko pertsonalizatuak diseinatzea. Koronabirusaren krisiaz eta turismo sektoreko teknologia berriez mintzatu gara Gonzalo Moyarekin, Lurmetrika Labs enpresako datu-analistarekin.
Nolako zerbitzuak ematen dituzue Lurmetrika Labs-en?
Lurmetrika Labs adimen turistikoko zerbitzuetan espezializatutako startup bat da, batik bat “Jomuga Adimendun”en kudeatzaileei zuzendua, hala nola, udalak, patronatuak, erakunde publikoak, e.a. Lurmetrika Labs-en helburua da ostatu turistikoen industriaren errendimendua neurtzea. Lurmetrika Labs-en lantzen ditugun datuak informazio-iturri digitaletatik eta monitorizazio-teknologietatik eskuratzen dira, eta baliagarri dira erabaki hobeak hartzeko jomuga turistikoaren posizionamenduarekin, lehiakortasunarekin eta jasangarritasunarekin zerikusia duten arloetan. Lurmetrika-k informazioa ematen du hileko eta eguneko batez besteko prezioei buruz, horretarako kontuan hartuz Estatu osoa, autonomia erkidegoak, probintziak, eskualdeak eta udalerriak, bai eta establezimendu mota desberdinak, hala nola, hotelak, apartamentuak, pentsioak edo landetxeak. Halaber, adimen artifizialeko algoritmoak erabiltzen ditugu informazioa sortzeko ondoko hauei buruz: gorago aipatutako lurraldeen eguneroko okupazio-maila, prezioen aurreikuspena, eskaintzaren okupazio-gradu edo tamaina, eta oporretako etxebizitzen eta alokairuen hileko batez besteko diru-sarrerak, prezioak eta okupazioa.
Emango diguzu garatu dituzuen proiektuen edo kasu arrakastatsuen adibideren bat?
Gaur egun lanean ari gara Donostia Turismoa bulegoarekin, Salamancako Turismoaren Behatokiarekin, ITREMekin eta, besteak beste, Costa del Sol eskualdearekin; datu turistikoak ematen dizkiegu euren eskualdeari eta beste jomuga lehiakor batzuei buruz, gero euren plataforma digitaletara egokitu ditzaten. Lan egin dugu orobat Kanaria Handiko Turismo Patronatuarekin okupazioaren aurreikuspena egiteko, eta Segittur-ekin bere datu-baseak aberasteko.
Halaber, Kevo Technologies enpresarekin (adituak lengoaiaren prozesamenduan) ari gara lanean; tresna bat garatu nahi dugu, bidaiariak ahalik eta gehien aprobetxa dezan hiri batean egiten duen egonaldia, bere bidaia pertsonalizatuz eta berarekin elkarreraginez sakelakotik, AAz hornitutako chatbot baten bidez.
Turismoa izan da koronabirusaren krisiak gogorren kolpatutako sektoreetako bat. Nola eragin dizue pandemiak?
Partzialki eragin digu, turismotik bizi garelako. Hainbat proiektu bertan behera gelditu dira, adibidez, Costa Ricako Turismoaren Institutuarentzat garatu behar genuena hango turismoaren adierazleak hobetzeko. Bertan behera geratu dira orobat beste bezero batzuei ematen dizkiegun zerbitzuak, itxialdi garaian mugikortasunik ez zegoenez, okupazio turistikoari buruzko datuak ez zirelako esanguratsuak. Bestalde, alde positiboari begiratuta, bezero berriak aurkitu ditugu, zeintzuk ziurtasuna edo itxaropena baitute turismoa suspertu egingo dela.
Nola aldatuko da turismoaren sektorea COVID-19ak eragin duen krisiaren ondorioz?
Une honetan, osasunaren segurtasuna bermatzea da garrantzitsuena jomuga turistiko guztientzat. Munduko gune turistiko guztien helburua da turistak seguru senti daitezela jomugetan. Sektorea alderdi hori indartzen ari da, batez ere Espainian, pandemiak gogorren jo duen herrialdeetako bat izan delako.
Bestalde, jomuga batzuek, adibidez, Balear edo Kanariar Uharteek menpekotasun handia dute atzerriko turistekiko. Baina testuinguru honetan, aurten behintzat, Estatuko turisten menpe egon beharko dute. Egia da termino ekonomikoetan eta kuantitatiboki bi turismo motak alderaezinak direla, baina egoera hau baliagarri izango da lehenago nazioarteko jomugetara edo Estatuko beste batzuetara joatea erabakitzen zuten bezero horiek leialtzeko. Hau da, Estatuko turistak zaindu behar dira, une honetan haien menpe daudelako, ez Covid-19a baino lehenagoko egoerara itzultzeko, baina bai mantentzeko.
Horrekin batera, jasangarritasuna eta horrekin lotuta dagoen guztia nabarmendu behar da. Itxialdiko hilabeteotan ikusi dugu naturak bere espazioa berreskuratu duela. Ia ez da trafikorik izan, pertsonak ere ez dira kalean ibili, eta naturak bere eremua berreskuratu du, horrela erakutsiz zein garrantzitsua den gure ondarea babestea. Jomuga turistikoak ondare hori ustiatzen ahaleginduko dira, masifikazioak saihestuz. Eta hori lortzen ari da teknologiak erabiliz, zehazki, Big Data teknologiak. Turista batek, jomuga batera iristen denean, denbora errealean kontsultatu ahal izango du zein den museo baten, monumentu baten edo hondartza baten okupazio-maila, horrela jende asko dagoen ala ez jakiteko eta kolapsoak saihesteko.
