“ITP Aerorentzat, Fabrikazio Aditiboa ez da etorkizuna, oraina baizik”
Zamudion finkatutako enpresa aeronautikoak 3D inprimaketan egindako lehenengo piezak ekoiztu ditu Airbusen bi modelotarako, 4.0 Industriaren aldeko konpromisoa berretsiz
ITP Aero ezagutza eta talentu teorikoa errealitate industriala bihurtu izanaren eredu bizia da. Zehazkiago esanda, bertatik bertara frogatu du Fabrikazio Aditiboko prozesu baten bidez (3D inprimaketa) hegazkin baten motorreko osagaien pisua % 40 ere murriz daitekeela. Horixe da Bizkaiko Zientzia eta Teknologia Parkean finkatutako euskal konpainia honek lortu berri duena, 4.0 Industriaren adar horretaz baliatu baita Airbusen ‘A350’ eta ‘A400M’ modeloetan inplementatzeko. ITP Aero da motor eta osagai aeronautikoen Espainiako enpresa nagusia eta mundu osoko bederatzigarrena.
30 urtetik gorako hazkunde iraunkorra eta I+Garen aldeko apustu etengabea tarteko (360 milioi baino gehiago inbertitu ditu azken bost urteotan), egun 3.800 langile baino gehiago ditu bost herrialdetan banatuta eta 880 milioi euro fakturatzen ditu, euskal konpainia honetako Hegazkintza Komertzialeko zuzendari exekutibo Mikel Lanterok ziurtatu duenez.
Zergatik da garrantzitsua lortu berri duzuena?
Guretzat oso garrantzitsua da, izan ere, beste aurrerapausoa bat da teknologia propioa garatzeko prozesuan eta hau guztiz funtsezkoa da gu mugitzen garen merkatuan. Eskakizun maila handiko merkatua da, etengabeko hazkuntzan dagoena, eta gure osagaiak eta kostuak hobetzen lagundu ahal digun teknologia propioa garatzea oinarri-oinarrizkoa da. Eta hortxe sartzen da jokoan egun 4.0 Industria izenaz ezagutu eta ITPn digitalizazioa deritzogun hori, eta horren barruan, Fabrikazio Aditiboa esku artean darabiltzagun giltzarrizko hiru oinarrietako bat da.
Zein ildotan garatzen ari da 3D inprimaketaren alde egin duzuen apustua?
Lehenik eta behin, argi utzi nahi dut ITPrentzat Fabrikazio Aditiboa ez dela etorkizuna, oraina baizik, gaur egungo jarduna. Hortik abiatuta esan behar dizut ez garela mugatzen osagaiak fabrikatzera, baizik eta diseinuari buruzko irizpide propioetan oinarritzen garela horretarako, guretzat oso garrantzitsua baita. Zergatik? Produktua ziurtatu eta hegazkintza komertzialean abian jartzeko aukera errazten digulako. Ildo horretan, beste aurrerapauso bat ematen ari gara Zamudion dugun lantegian, Bizkaiko Teknologia Parkean: fabrikazio aurreratuko ildo berria abian jartzea. Horri esker, hasierako prototipoetatik serieko fabrikaziora igaro ahal izango gara. Enpresak 14 milioi euroko inbertsioa egin du inflexio-puntu horretara iristeko.
4.0 Industriako zein beste adarretan lan egiten ari zarete?
Bigarren jarduera-ildoa simulazio aurreratua izango litzateke, hau da, simulazio-prozesuak gero eta zehatzagoak eta gaitasun handiagokoak izaten saiatzea, motorraren makinan egin beharreko geroko egiazko proben kostuak murrizteko eta gure produktuak eta piezak abian jartzean denbora eta dirua aurrezteko.
Zuen agertokiak ba al du hirugarren hanka digitala epe labur-ertainean?
Badago bai, eta nik esango nuke behin eta berriz aipatzen den datuen tratamenduaren ildo handi samarra dela, gure lantegietan etengabe lantzen ari garen Big Data delakoa. Finean, datu-kopuru handi baten bitartez, gure produktuen kalitatea hobetzeko, zuzenketa-neurriak ezartzeko edo mantentze-lanetarako politikak planifikatzeko informazio baliagarria lortzea da xedea. Betiere lehiakortasuna eta kostuak hobetzeko helburuari begira.
Une honetan, 180.000 pertsona baino gehiago bidaiatzen ari dira ITP Aerok fabrikatutako osagaiak dituzten hegazkinetan…
Hala da, pieza horiek guztiak Zamudion eta ITPren gainerako lantegietan fabrikatzen dira. Pieza horiek erosten dizkigute gure bezero nagusiek, motoreroek, halaxe esaten baitiegu munduko motor-fabrikatzailerik garrantzitsuenei: Rolls Royce, General Electric… Motorrak fabrikatzen dituen munduko bederatzigarren konpainia garen aldetik, mailarik nazioartekoenean jokatzen dugu.
