Eusko Jaurlaritzak mundu osoko 882 startup erakarri ditu Euskadiko 70 enpresarekin lan egiteko

Eusko Jaurlaritzaren berrikuntza irekiko<BIND plataformak startupek bere azelerazio-programaren 10. edizioan parte hartzeko eta Euskadin liderrak diren 70 enpresa handirekin lankidetzan proiektu teknologiko berriak garatzeko deialdia itxi du. Guztira, 74 herrialdeko startupen 882 hautagaitza aurkeztu dira, eta inskripzioen % 46 enpresa parte-hartzaileek aurkeztutako 12 kasuei erantzuteko AA (% 40) eta CleanTech teknologiak (% 6) aplikatzen dituzten proiektuak dira.

BINDen hamargarren edizio honetan parte hartzeko, enpresa liderrek planteatutako 12 erronka berrietako bati edo batzuei erantzuteko soluzio teknologikoak aurkeztu dituzte startupek. Erronka horiek honako 5 esparru hauetan banatuta daude: prozesuak eta eragiketak, jasangarritasuna, osasuna eta bezeroa eta negozioa.

Industria adimenduna eta energia garbiak, berrikuntzaren epizentroan

Aurkeztutako soluzioen % 42 industria adimendunaren esparruan aplika daitezke, % 27 energia garbi eta jasangarrien esparruan, % 20 osasunaren esparruan, eta % 10 elikaduraren sektorean.

Soluzio horien artean, honako hauei lotutako proiektuak daude: AAko softwareak eta biki digitalak, energia berriztagarrien erabilera optimizatzeko; energia-biltegiratzeak eta ibilgailu elektrikoak; ekonomia zirkularreko prozesuak automatizatzeko, CO2 emisioak murrizteko eta Europako araudiak (ESG) betetzeko plataformak; AAren erabilera txip efizienteak eta jasangarriak sortzeko; arrisku handiko industrietan datuen analisian aplikatutako softwareak; logistika eta trazabilitatea optimizatzeko hobekuntzak; eta kalitatea monitorizatzeko ikuspen artifiziala.

BINDen edizio honetan parte hartu duten 70 enpresen artean, erreferentziazko zenbait enpresa daude, hala nola Mercedes-Benz>, Iberdrola, Tubos Reunidos, Bellota, GH Cranes, Ormazabal, Elecnor, Enagas, Uvesco, Sacyr eta Valoriza. Enpresa lider horiek startup teknologikorik disruptiboenak bilatzen dituzte, berrikuntza irekiko proiektu berriak adimen artifizialari, IoT-ari, murgiltze-teknologiei, energia garbiei, jasangarritasunari, zibersegurtasunari, robotikari eta osasunari lotutako azken soluzioekin garatzeko. Deialdia itxi ondoren, hamargarren edizioan parte hartzeko hautaketa-prozesuan sartuko dira hautagai diren startupak. Prozesu hori 2026ko urtarrilaren 31n amaituko da.

Euskal startupen parte-hartzeak gora egin du 

Aurten, hamargarren edizioan parte hartu duten euskal startupen kopuruak gora egin du. Guztira, 58 startupek eman dute izena BINDen, hots, 2024an baino %9,4 gehiagok. Bestalde, Estatuko gainerako lurraldeetako startupak dira berriz ere sailkapeneko lehenak, hautagaitza gehien erregistratu ondoren. Guztira, Espainiako startupak 179 dira, hots, erregistro guztien % 20.

Startupen jatorriari dagokionez, aurten 74 herrialde daude ordezkatuta, eta Europako herrialdeetako startup ugari daude (370 hautagaitza baino gehiago, hau da, guztien % 42). Ordezkaritzarik handiena duten Europako herrialdeen artean, Alemaniak aurkeztu ditu hautagaitza gehien, Frantziarekin, Erresuma Batuarekin, Italiarekin eta Portugalekin batera. Europatik kanpo, Hego Amerika izan da hautagaitza gehien erregistratu dituena (114 guztira), eta Argentina, Brasil eta Kolonbia izan dira herrialde nagusiak. Izan ere, BINDek nazioartean duen balioa etengabe hazi da hasiera-hasieratik. Azken deialdi honetan, nazioarteko hautagaitzak guztien % 80 dira (700 startup baino gehiago erregistratu dira).

