Fast Flooding, uholdeei aurre egiteko plataforma berritzailea
Muturreko fenomeno atmosferikoak gero eta ohikoagoak diren eta uholde-arriskuak giza, ekonomia- eta ingurumen-kostu handiak dituen ingurune batean, Fast Flooding plataformak horri aurre egin nahi dio. Soluzio teknologiko hori uholdeak aurreikusteko eta kudeatzeko aitzindaria da, eta IntelliAlert Technologies enpresak garatu du. Enpresa 2024an sortu zen, Tecnalia zentro teknologikoaren eta Bizkaiko Team Group ingeniaritzaren arteko lankidetzaren bidez.
Udalerri, azpiegitura-operadore eta industrietarako diseinatua, Fast Flooding-ek datu hidrometeorologikoak denbora errealean zentralizatzen ditu, eta Adimen Artifizialeko eta Machine Learning-eko algoritmoak erabiltzen ditu ibaien eta drainatzeen bilakaera aurreikusteko. Iragarpen-gaitasun horrek aukera ematen du alerta goiztiarrak emateko eta erabakiak garaiz hartzen laguntzeko, erantzun-protokoloak aktibatu eta arriskuak minimizatzeko.
Plataformak estazio hidrometeorologikoen eta sentsore propioen informazioa integratzen du, eta ur-mailei, prezipitazioei eta baldintza hidraulikoei buruzko datuak prozesatzen ditu 2D modelizazioen bidez. Arriskuaren kudeaketaren arduradunek grafikoak eta etorkizuneko egoerak ikus ditzakete, eta prebentzio-neurriak aurrez planifikatzea errazten duten abisuak jaso.
Dagoeneko tokiko mailan ezarrita dago, adibidez, Durango udalerrian edo inguruko hainbat industriatan, eta Adifekin batera hainbat proiektu eginda, plataformaren hurrengo urratsa nazioartera jotzea da, Jagoba Lupiola IntelliAlert Technologies-eko CEOak azaldu duenez: “Nazioartean laster Kolonbian eta Estatu Batuetan lan egitea espero dugu. Kolonbian gure enpresa nagusiak hainbat ezarpen ditu eta bertako bazkideekin ari gara lanean, eta AEBetan errepide eraikitzaileen eskutik haztea da gure helburua”.
Bere ibilbidean enpresak SPRI Taldearen laguntza izan du bere plataforma garatzeko. Gaur egun, bi Hazitek programatan parte hartzen du, eta, lehenago, Ekintzaile batean. Aurrera begira, enpresak beste arrisku mota batzuk gehitzea du helburu, uholdeen arloan aurrera egiteaz gain, larrialdi plan global bat integratzeko. Gainera, bere negozioa errepideen kontrolera zabaldu nahi du, estatuko eta nazioarteko merkatuan.
SPRI Taldeak euskal enpresen I+G bultzatzen du tresnekin, aktiboekin, laguntzekin, lantalde eta aliantzekin, ikerketa sustatzeko eta teknologia berriak sortzeko. Elkartek, Emaitek edo Hazitek bezalako I+Grako laguntza programak kontsulta itzazu.
SPRI Taldeak aukera ematen die euskal enpresei haien jardueraren berri emateko bere informazio-kanaletan. Zure proiektua gure gaiekin lotuta badago (I+G+b, digitalizazioa, internazionalizazioa, ekintzailetza, berrikuntza…), Zutaz mintzo gara ekimenean parte har dezakezu.
