Lehendakariak konpromiso eta bizkortasun handiagoa eskatu die Europari eta Estatuari, euskal altzairuaren etorkizuna bermatzeko
Imanol Pradales Lehendakariak ‘Steel Tech 2025, Congress & Expo’ inauguratu du, gaur goizean. Siderurgiaren industrian erreferentziazko nazioarteko topaketa da, eta, Bilbao Exhibition Centre-en (BEC), hiru egunez, lider globalak, puntako enpresak eta sektoreko adituak bilduko ditu.
Bere hitzaldian, Euskadin eta Europan altzairuaren industriaren etorkizuna bermatzeko, erantzukizun partekatua ematea eta ekintza politiko eta ekonomikoak bizkor abiaraztea eskatu du Pradalesek.
“Euskadin badihardugu, baina hori ez da nahikoa. Besteek ere jardun egin behar dute. Estatuak eta Europako Batzordeak konpromiso handiagoa erakustea eta azkar jardutea behar-beharrezkoa dugu”, adierazi du Lehendakariak, eta azpimarratu du Eusko Jaurlaritzak sektorearen aldarrikapenak babesten jarraituko duela “bilera eta lantalde guztietan”.
Pradalesek gogorarazi duenez, altzairua euskal manufaktura-industriaren sektore estrategikoa da, trakzio-lana egiten du, eta haren menpe daude milaka enplegu eta gure Herriaren aberastasunaren zati handi bat.
“Planak aspalditik zehaztuta daude. Orain ahalik eta azkarren gauzatu behar dira. Europako altzairuaren sektorea babesteko erabakiak hartzeko unea da. Jokoan ditugu milaka lanpostu, aberastasuna eta Euskadiko manufaktura-industriaren trakzio-jarduera baten bideragarritasuna”, nabarmendu du.
Lehendakariak, halaber, joan den urtarrilean Europako Batzordeko lehendakariorde exekutibo Stephane Séjourné-rekin izandako bilera aipatu du. Azken horrek “Europako altzairu subirano eta deskarbonizatu baterako bidea eraikitzen jarraitzeak berebiziko garrantzia duela” azpimarratu berri du.
Steel Tech 2025, berrikuntza eta ezagutza siderurgikoaren topagunea
Altzairuaren industriaren barruan, berrikuntzarako, ezagutzarako eta negozio-aukeretarako plataforma estrategiko gisa finkatu da Steel Tech, eta Siderex – Siderurgiako Kluster Elkarteak eta Bilbao Exhibition Centre-ek (BEC) antolatzen dute, UNESIDen laguntzarekin.
Urriaren 21etik 23ra, kongresu eta erakusketa honek aterpea eskainiko die hainbat hitzaldi, erakusketa eta networking-guneri; horri esker, erabateko elkartrukeak gauzatuko dira puntako konpainien, nazioarteko espezialisten eta balio-kate osoaren eragileen artean.
Siderurgiaren sektoreak pisu erabakigarria du Euskadiko eta nazioarteko ekonomian. Euskadik ehun enpresa baino gehiago ditu balio-kate osoaren barruan, eta altzairua ekoizten duten 11 lantegi, zeintzuek Europako sailkapenean 12. postuan kokatzen baitute erkidegoa, Espainiako Estatuko ekoizpen osoaren % 39 EAEn produzitzen delarik.
Era berean, industria-ehuna hain dibertsifikatuta egoteak siderurgia-produktuen barne-eskaria indartzen du, izan ere, bertan hainbat sektore estrategiko daude, hala nola automobilgintza, energia, ontzigintza, trenbideak, makina-erreminta, petrokimika, ondasun ekipoak, eraikuntza eta etxetresna elektrikoak.
Irekiera ekitaldiaren ondoren, Lehendakariak, hainbat erakunde eta enpresatako ordezkariekin batera, ‘Steel Tech 2025’eko erakusmahaiak zeharkatu ditu, eta bertatik bertara ezagutu ditu altzairuaren etorkizuna markatuko duten berrikuntza teknologikoak eta proiektuak.
SPRI Taldeko Basque Trade & Investment-ek (BasqueTrade), Siderex-ekin lankidetzan, euskal industria-sarea nazioartekotzera bideratutako agenda bat sustatu du, B2B bileren antolaketan arreta berezia jarriz.
Nazioarteko erosleak eta erabakiak hartzen dituzten arduradunak erakartzeko helburuarekin, BasqueTrade-k SteelTech-en edizio honetan Polonia, Txekiar Errepublika, Eslovakia, Erresuma Batua eta Kolonbia bezalako herrialdeekin elkarlanerako aukerak identifikatzen lan egin du. Kudeaketa horien ondorioz, Kolonbiako ordezkaritza batek, hiru altzairutegik eta Kolonbiako Enpresaburuen Elkarte Nazionaleko (ANDI) ordezkariek osatuta, ekitaldian parte hartu du. Elkarte hori herrialdeko industria-erakunde nagusietako bat da.
Ordezkaritza horrek B2B gisako 40 bilera baino gehiago egin ditu siderurgia-sektorerako ekipoak eta soluzioak hornitzen dituzten euskal enpresekin, eta, hala, Kolonbiaren eta Euskadiren arteko merkataritza-loturak eta lankidetza-aukerak indartu ditu.
Halaber, altzairutegietako eta zentro teknologikoetako Alemaniako bost profesionalek SteelTech bisitatu dute, ekitaldiaren azoka-eskaintza bertatik bertara ezagutzeko eta biltzar teknikoko saio batzuetan parte hartzeko.
