Machine Learning arloko Europako kongresu garrantzitsuena Euskadin egingo da 2021ean
BCAM eta UPV/EHU aukeratuak izan dira ECML/PKDD topaketa antolatzeko
Bilbon egingo da Ikaskuntza Automatikoari eta Datuen Meatzaritzari buruzko Europako Konferentzia, 2021eko irailaren 13tik 17ra. Hogei ediziotik gorako ibilbidea duen topaketa hori Europako hitzordu garrantzitsuena da ikaskuntza automatikoari buruzko ikerketaren arloan. Basque Center for Applied Mathematics – BCAM eta Euskal Herriko Unibertsitatea izango dira ekitaldiaren antolatzaileak, kongresuko epaimahaiak beren proposamena aukeratu baitu nazioarteko hautagaitza guztien artean.
Topaketa bost egunekoa izango da eta, aurreikuspenen arabera, 600dik gora pertsona bilduko dira, horrek Euskadiren posizioa indartuko duelarik Adimen Artifizialaren arloko nazioarteko erreferentzia gisa. Konferentzian entzungai izango dira machine learning eta datuen meatzaritza arloetako ikertzaile garrantzitsuenen hitzaldiak, zeintzuek teknologia horiei buruzko azken aurrerapenak azalduko baitituzte.
José A. Lozanok, BCAMeko zientzia zuzendariak eta UPV/EHUko Konputazio Zientzien eta Adimen Artifizialaren saileko katedradunak, zuzenduko du ECML/PKDD 2021 ekitaldiaren antolakuntza batzordea. Bere lantaldean egongo dira, besteak beste, Nuria Oliver (Gizarte eta Komunikaziorako Vodafone Institutuko kolaboratzailea), Fernando Pérez-Cruz (Swiss Data Science Center), Stefan Kramer (Mainz-eko Johannes Gutenberg Unibertsitatea) eta Jesse Read (Frantziako École Polytechnique Ingeniari Eskolako kidea).
BCAM matematika aplikatuen ikerketa-zentro bat da, zeinaren helburu nagusia baita ezagutza transferitzea enpresa, gizarte eta ikerketa arloetako beste sektore batzuetara. Eusko Jaurlaritzak, UPV/EHUk eta Ikerbasque-k sortu zuten zentro hori 2008an, Bizkaiko Foru Aldundiaren eta Innobasque-ren laguntzarekin, eta Zientzia eta Teknologiaren Euskal Sareko kidea da.
