Wolco, nazioartekotzearen aldeko apustua egin duen ebaketa-erreminta pertsonalizatuen fabrikatzailea
Wolco Lemoan (Bizkaia) dagoen enpresa da. Duela 50 urte baino gehiagotik, ebaketa-erreminta bereziak eta bezeroaren neurrira egindakoak fabrikatzen ditu hainbat sektoretarako: automobilgintza eta aeronautika, adibidez. 2019an ekin zion nazioartekotze-planari Mexikon fabrika bat irekita. Konpainiak SPRI Taldearen laguntza jaso du Industria digitala programari esker. Programa horren bidez, informazioaren eta komunikazioaren teknologien bidez euskal enpresen eraldaketa digitala lortu nahi da.
Enpresa Lemoan sortu zen 1972an metal gogorrezko eta tusteno karburozko piezak fabrikatzeko. “Automobilgintzarako eta aeronautikarako erreminta bereziak egiten ditugu, baina baita beste aplikazio batzuk ere: trokelgintza edo balbulagintza, adibidez”, azaldu digu David Bernar-ek, Wolco enpresako gerenteak.
Produktuak bezeroaren eskariz egiten dituzte, eta, hain zuzen, bezeroekin batera egiten dituzte diseinuak, “ad hoc ebaketa-erremintak eskaintzeko”.
2019an, nazioartekotzeko planari ekin zion, Querétaron (Mexiko) beste lantegi bat abian jarrita, 12 langilerekin. “Bestalde, azken urteotan, inbertsioak egin ditugu punta-puntako makinetan”.
Wolcok eskaintzen dituen produktuak honako hauek dira: fresak, otxabuak, forma-txertatuak (tornuetan doazen plakak), erreminta-etxeak eta hortzak. Automobilgintza eta aeronautika dira merkatu nagusiak, eta jarraian azaltzen dira balbulekin lotutakoak, trokelgintzakoak eta lerro zuria. “Erreminta bereziak direnez, serie laburrak egiten ditugu”.
Esportazioak negozioaren % 25 dira, eta Mexikon, Polonian, Turkian, Txekiar Errepublikan, Indian, Frantzian edo Alemanian hedatu da dagoeneko.
Wolcok 28 langile ditu eta bertako I+G arloa ezinbestekoa da; hain zuzen ere, urteko fakturazioaren % 5 bideratzen dute arlo horretara. “Fabrikazio Aurreratuko Zentroko kideak gara hasiera-hasieratik, duela sei urtetik, eta zentroan sartu zen erreminta-fabrikazioko lehen enpresa izan ginen”.
Enpresa Europako beste 18 konpainiarekin batera dago ekonomia zirkularrari eta erreminten berrikuntzari eta berrerabilerari buruzko Remanet proiektuan (Europar Batasuneko Horizon programaren barruan) sartuta.
Wolco Group osatzen du beste bi enpresarekin batera: Alfe Cutting (Arteaga udalerrian, Bizkaia). Siderurgia sektorerako ebaketa-hortzak fabrikatzen eta diseinatzen ditu. Eta Cisidel (Bilbon dago, Zorrotzaurre auzoan): ebaketa-erremintak (zerra zirkularra, adibidez) diseinatzen eta fabrikatzen ditu metalgintzarako eta egurraren sektorerako.
“50 urtetik gorako ezagutza izateak eta arazo asko konpondu izanak lehiakorragoak bihurtzen ditu gure bezeroak, mekanizazio-prozesuak hobetzen laguntzen baitie. Oso ohituta gaude aeronautikako kalitate-protokoloekin lan egiteak eskatzen duen eskakizunera. Duela 20 urte baino gehiagotik ditugu sektore horretako bezeroak, eta horrek gure lehiakideen batezbestekoa baino kalitate handiagoa eskaintzera behartzen gaitu. Lan egiten dugun beste sektoreen kontrol berberak aplikatzen ditugu”.
SPRI Taldearen Industria Digitala programatik jasotako laguntza “RPa garatzera eta fabrika hodeiarekin konektatzera” bideratu da.
Nazioartekotzearekin jarraitzea eta urrian Punen (India) lantegi berri bat irekitzea dira etorkizuneko erronkak. “Txinako lehiari aurre egiten jarraitu nahi dugu, eta produktu propioak garatzen jarraitu, merkatu berrietara iristeko eta gure bezeroak ahalik eta gehien dibertsifikatzeko”.
SPRI Taldeak Euskadiko enpresei aukera ematen die bere kanaletan jardueraren berri emateko. Zure proiektua gure gaiekin (I+G+b arloa, digitalizazioa, nazioartekotzea, ekintzailetza, berrikuntza…) lotuta badago, Zutaz mintzo gara ekimenean parte har dezakezu.
