KSP Basque P5G Master Plan programak Euskadiren eta Hego Korearen arteko lankidetza sendotu du berrikuntzan eta digitalizazioan
Hego Koreako ordezkaritza instituzional bat Euskadin izan da aste honetan, Knowledge Sharing Program (KSP) Basque P5G Master Plan-aren esparruan. Azken urtean Eusko Jaurlaritzaren eta Koreako Errepublikako Gobernuaren artean garatutako nazioarteko lankidetza programa da, Koreako Merkataritza eta Inbertsioa Sustatzeko Agentziaren (KOTRA) laguntzarekin. Proiektuaren helburua 5G sare pribatuen hedapenari buruzko ezagutzak eta esperientziak partekatzea izan da, euskal industrian aplikatzeko aukerak eta erronkak identifikatuz.
Zehazki, programan misio ezberdinak egin dira bi lurraldeetan. Korean, teknologia horretan erreferentea den herrialdean, 5G aplikatzeko kasu praktikoak aurkeztu ziren; Euskadin, berriz, ekosistema industriala eta teknologikoa erakutsi zen, baita Eusko Jaurlaritza, SPRI taldea, Basque Trade & Investment (BasqueTrade), enpresak eta zentro teknologikoak osatzen duten lankidetza publiko-pribatuaren eredua ere. Truke horri esker, baterako lan-esparru bat ezarri da eta erakundeen arteko lankidetza indartu da.
Bilbon egindako amaiera ekitaldian, Basque Country P5G Master Plan-aren azken txostena aurkeztu da. Txostena Koreako aholkularitza-taldeak egin du, hainbat hilabetetan euskal eragileekin lan egin ondoren. Dokumentuan, Korean inspiratutako eta Euskadira egokitu daitezkeen politika publikoei eta gobernantza-ereduei buruzko gomendioak, 5Ga ETEetara, sektore estrategikoetara eta tokiko komunitateetara iristea errazteko proposamenak eta teknologia horrek industriarentzat dituen onura ekonomikoen eta lehiakortasunaren azterketa jasotzen dira.
Jardunaldian bi gobernuetako eta BasqueTrade-ko ordezkariek parte hartu dute. Korearen aldetik, Chang Huh, Euskadiko KSP programaren aholkulari nagusi eta arduraduna; Ji Won Lee, KOTRAren zuzendariordea Seulgo egoitza nagusian; KOTRAren Madrilgo bulegoko ordezkariak; eta NCL eta SK O&Sren ikerketa-taldea, txostena egiteaz arduratzen dena, izan dira.
Euskadiren ordezkari gisa, Jaione Ganzarain Teknologia, Berrikuntza eta Eraldaketa Digitaleko sailburuordeak, Elixabete Garcia Caballero Eraldaketa Digitaleko zuzendariak eta Nagore Bonilla BasqueTrade-ko zuzendari nagusiak parte hartu dute, nazioartekotze agentziako eta SPRI Taldeko ordezkariekin batera.
