Euskadiko enpresa-ordezkari batzuk Alemaniako automobilgintzaren eraldaketa aztertzen ari dira Munichen
Automobilgintzaren sektoreko Euskadiko enpresen ordezkaritza bat eta industria horrekin lotutako Alemaniako profesionalak Basque Trade & Investmenten (BasqueTrade) Munichekobulegoan bildu dira gaur. “Alemaniako automobilgintza eraldatzen: erronka globalak eta aukera estrategikoak” izenburupean egin da topaketa, IAA Mobility 2025 azokaren esparruan. Hain zuzen ere, sektoreko nazioarteko ekitaldi nagusietako bat da azoka hori.
Jardunaldia BasqueTrade-k, SPRI Taldearen barruan dagoen Euskadiko enpresen nazioartekotze-agentziak eta Euskadiko Automobilgintza Klusterrak (ACICAE) antolatu dute, eta Europako automobilgintzaren erronkak, Alemaniako merkatuaren dinamikak eta lankidetzarako aukerak aztertzea izan du helburu. Topaketa horretan, automobilgintzako 50 profesional, zuzendari eta teknikari izan dira, egoitza Alemanian duten eta IAA Mobility 2025 azokan parte hartu duten enpresak barne (fabrikatzaileei, hornitzaileei eta teknologia-zentroei lotutakoak).
Eusko Jaurlaritzako Industria, Trantsizio Energetiko eta Jasangarritasuneko sailburu Mikel Jauregik eman dio hasiera topaketari, eta Euskadiko automobilgintzaren garrantzia azpimarratu du hitz hauekin: “40.000 langile baino gehiago biltzen dituen zutabe ekonomikoa da. Euskadiko industriaren BPGaren % 25 biltzen du, bere baitan 300 enpresa baino gehiago ditu eta produkzioaren % 85 esportatzen du”. ACICAEk Euskadiko automobilgintza industriaren egungo egoerari buruzko azalpenak eman dizkie bertaratutakoei.
Erronkak eta aukerak
Sektorearen erronken eta aukeren azterketa sakontzeko, jardunaldia hiru gai multzo handitan egituratu da eta Alicia Santamariak, BasqueTradek Alemanian duen bulegoko zuzendariak, egin ditu moderatzaile-lanak. Besteak beste, gai hauek landu dira: Alemaniaren eraldaketa industriala, elektrifikazioa, industriaren lan-erronkak, Txinako ibilgailuen fabrikatzaileek Europan duten lehia mailako eta tentsio komertzialak.
Gainera, bertaratu diren enpresek sektoreko enpresa estrategietako profesionalak gertu-gertutik ezagutzeko aukera izan dute: BMW, Tesla, Alps Alpine, ZF eta Daimler, besteak beste. Enpresa horiek industriaren inguruko ikuspegia eskaini dute.
Ekitaldia amaitzeko, eztabaida interaktiboa egin dute, Europako industriaren etorkizuneko beharretan sakontzeko, eta arreta berezia jarri da hornidura-katean, lehiakortasunean eta lankidetza-aukeretan.
