Babestu zure enpresa zibererasoetatik Zibersegurtasun Industrialeko dirulaguntza berriei esker

Programa, aurten, Euskadiko industria-enpresei eta lotutako zerbitzuen enpresei zuzenduta dago, enpresa horien tamaina edozein dela ere

Ba al zenekien zibererasoak mehatxu handienetakoak direla euskal industriarentzat? Eraso horiek galera ekonomiko larriak eragin ditzakete, eta zure bezeroen ospea eta konfiantza kaltetu. Horregatik, funtsezkoa da zure informazioa eta zure sistemak zibersegurtasun-neurri onenekin babestea.

Hori lortzen laguntzeko, SPRIk Zibersegurtasun Industriala 2026 programa abiarazi du, euskal enpresa industrialen segurtasun informatikoa hobetzeko diru-laguntzak eta aholkularitza pertsonalizatua eskaintzen dituena. Programa honekin, zure egungo egoera aztertu eta zure beharretara egokitutako ekintza-plana proposatuko dizuten adituak izango dituzu. Horrela, zibererasoak prebenitu eta haiei erantzun ahal izango diezu, eta zure negozioaren lehiakortasuna bermatu.

Programak, gainera, indartu egiten du zibersegurtasunean onartutako estandarrak, zuzentarauak eta esparruak betetzeko joera, hala nola ISO 27001, ENS, TISAX, IEC 62443, NIS2 edo CRA, gero eta erabakigarriagoak baitira bezeroak, merkatuak eta balio-kateak eskuratzeko.

Berritasun aipagarri gisa, produktuaren zibersegurtasun-proiektuei ekiteko aukera ere ematen du laguntzak, hasi diseinu segurutik eta kodearen berrikuspenetik eta zifratzeraino, ahulezien kudeaketaraino eta produktu industrialen ebaluazio edo ziurtagirietaraino.

Zibersegurtasun Industrialeko Programak itzuli beharrik gabeko diru-laguntzak eskaintzen ditu, 100.000 €-ra arte enpresa bakoitzeko, gastu hautagarrien % 60ra arteko laguntza-intentsitatearekin. Aprobetxatu aukera hau zure enpresa arrisku zibernetikoetatik babesteko!

Zure enpresaren informazio estrategikoa babesten lagunduko dizugu

Ez utzi zure enpresa arriskuan egoten; auditatu zure enpresa eta babestu zibererasoen aurrean

Zure industria-enpresa zibererasoen eraginpean badago, sistema konektatuekin lan egiten badu, IT/OT inguruneetan lan egiten badu, produktu konektatuak garatzen baditu edo zibersegurtasun-estandarrak eta -araudiak bete behar baditu, Zibersegurtasun Industriala programak hurrengo urratsa ematen lagun diezazuke.

Laguntza honek zibersegurtasun-proiektuari lotutako aholkularitza-, ingeniaritza-, hardware- eta software-lizentzien gastuak finantzatzeko aukera ematen du. SaaS formatuko soluzioak ere aurreikusten dira, gehienez ere 12 hilabeterako, betiere diruz lagundu daitezkeen proiektuen tipologietan sartuta badaude.

Programak askotariko jarduerak hartzen ditu bere baitan: hasierako diagnostikoa, segurtasun-plan zuzendariak, ekintza-planak, aktiboen inbentarioa, arriskuen ebaluazioa, zibersegurtasunaren gobernantza, OT urruneko sarbideen segurtatzea, IT sarbideen kontrola, sare-segmentazioa, suebakiak, IDS/IPS, EDR, XDR, MDM, ZTNA, VPN, SASE, WAF, CASB, SOC, MSSP, gertakarien aurrean erantzuteko planak, negozioaren jarraitutasuna, disaster recovery, auditoretzak, ziurtapenak eta etengabeko hobekuntza.

Hona hemen zure enpresaren segurtasuna nabarmen hobetu dezaketen zenbait proiektu:

• Zure IT/OT inguruneko segurtasuna indartzea, babes-sistemak eta sare eta arkitektura seguruak integratuz.
• Ekipamendu informatikoetarako, sistema industrialetarako eta produkzio-inguruneetarako urrutiko sarbideak segurtatzea, mantentze-lanak, kontrola eta kudeaketa egiteko.
• Kanpoko erasoak simulatzea eta barneratze-testak egitea, enpresaren erantzun-gaitasuna ebaluatzeko.
• Segurtasuneko detekzio- eta monitorizazio-soluzioak edo zerbitzu kudeatuak ezartzea, jarduera susmagarriak edo baimenik gabe sartzeko saiakerak identifikatzeko.
• Gorabeherei erantzuteko planak, negozioaren jarraipen-planak eta hondamendien aurrean leheneratzeko planak garatzea.
• Egungo egoera diagnostikatzea eta zibersegurtasuna hobetzeko ekintza-plan pertsonalizatu bat egitea.
• Bezeroekiko, merkatuekiko eta hornikuntza-kateekiko harremana baldintzatzen duten zibersegurtasun-estandarrak, -direktibak eta -araudiak betetzea.
• Informazio estrategikoa edo sentikorra babestea, hala nola datuak, jabetza intelektuala, dokumentazio teknikoa edo industria-ezagutza.
• Industria-produktuen zibersegurtasuna ebaluatzea eta ziurtapenean aurrera egitea.
• Segurtasuna integratzea, diseinutik abiatuz, konektatutako produktuetan, mehatxuen analisia, kodearen berrikuspena, zifratzea, autentifikazioa eta ahultasunen kudeaketa txertatuz.
• Langileak zibersegurtasunaren arloan kontzientziatzeko ekimenak, enpresak sistemak eta informazioa babesteko langile kontzienteak eta prestatuak izan ditzan.

