Eusko Jaurlaritzak nazioartekotzea bultzatu du 9,5 milioi euroko laguntzen bidez
Eusko Jaurlaritzak nazioartekotzea bultzatzen du SPRI Taldearen Basque Trade & Investment laguntzen hiru programaren bidez, guztira 9,5 milioi euro. Zabaldu, Sakondu eta Elkartu ekimenak dira, euskal enpresei kanpora ateratzeko lehen urratsetan laguntzen dietenak, dagoeneko nazioartekotuta daudenak indartzen dituztenak edo atzerrian lankidetza eta enpresa aliantza sustatzen dituztenak.
Horiei duela hiru hilabete irekitako Nazioarteko Gauzatu programa gehitu behar zaie, euskal enpresei nazioartekotzeko estrategiak garatzeko aukera ematen diena, behar diren inbertsioei ekiteko baliabideekin eta finantzaketarekin hornituz. Interesik gabeko kredituak eskaintzen ditu, milioi bat euro artekoak, atzerrian instalazioak ireki, handitu edo berritzeko. Laguntza eskatzeko epea urriaren 31n amaituko da.
Nazioartekotzea, Industria Planaren lehentasun estrategikoa
Industria Planaren arabera, nazioartekotzea da Industria gehiago lortzeko lehentasun estrategikoetako bat, hau da, Euskadiren produkzio-oinarria indartzea lehia geoestrategikoak, balio-kateen berrantolaketak eta funtsezko industria-sektoreetan autonomia lortzeko presio gero eta handiagoak markatutako mundu honetan.
Industriak euskal ekonomian duen pisua handitu nahi da, ez soilik kuantitatiboki — inbertsio, enplegu eta esportatzeko gaitasun gehiago —, baita kualitatiboki ere: enpresa dimentsio handiagoa, atzerriko inbertsioa erakartzea, nazioartekotzea eta inpaktu handiko industria proiektu berriak.
Horri gehitu behar zaio industriaren eta errotzearen aldeko apustu argia, bai enpresa traktoreena, bai ETE-ena.
Ardatz honen helburu estrategikoak bat datoz autonomia estrategiko irekiko Europako politikarekin eta lehiakortasunaren iparrorratzarekin, hala nola enpresa sarea indartzearekin, balio-kate erresilienteetan integratzearekin eta sektore kritikoetan inbertsioa erakartzeko gaitasunarekin. Horrela, euskal industria sendoagoa, konektatuagoa, anbiziotsuagoa eta berrindustrializazio jasangarriaren Europako dinamikan integratuagoa sustatzen da.
Hala, Planak adierazten du beharrezkoa dela gure enpresen nazioartekotzea sendotzea merkatu estrategikoetan.
Euskadik esportazio-tradizio sendoa du, baina nazioartekotzeko estrategia egituratuagoa eta dibertsifikatuagoa sendotu behar du. Lehentasun horren helburua da enpresen barne-gaitasunak indartzea merkatu globaletan jarduteko, partzuergo esportatzaileak sustatzeko eta balio-kate globaletarako sarbidea errazteko.
Europa mailan, barne-merkatua indartzearekin batera, merkataritza-estrategia ireki, baina orekatuago bat dago, non Europako enpresak bidezko baldintzetan kanpo-merkatuetan sartzea sustatzen den. Lehentasun horrek bat egiten du Europako industriaren presentzia globala indartzeko helburuekin, ETEak nazioarteko merkataritzan integratzea barne.
Hiru programak
Zabaldu programak nazioartekotze prozesuan lehen urratsak emateko aukera ematen du, enpresa bakoitzeko 75.000 laguntza arte emanez. Aurrekontua, guztira, bost milioi eurokoa da, eta eskaerak egiteko epea azaroaren 10ean amaituko da. Enpresek dirulaguntzak jasotzen dituzte aholkularitzarako, talentua erakartzeko, logistikarako eta erosketetarako, sustapenerako, edo azoka eta bidaietara joateko.
Sakondu programa oso nazioartekotuta dauden konpainiei zuzentzen zaie, atzerriko merkatu berrietan duten posizioa indartzeko. Aurrekontua 3,5 milioi eurokoa da guztira, eta laguntzak 75.000 eurokoak dira enpresa bakoitzeko. Eskaerak egiteko epea azaroaren 10era arte egongo da zabalik. Laguntzak nazioartekotze-estrategia bat prestatzera, azoketara joatera, komunikazio-ekintzetara, talentua sartzera edo bideragarritasun-azterketetara bideratzen dira.
Elkartu programak nazioartekotzearekin lotutako proiektuetan enpresa-lankidetza eta aliantzak babestea du helburu. Aurrekontua milioi bat eurokoa da eta eskaerak aurkezteko epea azaroaren 17ra arte egongo da zabalik.
