Alberdi, beti mugimenduan dagoen mekanizazioko enpresa txiki eta ertaina
Alberdi piezen mekanizazioan espezializatutako familia-enpresa da. Urtero, serie txiki edo ertainetan 5.000 pieza-erreferentzia baino gehiago eskaintzen ditu. Fabrika digitalizatzeko lanean ari da enpresa.
“Enpresa 1958an sortu zen Azkoitiko Zabale baserriko ganbaran”, aipatu du Aitzol Alberdi zuzendari nagusiak. Handik urte gutxira, nabe bat jarri zuten baserriko lurretan, industria orokorrerako pieza txikiak fabrikatzeko.
1998an, familiaren bigarren belaunaldia sartu zen zuzendaritzan. “ISO900001 atera eta baserriko lursailetan kokatuta zegoen industria-nabean jarraitu genuen, handitze-lanak eginez. Tornu handiagoak eta kontrol numerikokoak gehitu genituen”.
2017an, Alberdi gaur egun Azkoitiko Ugarte industrialdean duen kokalekura lekualdatu zen, baina industria-nabeari eutsi zion, eta galdaragintza-, artezketa- eta muntaketa-lanak egiten zituen bertan. Beste mugarri garrantzitsu bat 2020an iritsi zen. Urte hartan, pieza handiagoetan espezializatutako Mecanizados Gurrutxaga enpresa integratu zuen.
Alberdiren balioetako bat da “enpresa euskalduna garela, euskaraz bizi dena, eta dokumentazio guztia euskaraz dago; horregatik, 2024an, sekulako mugarria lortu genuen: urrezko Bikain saria eskuratu genuen gure lehen saiakeran. Indeus sareko kide ere bagara”.
Alberdik lau lan-ildo ditu: torneaketa, fresaketa, soldadura eta mota guztietako piezen muntaketa, hiru milimetroko txikienetatik hiru metrokoetara. Urtero, serie txiki edo ertainetan 5.000 pieza-erreferentzia baino gehiago eskaintzen ditu. “Pieza bateko serieetatik hasi eta 300 pieza artekoak fabrikatzen ditugu”.
Bere bezeroak historikoki energia, siderurgia, makina-erreminta, ekipo-ondasunak edo altxatze-sistemak bezalako sektoreetatik datoz. Produkzioaren % 8-10 esportazioak dira, batez ere Frantzian kokatutakoak. Gainera, bezero garrantzitsu bat dugu Suitzan”.
46 langile ditu enpresak eta fakturazioa, joan den urtean, 5,3 milioi eurokoa izan zen. “Azken urteotan, gainera, pixkanakako igoerak izan ditugu”.
Etorkizunera begira, erronkak bost ildotan laburbiltzen dira: hazkunde progresiboa, “gure bezeroak eta sektoreak” sendotzea, pertsonen garapena, teknologia berria eta hobekuntza digitala eta “gauden ingurunearekin proaktiboak izatea”.
SPRI Taldeak Euskadiko enpresei aukera ematen die bere kanaletan jardueraren berri emateko. Zure proiektua gure gaiekin (I+G+b arloa, digitalizazioa, nazioartekotzea, ekintzailetza, berrikuntza…) lotuta badago, Zutaz mintzo gara ekimenean parte har dezakezu.