Zibersegurtasuna, gero eta konektatuago dagoen industria batean lehiatzeko

Eraldaketa digitalak euskal industriaren konektibitatea handitu du. Ekoizpen-sistemek, gailu konektatuek, urruneko sarbideek, plataforma digitalek eta enpresa hornitzaile eta bezeroekiko integrazioak aukera handiak eskaintzen dituzte, baina mehatxu zibernetikoen aurreko esposizioa ere handitzen dute.

Industria IoT bezalako enpresa-inguruneetan eta horiek osatzen dituzten gailuetan gabeziak daudenez, sistema horiek erasoen helburu bihurtu dira, hala nola datu-lapurreta, zerbitzu-ukatzea, gailuen blokeoa edo bahiketa eta inpaktu ziberfisikoa duten manipulazioak.

Horregatik, zibersegurtasuna ez da jada neurri tekniko gisa soilik ulertu behar. Baldintza bat da jarduerari eusteko, ospea babesteko, galera ekonomikoak saihesteko, erregulazio-betebehar berriak betetzeko eta gero eta zorrotzagoak diren balio-kateetan parte hartzen jarraitzeko.

Zibersegurtasunaren heldutasuna funtsezko baldintza bihurtu da bezero, merkatu eta hornikuntza-kate jakin batzuetara iristeko. Sektore askotan, ziurtagiriak izatea edo araudira egokitzeko prozesuetan aurrera egitea ezinbesteko baldintza da bermeekin jarduteko.

Euskal industriara bideratutako laguntza

Aurreko deialdietan, programa enpresa eta erakunde sorta zabalago bati irekita zegoen. 2026an, industria-enpresetan eta industria-produktu prozesuari lotutako zerbitzu-enpresetan oinarrituko da laguntza, baliabideak euskal industria-sarearen lehiakortasunean, erresilientzian eta segurtasunean eragin handiagoa duten proiektuetara bideratzeko.

Mugaketa horri esker, lehentasuna eman dakieke industria-enpresen proiektuei, zeinetan handiagoa izaten baita zibersegurtasuneko arauak egokitzeko, ziurtatzeko edo betetzeko beharra. Aurreko ekitaldietan, beste arlo batzuetako erakundeen parte-hartze handia zela eta, aurrekontua agortu egin zen, eta, hala, industria-enpresei behar bezala erantzun ahal izan zitzaien.

Azken deialdietan erregistratu den eskari handiak baieztatzen du zibersegurtasunak gero eta garrantzi handiagoa duela euskal enpresentzat. Azken hiru ekitaldiak kontuan hartuta, 369 eskaera erregistratu ziren 2023an, 781 2024an eta 681 2025ean. Gero eta handiagoa den behar horri erantzuteko, programak bere aurrekontua indartuko du aurten, eta 2025ean 4,5 milioi euro izatetik 2026an 14 milioi euro izatera igaroko da.

Laguntzaren intentsitatea % 60ra arte handitzearen arrazoia da zibersegurtasuneko jarduketen zati gero eta handiagoa zuzenean lege-betebeharretatik eta arauak betetzetik datorrela. Garrantzi tekniko eta ekonomiko handiagoko proiektuak dira, eta enpresa askok egin behar dituzte gero eta zorrotzagoak diren merkatuetan bermeekin jarduten jarraitzeko.

Nola jarri martxan zure enpresaren zibersegurtasunaren hobekuntza

Zure enpresa industriala bada edo industria-produktu prozesuari lotutako zerbitzuetakoa, Euskadin jarduera-zentro bat badu eta proiektuak zentro horretan eragina badu, hemen aurkez dezakezu eskaera.

Eskaerarekin batera, proiektuaren eskaintza tekniko eta ekonomikoa aurkeztu beharko da, honako informazio honekin:

• Enpresaren jarduera eta egungo egoera (teknologiari dagokionez).
• Antzemandako arazoa edo beharra eta proiektuaren helburuak.
• Egin beharreko ingeniaritza- eta/edo aholkularitza-lanen deskribapena.
• Produktuaren edo zerbitzuaren deskribapena eta sortuko diren dokumentuak.
• Hardwarean eta softwarean egindako inbertsioen deskribapena, hala badagokio, eta proiektuarekin duten lotura.
• Ezarri beharreko zibersegurtasun-irtenbidearen eta erabili beharreko teknologien azterketa zehatza.
• Aurrekontuaren banakapena, honako hauek barne: aholkularitza eta/edo ingeniaritza, lizentziak, mantentze-lanak eta hardwarea, hala badagokio.
• Ataza bakoitzeko orduen estimazioa.
• Proiektua gauzatzeko egutegia.

Gogoan izan beti egon behar duela gutxieneko aholkularitza- eta/edo ingeniaritza-lanak proiektuan. Ez dira onartuko hardwarea eta software-lizentziak erostea bakarrik jasotzen duten proiektuak.

Baliatu aukera hau zure egoera aztertuko duen, neurri egokienak definituko dituen eta zure industria-enpresaren babesa, erresilientzia operatiboa eta lehiakortasuna indartzen lagunduko dizun enpresa espezializatua izateko. Azaroaren 23an amaituko da eskaera aurkezteko epea. Babestu zure negozioa gaur bertan!