Ciclogreenek laneko mugikortasunaren inpaktua murrizteko irtenbideak garatzen ditu
Hamar urte baino gehiagoko esperientzia du Ciclogreen plataformak Mugikortasun Jasangarriko Planak diseinatzen eta ezartzen. Haren proposamenak aholkularitza, teknologia eta pizgarri-sistema uztartzen ditu, lanera joateko ohiturak aldatzen lagunduz. “Gure helburua da enpresei laguntzea beren langileen eguneroko mugikortasunari lotutako emisioak murrizten, modu erraz eta neurgarrian, eta araudiarekin bat eginez”, azaldu du Gregorio Magno Ciclogreen-eko zuzendari nagusi eta sortzaileak.
12 profesionalek osatutako lantaldearekin, enpresak hainbat sektoretako erakundeekin egiten du lan, besteak beste, Grupo ULMA, Grupo Fagor, BBVA, Batz edo Danobatgroup, Mugikortasun Iraunkorraren Lege berriaren eskakizunei aurrea hartzeko. Plataformak auto partekatu korporatiboa eta beste garraiobide jasangarri batzuk sustatzen ditu, hala nola mugikortasun aktiboa, garraio publikoa edo ibilgailu elektrikoa, gamifikazioan eta denbora errealeko jarraipen-sistemetan oinarrituta.
Lege-esparru berri bat, ‘carpooling’aren zeregina indartzen duena
‘Carpooling’ korporatiboari esker, langileek ibilgailua parteka dezakete lantokirako joan-etorrietan. Mugikortasun Jasangarriaren Lege berria indarrean sartzeak aldaketa nabarmena ekarri dio enpresa-sareari, lan-zentro jakin batzuk 24 hilabeteko epean Mugikortasun Plan bat izatera eta segimendu- eta zigor-mekanismoak ezartzera behartzen dituena. Hori dela eta, Ciclogreen-ek % 20ko deskontuaren eskaintza berezia egin du otsailaren amaierara arte, araudi berri hori betetzeko planaren diseinua eta inplementazioa aktibatu nahi duten enpresentzat. Horrez gain, auto partekatua garraio pribatu partikular gisa onartzen du araudiak lehen aldiz. “Legezko aintzatespen honek ‘carpooling’ delakoa indartu egiten du, funtsezko tresna baita emisioak murrizteko, pertsonen ongizatea hobetzeko eta mugikortasun korporatibo eraginkorrago baterantz aurrera egiteko”, adierazi du Magnok.
Testuinguru honetan, Ciclogreen-en azken mugarrietako bat ‘carpooling’ korporatiboari lotutako Energia Aurrezkiaren Ziurtagiriak sortzeko plataforma ziurtatu bihurtzea izan da. Sistema honek aukera ematen die enpresei lanera joateko joan-etorrietan autoa partekatzeak dakarren energia-aurrezkia monetizatzeko. “Ziurtatutako bitartekari gisa jarduten dugu, energia-aurrezpena neurtzen dugu eta prozesu osoa kudeatzen dugu, enpresek arreta jar dezaten beren planaren ezarpenean”, erantsi du CEOak.
SPRIk bultzatutako BIND programan parte hartzen du Ciclogreenek, eta tresna berrien garapena bizkortuko duten berrikuntza-ekimenetan laguntzen jarraitzea aurreikusten du. Datozen urteetara begira, konpainiak helburutzat hartu du mugikortasun jasangarriaren arloan erreferentziazko irtenbide gisa finkatzea estatu-mailako enpresentzat, arreta berezia jarriz ‘carpooling’ korporatiboan eta ingurumenean eta erakundean duen eragin positiboan.
SPRI Taldea RIS 3 Euskadi estrategia abian jartzen duen eragileetako bat da, energiaren, fabrikazio aurreratuaren, bio-osasunaren eta nanozientziaren arloetan espezializazio adimenduna bultzatzeko.
SPRI Taldeak aukera ematen die euskal enpresei haien jardueraren berri emateko bere informazio-kanaletan. Zure proiektua gure gaiekin lotuta badago (I+G+b, digitalizazioa, internazionalizazioa, ekintzailetza, berrikuntza…), Zutaz mintzo gara ekimenean parte har dezakezu.