3D faktorea giltzarrizkoa da industria aeronautikoarentzat iraunkortasunaren zein kostuen ikuspegitik… Zenbat eta pisu txikiagoa, orduan eta erregaien kontsumo txikiagoa, eta itxura denez, horixe izango da etorkizuneko hegazkinen joera datozen urteotan…
Egia da, horixe da gure industriaren driver nagusietako bat: pisua murriztea, osagaiek gero eta pisu txikiagoa izatea, horrek kontsumoa gutxituko baitu, baita isurpenak ere. Horren harira, azken aldi honetan, iraunkortasunaren aldeko apustuari eutsi diogu, eta ahalegin horretan, pisua, kontsumoa eta zarata dira duela zenbait urtez geroztik nabarmen murriztu nahian gabiltzan hiru faktore nagusiak. Ildo horretan jarraituko dugu.
Ikuspuntu teknologikotik, zein izango da ITP Aeroren ondorengo urratsa?
Lehen aipatu dugun Fabrikazio Aditiboaren inguruko prozesuaz gain, Zamudion ere kokatuta dagoen Teknologia Aeronautikoko Zentroan amaitu berri dugu hurrengo belaunaldiko turbinaren saiakuntza. Presio ertaineko turbina hau bat dator Rolls Royce datozen hamar edo hamabost urteetara begira garatzen ari den ultrafan motorraren kontzeptuarekin eta motorraren kontzeptu berri honek hegazkinen iraunkortasuna hobetzea du helburu.
Hegazkinak % 100 elektrikoak diren motorrek bultzatuko dituzte egunen batean?
Bai, zalantzarik gabe. Eta ikusi egingo dugu. Sektorea horretan lan egiten ari da, baita gu ere, noski. Propultsio elektrikoa edo propultsio hibridoa duten motorren ekoizpen-ildoa errealitatea izan liteke 2050. urtearen inguruan… Eta iraultza teknologikoa eta talentuaren garapena nagusi diren prozesu honen erdian, pertsonen balioa aldarrikatu nahi dut, enpresa hau osatzen duten mundu osoko pertsona guzti-guztiena, horien zeregina kritikoa baita. Pertsonak dira konpainian dugun aktiborik handiena, izan ere, pertsonei esker lortu dugu enpresa-jardunean 30 urte egitea, eta beste horrenbeste egitea espero dugu pertsonen eskutik.
Lotutako albisteak
Laura Ovies (EIT Community): “Euskadi eta beste eskualde batzuk beren garapen berritzailerako aliatu estrategiko gisa har gaitzaten nahi dugu”
Zamudion lan egiten du, eta EIT Community Hub Spain erakundeko arduraduna funtsezkoa da tokiko eragileak kontinenteko berrikuntza ekosistema handienarekin lotzeko, Berrikuntza eta Teknologiaren Europako Institutuarekin (EIT).
Lantekek, software industrialean munduko liderrak, 36.000 bezero baino gehiago ditu dagoeneko
Arabako Parkean kokatuta dagoen enpresak 400 langile baino gehiago ditu, eta SPRI Taldearen zibersegurtasuneko programako laguntza bat jaso du
Lowerton, adimen artifizialarekin enpresak berritzea eskaintzen duen startupa
Bere teknologiak aukera ematen du lau hilabeteko lana eskatzen duten hobekuntzak bi egunetan bakarrik ezartzeko
Duplostock industria-irtenbide pertsonalizatuen diseinatzaile eta fabrikatzaile bihurtu da
Zuzendaritzan izandako aldaketaren ondoren, euskal enpresak eraldaketa digitalaren, efizientzia energetikoaren eta bere prozesuen automatizazioaren aldeko apustua egin du.
Abuelo Actual, bi hamarkada adinekoen etxeak oztoporik gabeko espazio bihurtzen
Bizkaiko Silver Economy-ko Enpresen Gidaren parte da eta Nagusi Intelligence Centerrek bultzatu du, Foru Aldundiaren proiektu estrategikoak.
Moldes Ura enpresak berrikuntzaren alde egin du lehiakorra izaten jarraitzeko
Zamudion kokatuta, automobilgintza sektorerako injekzio eta konpresio moldeak ekoizten ditu enpresak, eta duela gutxi SPRI Taldearen Hazinnova programan parte hartu du.
Novaut, blog batetik jaio zen marketplace industrialaren finkapena
Merkatuan bost urte daramatza, eta Arabako enpresak lortu du bere lekua egitea ordezko pieza kritikoen sektoreko erraldoien artean
GM2k digitalizazioaren eta nazioartekotzearen aldeko apustua egin du, motorraren sektorearen hazkundea bultzatzeko
Motorzaleentzako ekipamenduaren banaketan espezializatutako enpresa arabarrak adimen artifizialean oinarritutako laguntzaile birtual bat garatu du, ereduaren araberako ordezko piezen bilaketa errazteko, eta Mediterraneo inguruko herrialdeetan hedatzen hasi da.
Makegik retrofitting industrialaren aldeko apustua egin du, nazioarteko hedapenerako bide gisa
Makina-erreminten eguneratzean espezializatutako enpresa gipuzkoarra merkatu aeroespazialean oinarritutako lan-ildo berriak garatzen ari da.
Veiss-ek 20 urte baino gehiago dihardu tokiko enpresa eta erakundeen eraldaketa digitalean laguntzen
Arabako enpresak webgune korporatiboak, mugikorretarako aplikazioak edo online dendak garatzen ditu sektore mota guztietarako.