B.lux diseinu garaikideko luminarien fabrikatzaileak Ekialde Ertaina argiztatzearen aldeko apustua egiten du
B.lux, diseinu garaikideko luminariak egiten dituen enpresa bizkaitarrak, ia mende erdiko esperientzia duenak, katalogo berri bat kaleratu berri du. Katalogo horretan, zazpi bildumako hemezortzi modelo berri sartu ditu, eta horien artean nabarmentzekoa da ‘Solid’ bilduma. “Bilduma hau eskuragarri dago bai barruko bai kanpoko bertsio apaingarrietan”, nabarmendu du Iratxe Muñozek, B.lux enpresako marketin-zuzendariak.
Euskal enpresak hiru negozio-ildo ditu: dekorazio-argiztapena, argiztapen arkitektonikoa eta kanpo-argiztapena. Gaur egun, 140 modelo desberdin baino gehiago fabrikatzen ditu, eta argiztapen, diseinu, arkitektura eta interiorismo sektoreetarako lan egiten du.
“Fabrikatzaileen rola oso garrantzitsua da, luminaria baten garapen osoa hasieratik bukaeraraino kontrolatzeko aukera ematen baitigu”, nabarmendu du konpainiako ordezkariak. Hala, “diseinu- eta planteamendu-prozesutik, fabrikazio-xehetasun guztiak eta gure fabrikatik irteten den unera arte” kontrolatzen ditu, zerrendatzen du.
Euskal konpainiak mundu osoko 40 herrialdetan baino gehiagotan banatzen ditu bere argiak, eta zortzi showroom ditu Espainian, Erresuma Batuan, Alemanian, Frantzian eta Filipinetan. “Alemania eta Estatu Batuak merkatu garrantzitsuak dira. Eta Ekialde Ertaina da gaur egun apustu nagusia”, aurreratu du Iratxe Muñozek.
Zero kilometroko proiektuak
Luminaria fabrikatzailea denez, Bizkaiko enpresak “pertsonalizatzeko gaitasun handia du, bai akaberei, koloreei, neurriei edo aplikazioei dagokienez”, adierazi du Muñozek. Argiak ere sortzen ditu “hutsetik hasita, proiektu espezifikoetarako, arkitektoaren edo interioristaren eskutik, hau da, zero kilometroko proiektu bat”, aitortzen du eta proiektu enblematikoak aipatzen ditu, hala nola Frank Gehryren Marqués de Riscal upeltegia; Ilmiodesigneko Canfranc Royal Hideaway hotela; Zaha Hadiden Zubi Pabiloia; edo San Mameseko estadioa.
Euskal enpresak berrikuntzaren eta diseinuaren aldeko apustua egin du 1979tik, “diseinuaren kontzeptua Euskadin oraindik oso presente ez zegoenean”, gogoratu du. Konpainiak 35 langile ditu, eta “tokiko fabrikazioaren eta diseinuaren alde egiten jarraitzea elementu bereizgarri gisa” du helburu, ziurtatu duenez.
Euskal enpresen nazioarteko proiektuak bultzatzea da SPRI Taldearen helburuetako bat; izan ere, Basque Trade and Investment Nazioartekotzeko Euskal Agentziaren bidez, leihatila bakarraren bidez bere baliabide eta laguntza guztiak jartzen ditu enpresen eskura, adibidez Elkartu, Gauzatu edo BEINT eta Global Training Bekak.
SPRI Taldeak aukera ematen die euskal enpresei haien jardueraren berri emateko bere informazio-kanaletan. Zure proiektua gure gaiekin lotuta badago (I+G+b, digitalizazioa, internazionalizazioa, ekintzailetza, berrikuntza…), Zutaz mintzo gara ekimenean parte har dezakezu.