Hortaz, hauek izango dira jomugaren kalitatea bermatzeko gakoak: osasun segurtasuna, turismoa leialtzea, jasangarritasuna eta teknologien erabilpena.
Teknologiak paper garrantzitsuagoa hartuko du turismoaren sektorean?
Lurmetrika-n uste dugu plataforma digitaletan –gure kasuan turismoaren sektorean- informazio kopuru handia dagoela. Horregatik, Big Data eta adimen artifiziala erabiliz informazioa eskuratu dezakegu zenbait adierazle konfiguratzeko eta, horrela, aukera emango diogu jomuga turistikoari erabakiak hartzeko.
Zeintzuk dira Lurmetrika-ren etorkizuneko erronkak?
Une honetan gure zerbitzu guztiak API gisa eskaintzen hasteko prozesuan gaude. Horrezaz gain, prezioen epe luzeko iragarpena hobetu nahi dugu algoritmoetan hobekuntzak eginez.
Beste erronka bat da turismo teknologikoari lotutako profesionalak bilatzea, hau da, marketin digitaleko espezialistak, web programatzaileak, zibersegurtasuneko adituak, e.a. Ezagutzadun profesionalak eta tresna digitalak bilatu behar dira, izan ere, turistaren premiak eta bidaiatzeko moduak aldatzen diren neurrian, turismoaren industriak ere aldatu egin behar du.
Bestalde, aurreikuspen-tresna bat lantzen ari gara adimen artifizialaren bitartez; tresna horrek gune edo hiri bateko prezioak eta okupazio-maila aurreikusiko ditu epe luzera. Hala, esaterako, ekitaldi zehatz bat gertatzekoa denean, iragarri ahal izango dugu zein prezio eskainiko diren hoteletan eta zein izango den okupazio-maila.
Lotutako albisteak
Nexmachinak Gauzen Interneta industriara zabaltzen du
Enpresak IoT soluzio jasangarriagoak eta eskuragarriagoak eskaintzen ditu mota guztietako enpresa eta erakundeentzat
Lantekek, software industrialean munduko liderrak, 36.000 bezero baino gehiago ditu dagoeneko
Arabako Parkean kokatuta dagoen enpresak 400 langile baino gehiago ditu, eta SPRI Taldearen zibersegurtasuneko programako laguntza bat jaso du
Lowerton, adimen artifizialarekin enpresak berritzea eskaintzen duen startupa
Bere teknologiak aukera ematen du lau hilabeteko lana eskatzen duten hobekuntzak bi egunetan bakarrik ezartzeko
Duplostock industria-irtenbide pertsonalizatuen diseinatzaile eta fabrikatzaile bihurtu da
Zuzendaritzan izandako aldaketaren ondoren, euskal enpresak eraldaketa digitalaren, efizientzia energetikoaren eta bere prozesuen automatizazioaren aldeko apustua egin du.
Amazinglers: “Gazteek TikTok bidez lana bilatu eta aurkitu ere egiten dute, eta horretara egokitu behar gara”
Igone Ruiz de Azua arabarrak sortutako startupak gazteak enpleguekin eta praktikekin konektatzen dituen plataforma bat baino askoz gehiago izan nahi du; talentu bila enpresei aholkuak ematen dizkien eta belaunaldi berrien potentzialaren aldeko apustua egiten duen komunitatea.
Alterity, robotika mugikorrarentzat eta mugikortasun elektriko arinarentzat bateriak fabrikatzen dituen enpresa bizkaitarra
Elkarteak SPRI taldearen nazioartekotze-programaren laguntza bat jaso du, eta bezeroak ditu jada Italian, Suitzan eta Herbehereetan
Sariki, metrologian liderra den ETEa: “BIND SMEk zure erronketarako soluzioak dituzten startupekin konektatzen zaitu”
Gipuzkoako ETEak 40 urte beteko ditu 2025ean, eta BIND SMEren, Eusko Jaurlaritzak sustatutako eta startupekin berrikuntza irekian jarduteko programaren, 2. edizioan parte hartu zuen
Novaut, blog batetik jaio zen marketplace industrialaren finkapena
Merkatuan bost urte daramatza, eta Arabako enpresak lortu du bere lekua egitea ordezko pieza kritikoen sektoreko erraldoien artean
GM2k digitalizazioaren eta nazioartekotzearen aldeko apustua egin du, motorraren sektorearen hazkundea bultzatzeko
Motorzaleentzako ekipamenduaren banaketan espezializatutako enpresa arabarrak adimen artifizialean oinarritutako laguntzaile birtual bat garatu du, ereduaren araberako ordezko piezen bilaketa errazteko, eta Mediterraneo inguruko herrialdeetan hedatzen hasi da.
Veiss-ek 20 urte baino gehiago dihardu tokiko enpresa eta erakundeen eraldaketa digitalean laguntzen
Arabako enpresak webgune korporatiboak, mugikorretarako aplikazioak edo online dendak garatzen ditu sektore mota guztietarako.