Adimen artifiziala, gorantz doan teknologia

Aurten inskribatutako startupen % 40k (348 hautagaitzak) industria efizienteagoa eta jasangarriagoa sortzera bideratutako soluzio berritzaileak garatzeko AA aplikatzen duten proiektuak proposatu dituzte. AAk gorantz jarraitzen du, eta aurreko edizioan ere eskaera gehienak AAri lotuta bazeuden ere, aurten % 10eko igoera izan da.

BIND Corporate-ren 10. edizioan, startupek proiektu teknologikoak garatu ahal izango dituzte parte hartzen duten enpresen eskutik, industriaren etorkizuneko 12 erronka berriei erantzuteko. Hona hemen erronka horiek:

1. Prozesu industrialen digitalizazioa eta trazabilitatea
2. Automatizazioa eta robotika industria-inguruneetarako
3. Informazioaren kudeaketa eta segurtasuna, eta arauak betetzea
4. Mantentze prediktiboa eta industria-kalitatearen kontrola
5. Hornidura-katearen optimizazio logistikoa eta kudeaketa adimenduna
6. Ingurumen-inpaktuaren neurketa, murrizketa eta konpentsazioa
7. Efizientzia energetikoa eta kontsumoaren kudeaketa adimenduna
8. Energia berriztagarriaren sorkuntza eta biltegiratzea
9. Ekonomia zirkularra eta hondakinen eta baliabideen kudeaketa jasangarria
10. Osasun digitala, diagnostiko aurreratua eta eraldaketa asistentziala
11. Mugikortasun konektatua eta elektrifikatua, eta floten optimizazioa
12. Salmenta-puntuaren optimizazioa eta azken bezeroaren esperientzia

882 hautagaitza horietatik, erronka horiei teknologiarik abangoardistenen bidez ondoen aurre egiten dieten startupen proiektuak hautatuko dituzte enpresek, eta, hautatu ondoren, honako onura hauek lortuko dituzte:

• Euskal industriaren berrikuntza-ekosistemarekiko eta teknologia berriekiko konexioa: egoitza Euskadin duten erreferentziazko konpainiak izango dituzte eskura, eta Networking jardueretan parte hartuko dute, industria lehiakorragoa eta jasangarriagoa lortzeko.
• Lehen bezeroak lortzea: beren teknologia berritzailea inplementatu ahal izango dute sektoreko erreferentziazko enpresa liderren eskutik, merkatuan duten bideragarritasuna babesteko.
• Adituen aholkularitza: 40 mentore baino gehiago, enpresen azelerazioan, teknologia berrien merkatu-estrategietan, berrikuntza irekian eta ekintzailetzan espezializatuak.
• Inbertitzaileentzako sarbidea: BINDek Venture Club bat du, inbertitzaileen klub bat, azeleratzailearen espezializazioarekin lerrokatua, eta laguntza-zerbitzuak indartzea eta startup parte-hartzaileen eta inbertsio-erakunde espezializatuen arteko harremana sustatzea du helburu.

BIND berrikuntza irekiko plataformarik handienetako bat da maila globalean, enpresa pribatuen eta erakunde publikoen arteko elkarlanaren emaitza. 2016an hasi zuen bidea, Eusko Jaurlaritzako Industria, Trantsizio Energetiko eta Jasangarritasun Sailaren eskutik, SPRI Taldearen eta Euskadiko ekintzailetza-ekosistemaren UpEuskadi plataformaren bitartez.

BIND

BIND industria adimendunaren berrikuntza irekiko plataforma publiko-pribatu bat da, Industria, Trantsizio Energetiko eta Jasangarritasun Sailak SPRI Taldearen bitartez sortua. BINDek hiru ekimen ditu: BIND Corporate, BIND SME eta BIND GovTech, Euskadiko enpresak, ETEak eta sozietate publikoak mundu osoko startup disruptiboekin konektatzeko, haiekin berrikuntza-proiektuak garatzea helburu. 2016an jarduera hasi zuenetik, 250 startup eta scaleup baino gehiago bizkortu dira, eta 350 proiektu baino gehiago garatu dira, 9,6 milioi euroko fakturazioa gaindituta. Era berean, plataforma erreferente gisa kokatu da sektorean, industriaren digitalizazioari eta lurraldeko enpresa-sareari emandako laguntzagatik.