Euskadik “industria gehiagoren, industria hobearen eta isuri gutxiagoren aldeko apustua” berretsi du, Hidrogeno Sare Tronkala zabalduta
Imanol Pradales Lehendakariak eredu ekonomikoa eta garapenaren euskal eredua ahalik eta azkarren deskarbonizatu behar direla adierazi du, hori bai, lehiakortasunik galdu gabe, “jokoan baititugu gure enplegua, kohesio soziala, aurrerapen teknologikoa eta ingurumenaren oreka”, bai eta “gure autonomia estrategikoa” ere.
Imanol Pradalesekin batera, Enagásek Bilboko Portuan eskainitako Euskadiko Hidrogeno Sare Tronkalaren aurkezpenera Mikel Jauregi Industria, Trantsizio Energetiko eta Jasangarritasuneko sailburua bertaratu da.
Bere aurkezpenean, Lehendakariak gogora ekarri du Euskadi urratsak ematen ari dela eraldaketaren abangoardian kokatzeko, eta aditzera eman duenez “Euskadiren apustu estrategikoetako bat da hidrogenoaren balio-katea garatzea”.
“Egitasmo hau erabat lerrokatuta dago lehentasun honekin, izan ere, 163 kilometroko hodi-sarea eskaintzen du, Euskadiko industria-polo nagusiak hidrogenoaren ekoizle-guneekin lotzeko. Sare honek gaur egungo azpiegituren sinergiak baliatzen ditu, eta, horretaz gain, etorriko diren beste proiektu batzuekin elkartzea ere aurreikusten da, adibidez, Aiarako Haranarekin edo Bergara-Irun hodiarekin”, nabarmendu du Lehendakariak.
Zentzu honetan, Eusko Jaurlaritzak Energiaren Euskal Erakundearen bitartez sare hau garatzen aktiboki parte hartzeko asmo irmoa du, Imanol Pradalesek berretsi duenez. Industria, Trantsizio Energetiko eta Jasangarritasuneko sailburuak ere Jaurlaritzaren xede hau azpimarratu du, eta, nabarmendu duenez, “energia-iturri hau garatuta, energia eraldaketaren alorrean Europako liderren artean kokatuko da gure herria”.
Mikel Jauregik, berriz, hidrogeno sare berria Eusko Jaurlaritzaren 2030eko Industria Planarekin eta Europako estrategiekin ezin hobeto ezkontzen dela nabarmendu du. Egitasmo honek abangoardiako energia azpiegitura berriak garatzen laguntzen du, horrela, 2050erako zero emisio garbi izateko helburua betetzeko. Era berean, hornidura berme handiagoa eskaintzen du, eta horrek Euskadiren energia-burujabetasuna hobetzen du.
“Hidrogeno sare tronkal hau urrats bat gehiago da Euskadi industria eta energia deskabornizatzeko. Azpiegitura berri honek erreferente gisa kokatzen gaitu Europan. Deskarbonizazio adimendunean sinesten dugu, trantsizio energetikoaren alde hobetzen jarraitzeko eta lehiakortasunean irabazteko; mix energetiko batekin, elektrifikazioa ekarriko duena, eta baita beste teknologia garbi batzuk ere, esaterako, hidrogeno berdea. Eusko Jaurlaritza eraldaketa honi laguntzeko hainbat egitasmotan parte hartzen ari da, betiere industriarekin eta teknologia-guneekin elkarlanean, gure gaitasunak nabarmenduz”, ziurtatu du Jauregi sailburuak.
Egitasmo eraldatzaileak abian
Eusko Jaurlaritzak onartutako 2030 Euskadi Industria Plana erabat lerrokatuta dago Europako lehentasun estrategikoekin: berrikuntza, deskarbonizazioa eta estrategia burujabetza, horrela, kontinentearen berrindustrializazio-prozesuari laguntzeko. Euskadi teknologia eta industria erreferente gisa kokatu da, Europako Batzordeak ere aitortu du hori.
Hidrogenoaren ekonomia garatzeak deskarbonizazioarekin batera erregai berriztagarrien inguruan industria berria sortzeko aukera eskaintzen du. Abagune honi esker, gainera, Euskadiren ongizatea hobetzen jarraitzeko ekonomia-, enplegu- eta baliabide-jarduera berriak sortuko dira.
Hidrogenoa eta erregai berriztagarriak garatzeko apustu honek leku estrategikoa dauka 2030eko Euskadiko Industria Planean, ildo beretik, Deskarbonizazioaren Harana, Erregai Berriztagarrien Huba eta gisa horretako egitasmoak bultzatuko dira.
Deskarbonizazioaren Harana proiektuak trantsizio energetikoaren erreferente bihurtuko du Euskadi, inbertsioak erakarriko dira, berrikuntza sustatuko da, eta enplegu-aukera berriak sortuko dira balio erantsi handiko hainbat eta hainbat sektoretan, Hidrogenoa eta Erregai Berriztagarriak ardatz hartuta.
Apustu honen barruan, energia azpiegitura batzuk eraldatzeko gogoeta zabal-zabalik dago, helburua izanik deskarbonizazioari laguntzea. Horixe da, adibidez, Bilboko Portuan dagoen BBE (Bahía de Bizkaia Electricidad) lantegiaren kasua.
Une honetan, energia ekoizteko erregai gisa gasa erabiltzen du BBE lantegiak. Hidrogenoaren azpiegitura berriak atea irekitzen dio hidrogeno berdeak gasa ordezkatzeari, horrek Euskadiko isuriak murriztuko ditu, eta 2050eko zero emisioen helburuetara gerturatzen lagunduko du.
Egitasmo eraldatzaile honen barruan beste jarduera nabarmen batzuk abiaraziko dira, besteak beste, Europar Batasunean bereziki garrantzitsutzat, alegia, PCI (Project Common Interest) egitasmotzat jotzen diren hidrogeno azpiegituren sare tronkala garatzea, distribuzio sareen bidezko ezarpena, elektrolizatzaileen bitartez hidrogenoaren sorrera garatzea eta CO2-sare eta -biltegia zabaltzea.
Beste alde batetik, Erregai Berriztagarrien Hubari azkena ematen ari zaio, hain justu ere, industria polo teknologiko bat sortuko da hidrogenoaren eta erregai berriztagarrien inguruan.
Elkarrekin lotuta dauden egitasmo hauei dagokienez, Jauregik adierazi duenez, “gure xedea da emisioak murriztea eta gaur urrats bat gehiago eman dugu. Hidrogenoaren Sare Tronkala osagai garrantzitsua da Jaurlaritzan diseinatu dugun energia trantsizioaren hezurduraren barruan. Deskarbonizazio adimendunari esker, gure industria lehiakorragoa izango da, eta pauso sendoak eman ahalko ditugu 2050ean zero isuri garbi izateko helbururantz”.
