CyberIndustry kongresuan 250 enpresa eta 50 aditu baino gehiago bilduko dira industriaren zibersegurtasun-erronkei aurre egiteko
Lehen edizio arrakastatsuaren ondoren, CyberIndustry Congressen bigarren edizioa egingo da Bilbon 2026ko ekainaren 16an eta 17an, eta helburu du Europako zibersegurtasunaren balio-kate osorako urteko erreferentziagunea izatea. Industria, Trantsizio Energetiko eta Jasangarritasun Sailak antolatu du kongresua SPRIren eta TECNALIAren bidez. 50 hizlari adituk Europako zibersegurtasuneko azken aurrerapenen berri emango diete 250 enpresatako 350 parte-hartzaileri baino gehiagori.
Zibersegurtasuna funtsezko teknologia bihurtu da Euskadin, bertako sektore estrategikoak gero eta digitalizatuagoak eta konektatuagoak daudelako. Euskadiko ehun teknologikoa sendoa da, bereziki funtsezko sektoreetan, hala nola industrian, energian, osasunean eta, orain, baita industria aeroespazialean ere. Sektore horiek guztiek zibersegurtasuneko soluzio aurreratuak behar dituzte lehiakortasuna, osotasuna eta erresilientzia bermatzeko.
CyberIndustry Congress eskaintza teknologiko espezializatua eta sektore estrategikoen benetako beharrak konektatzeko sortu da, eta jarraitutasun operatiboa, erresilientzia eta subiranotasun teknologikoa lehiakortasunerako eta segurtasun ekonomikorako funtsezkoak diren esparruetan jartzen du arreta. Horretarako, maila goreneko hizlari nazionalak zein nazioartekoak, dibulgatzaile prestigiotsuak, enpresa liderrak, startupak, ikerketa-zentroak, unibertsitateak, inbertitzaileak eta eragile instituzional eta sektorialak bilduko dira kongresuan.
Hizlariak
Ekainaren 16an (asteartea) 9:30ean, ongietorri eta aurkezpen instituzionala egingo dute Elixabete Garciak, Eusko Jaurlaritzako Eraldaketa Digitaleko zuzendariak, eta Oscar Lagek, TECNALIAko Zibersegurtasun Estrategiako eta Teknologiako zuzendariak.
Ongietorriaren ondoko inaugurazio-hitzaldia Jose Ramón Coz Fernandezek emango du (ESA- Europako Espazio Agentziako Cyber Internal Audits Head). Haren hitzaldiak begiratu bat emango dio espazioaren sektoreko zibersegurtasunari. Sektore hori hazten ari den sistema kritiko baten adibide berezia da, eta erronka espezifikoak ekartzen dizkie komunikazioari, plataformei, hornidura-kateari, zerbitzuaren jarraitutasunari eta gaitasun estrategikoen babesari.
Halaber, erakunde hauek hitzaldiak emango dituzte: Elcano Errege Institutuak “Geopolítica, soberanía tecnológica y resilencia: el nuevo tablero de los sectores estratégicos” hitzaldia emango du (Geopolitika, subiranotasun teknologikoa eta erresilientzia: sektore estrategikoen joko-taula berria), Dario García de Viedmaren eskutik; European Cyber Security Organisationen (ECSO) hitzaldia Europak dituen zibersegurtasun-erronka handiei buruzkoa izango da (ingelesez); eta Zibersegurtaseko Institutu Nazionalak (INCIBE) prozesamendu seguruko inguruneen eta Osasun Datuen Europako Gunearen inportantzia gorakorra aztertuko du.
Erakunde hauek ere parte hartuko dute, “La ciberseguridad autonómica en acción: soberanía tecnológica y protección del territorio ante un entorno geopolítico y de cibercrimen creciente” izeneko mahai-inguruan (Zibersegurtasun autonomikoa martxan: subiranotasun teknologikoa eta lurraldearen babesa ziberdelinkuentzia gorakorreko ingurune geopolitiko batean): Cyberzaintza – Zibersegurtasunaren Euskal Agentzia, ZIUR Industrial Cyber Security Center-Gipuzkoa, Andaluziako Zibersegurtasun Zentroa, Navarra Cybersecurity Centre – NC eta Agència de Ciberseguretat de Catalunya.
Dibulgazioko eta prospektibako aditu Silvia Lealek ere parte hartuko du edizio honetan. Leal nazioarteko aditua da etorkizuneko joeretan, transformazio digitalean eta adimen artifizialean, eta ELGAko eta EBko aholkularia da. AA agentiko edo autonomoari buruz arituko da, baita automatizazio adimenduneko olatu berriaz ere, zeinak datozen urteetan teknologia, enpresak, erabakiak hartzea eta lan-ereduak aldatuko baititu.
Bestalde, pertsonek erakundeetan duten zereginari buruz hitz egingo du Koldo Lasalak (Talent Senior Advisor eta Meting Pointeko CEOa). Hitzaldiak “IA, personas y trabajo: impacto en el talento, las carreras (universitarias) y las organizaciones” izena du (AA, pertsonak eta lana: talentuan, ikasketetan eta erakundeetan duten inpaktua), eta ikuspegi humanista batetik aztertuko du AA nola aldatzen ari den lana, gaitasun profesionalak, lidergoa eta pertsonen, teknologiaren eta erakundeen arteko harremana.
Women4Cyber: emakumeen talentua, lidergoa eta parte-hartzea zibersegurtasunean
Halaber, kongresuak giza-dimentsioa eta aniztasuna integratzen ditu, garapenaren funtsezko eragiletzat hartzen baititu, eta Women4Cyber Europako ekimenak espazio espezifiko bat izango du: “Women4Cyber: talento, liderazgo y participación de las mujeres en ciberseguridad” (Women4Cyber: emakumeen talentua, lidergoa eta parte-hartzea zibersegurtasunean). Atal berezi honen helburuak dira zibersegurtasunaren arloan emakumeek parte hartzea bultzatzea, erreferentziei ikusgaitasuna ematea, laguntza- eta elkarlan-sareak sustatzea eta talentuak ekosistema sustatzeko alderdi gako gisa duen garrantzia azpimarratzea.
Lehen eguneko ondorioak CyberIndustry Congresseko zuzendari Oscar Lagek aurkeztuko ditu (16:50), eta bigarren egunekoak Joseba Lakak, TECNALIAko zuzendari digitalak, Oscar Lagerekin batera (16:30).
Kongresu hau RETECH — Espezializazio Teknologikoko Lurralde Sareen Programaren barruan dago. Programa hori Europar Batasunaren Suspertze, Eraldaketa eta Erresilientzia Planak sustatzen du, eta Next Generation EU funtsekin finantzatzen da.
