Reiner Medicalek doitasun handiko plastiko teknikoak fabrikatzen ditu medikuntza-sektorerako
Reiner Medical Reiner Taldeko dibisio bat da, Deban (Gipuzkoa) kokatua. Osasun-sektorerako osagai plastiko teknikoak garatzen eta fabrikatzen ditu, eta, zehazki, gailu medikoetarako, ospitale-ekipamendurako edo osasun-soluzioetarako doitasun handiko piezak ekoizten ditu. Gaur egun 12 langile ditu.
Medikuntza-dibisioa 2008an sortu zen, eta apustu handia egin du I+G+Baren alde, prozesu guztietan aplikatuta: diseinu industrialean, materialetan, barne-prozesuetan, kalitate-kontrolean edo jasangarritasunean. Estatuko nahiz nazioarteko bezeroekin etengabeko lankidetza mantentzen da prozesu horretan, eta horrek aukera ematen du soluzioak egokitzeko, prototipoak garatzeko eta ekoizpena etengabe optimizatzeko.
Arlo honetan, Reiner Medicalek SPRI Taldeak bultzatutako programen laguntza jaso du, besteak beste, Industria 4.0, Barnekintzaile, Hazitek edo Gauzatu . Ekimen horiei esker, enpresak proiektu estrategikoak azkartu eta funtsezko gaitasun teknikoak finkatu ahal izan ditu, eta, hala, hazkunde lehiakor eta jasangarria sustatu. Gainera, taldearen barruan Reiner Lab sortu berri dute, “metodologia, tresna eta ikuspegi berriak aztertzeko gunea, antolaketa kultura eraldatzeko, sormena bultzatzeko eta enpresa eta taldeetan aldaketa prozesuetan laguntzeko”, azaldu dute taldeko arduradunek.
Reiner Taldeak 110 langile ditu eta aurten bere mendeurrena ospatu du, 24 milioi euroko fakturazioa du urtero. Deban duen egoitza nagusiaz gain, Polonian eta Mexikon ere baditu dibisioak.
Etorkizunari begira, dibisioak helburu hauek ditu: osasun-sektorean haztea, nazioarteko bezero-sarea handitzea eta dibisioak osasun-aplikazioetarako osagai plastiko teknikoetan erreferentziazko hornitzaile gisa duen posizioa sendotzea. “Jasangarritasuna, eraginkortasuna eta berrikuntza izango dira garatzeko ardatz nagusiak”, adierazi dute taldetik.
Euskal enpresen artean berrikuntza bultzatzeko, enpresa txiki eta ertainetatik konpainia handietaraino, SPRI Taldeak Hazinnova, BDHI Konexio edo Innobideak bezalako berrikuntzarako programak eta laguntzak ditu.
SPRI Taldeak aukera ematen die euskal enpresei haien jardueraren berri emateko bere informazio-kanaletan. Zure proiektua gure gaiekin lotuta badago (I+G+b, digitalizazioa, internazionalizazioa, ekintzailetza, berrikuntza…), Zutaz mintzo gara ekimenean parte har dezakezu.
