Eralki Engineeringek bibrazio-makineriaren diseinuan, fabrikazioan eta ezarpenean oinarritutako industria-eredua sendotu du
2014an Hernanin sortu zenetik, Eralki Engineeringek etengabeko bilakaera izan du, eta horri esker solidoen manipulaziorako bibrazio-makineriaren diseinuan, fabrikazioan eta ezarpenean espezializatutako enpresa gisa finkatu da. Duela hamarkada bat baino gehiago ekipoen diseinuan eta muntaketan oinarritutako jarduera gisa hasi zena, gaur egun prozesuen integrazio osoa egiten duen negozio-eredu bihurtu da, barne-fabrikazioa ardatz estrategiko bezala hartuta. Hala, kalitatea bermatzen, kostuen eta entrega-epeen kontrola hobetzen eta proiektuen errentagarritasuna handitzen du. “Prozesu guztiak integratuta izateak arinagoak izaten eta barne-baliabideak beharren arabera mugatzen lagundu digu”, azaldu du José Luis Baenak, konpainiako bazkide eta zuzendari teknikoak.
Gaur egun, enpresaren irtenbideak sektore askotan daude, besteak beste, galdaketa eta siderurgian, agregakinetan, birziklapenean, elikaduran edo industria kimikoan. Izan ere, Eralki Engineeringen balio-proposamena bibrazio-makinerian duen esperientzia espezializatua da. “Ezagutza horri esker, gure bezeroen erronkak sakon ulertu ahal ditugu solido solteak manipulatzeko orduan, hainbat sektoretan”, dio Baenak. Horrek guztiak zehaztapen tekniko eta operatibo bakoitzera egokitutako neurrira egindako irtenbideak garatzea ahalbidetzen du, prozesuak optimizatzeko eta proiektuen bizi-ziklo osoan zehar gorabeherak minimizatzeko.
Bibrazio-makineria, euskal enpresaren jardueraren ardatz nagusia, motor bereziek sortutako bibrazioen erabileran oinarritzen da, materialak modu kontrolatuan mugitu, elikatu, garraiatu, ordenatu edo dosifikatzeko aukera emanez. “Mantentze gutxi behar duten makinak dira, erabiltzeko errazak, eta hainbat osagarri izan ditzakete, hala nola babes-estalkiak, materialak bereizteko sistemak edo higadura saihesteko estaldura bereziak”, azaldu du zuzendari teknikoak.
Horregatik, eguneroko jarduera industrialean, bibrazio-makineria oso ohikoa da aplikazio askotan. Adibide bat labe-kargagailuak dira, aluminiozko txatarra modu kontrolatuan labe birakarietan sartzeko erabiltzen direnak, galdaketarako. Beste adibide arrunt bat elikagailu bibraziodunak dira, birziklatze-plantetan erabiltzen direnak, edukiontzi horitik datozen ontziak bereizketa optikoko sistemetara edo Foucault korronteen bidezko sistemetara banatzeko, aluminioa bezalako materialak automatikoki sailkatzea errazten dituena.
Testuinguru honetan, berrikuntza eta eraldaketa digitala dira enpresaren estrategiaren oinarriak. Izan ere, Eralki Engineering kudeaketa teknikoko plataformen, 3D automatizazioaren eta dokumentazio-sistemen bidez dagoeneko bere prozesuen digitalizazio integrala bultzatzen ari da. Horrela, konpainiak bezeroen beharrei aurrea hartzen die eta xehetasunezko ingeniaritza azkartzen du. Etorkizunari begira, enpresak nazioarteko partner berrien bilaketan jarri nahi du arreta, merkatu berrietan sartzeko, eta barne-prozesu batzuk digitalizatzen jarraitzeko.
Urte hauetan, SPRI Taldearen babesa funtsezkoa izan da konpainiarentzat, eta hainbat programatan parte hartu du, hala nola Industria Digitala edo Basque Trade. Gainera, Eralki Engineeringek BIND programan ere parte hartu du, A4 Radar startuparekin batera proiektu bat garatuz, RADAR teknologia erabiliz bibrazio-makinerian garraio-ahalmena neurtzeko. “Teknologia hori urte honetan zehar gure makina batzuetan txertatu ahal izatea espero dugu”, aitortu du Baenak.
SPRI Taldearen helburuetako bat euskal enpresen eraldaketa digitala da. Besteak beste, Smart Industry, BDIH Konexio, Zibersegurtasun Industriala, Enpresa Digitala edo Inplantalariak laguntza-programen bidez bultzatzen du.
SPRI Taldeak aukera ematen die euskal enpresei haien jardueraren berri emateko bere informazio-kanaletan. Zure proiektua gure gaiekin lotuta badago (I+G+b, digitalizazioa, internazionalizazioa, ekintzailetza, berrikuntza…), Zutaz mintzo gara ekimenean parte har dezakezu.
