“Euskadi eraldatuz 2030” abian jarri da, Euskal Finantza Aliantzaren 1.000 milioi euroak euskadiren eraldaketa ekonomikoaren alde bideratzeko

• “Herri gisa egin behar dugu bide hori, erantzukizun indibiduala eta kolektiboa uztartuta. Publikoa eta pribatua, beti egin dugun bezalaxe” adierazi du Pradales lehendakariak
• Planaren garapena bat dator Euskadiko Industria Plan berriarekin, Euskadi Globala estrategiarekin, Zientzia, Teknologia eta Berrikuntza Planarekin eta berrikuntzarako itsasargiekin, eta, inplementazio-egutegiaren arabera, tresna gehienak 2026an zehar operatibo egotea aurreikusten da

“Gaur gure herriaren gaitasunak aktibatu eta lerrokatzen ditugu, Euskadiren eraldaketa ekonomikoan aurrera egiteko, gure lehiakortasuna bultzatzeko, gure industria defendatzeko eta kalitatezko enplegua bermatzen jarraitzeko”. Bide horretan, Imanol Pradales lehendakariak gaur goizean aurkeztu du “Euskadi Eraldatuz 2030” ekimenaren bitartez bideratuko den inbertsio-plan berria. Plan hori bat dator Euskadi 2030 Industria Planarekin, Zientzia, Teknologia eta Berrikuntza Planarekin eta Euskadi Globala estrategiarekin.

Eusko Jaurlaritzaren inbertsioen arloko bide-orri berriaren xehetasunak gaur goizean ezagutarazi dira, Noël d’Anjou Ogasun eta Finantzetako sailburuak eta Mikel Jauregi Industria, Trantsizio Energetiko eta Jasangarritasuneko sailburuak ere parte hartu duten ekitaldian. Gainera, Euskal Autonomia Erkidegoko finantza- eta inbertsio-ekosistemako ehun bat ordezkari ere izan dira ekitaldian, eta aipamen berezia egin zaie martxoan Euskal Finantza Aliantza sortzeko konpromisoa babestu zuten bederatzi erakundeei.

Aurkezpen horretan lehendakariak azaldu duenez, Euskal Autonomia Erkidegoko enpresa- eta industria-sarearen trantsizioa eta eraldaketa, finantza-tresnen bidez, bultzatuko duen ekimen hau iritsi da “erantzukizunak hartzea, indarrak batzea eta arriskatzea” eskatzen duen ziurgabetasun-testuinguruan. “Diagnostikoa dago, errezeta dago. Orain farmaziara joan behar dugu erostera. Herri gisa egin behar dugu bide hori, erantzukizun indibiduala eta kolektiboa uztartuta. Publikoa eta pribatua, beti egin dugun bezalaxe. Herri etorkizuna dago jokoan, gure seme-alaben ogibidea dago jokoan”, eman du aditzera lehendakariak.

Horrela, eta Euskal Finantza Aliantza sortzearekin hartutako konpromisoaren bidetik, Pradales lehendakariak ziurtatu duenez, “ziurgabetasunari ekintzarekin erantzuten diogu. Gaur 1.000 milioi euro aktibatu ditugu, finantza-tresna berrien bidez gure ekonomia eta industria eraldatzeko”.

Hiru helburu

Testuinguru horretan, “Euskadi Eraldatuz 2030” ekimena hiru helbururekin sortu da:

• Enpresak Euskadin errotzeko operazioetan laguntzea,
• Enpresa-hazkunderako aukerak baliatzea, inbertsio-, handitze- edo eskuratze-operazioen bidez, eta
• Kanpoko kapitala erakartzeko eta proiektu estrategikoak edo gorabidean dauden proiektuak bultzatzeko tresna eta ibilgailu mistoak sortzea.

Helburu horiek ideia nagusi bati erantzuten diote: kasuan-kasuan behar den finantzaketa eta laguntza eskura dadin erraztea.

Noël d’Anjou Ogasun eta Finantzetako sailburuak aditzera eman duenez, “Euskadi Eraldatuz 2030” ekimenaren xedea da “konfiantza, aliantzak eta etorkizunaren ikuspegi partekatua eraikitzea eta, horretarako, interes publikoak eta pribatuak uztartzea, Euskadi eraldatzera begira”. Gogorarazi du 4.000 milioi euroko finantza-potentzia mobilizatzen duela, inbertsio publikoko 1.000 M€ eta kapital pribatuko 3.000 M€, gutxienez, batuta. Horrek irismen “eraldatzailea eta estrukturala izango du; ez da puntuala edo koiunturala izango”, argitu du.

Bestalde, Mikel Jauregi Industria, Trantsizio Energetiko eta Jasangarritasuneko sailburuak “Euskadi Eraldatuz 2030” ekimena eta atzo Gobernu Kontseiluan onartutako Industria Plana lotu ditu. Jauregi sailburuak nabarmendu du Euskadi 2030 Industria Planean biltzen diren 15 lehentasun estrategikoen artean “indar berezia egiten dela enpresak bertan errotzearen alde, atzerriko inbertsioa erakartzearen alde, talentu berria garatzearen alde, emakumeak industriara erakartzearen alde, deskarbonizazioaren alde, enpresa txiki eta ertainen tamaina handitzearen alde eta gure industrian adimen artifiziala bultzatzearen alde. Plan hau erabat garatzeko, gure zientzia- eta ikerketa-zentroen inplikazio aktiboa behar da, bai eta finantza-gihar propioa aktibatzea ere, Euskal Finantza Aliantzaren bidez. Ez dago garapen industrialik kapitalizazio teknologikorik gabe”.

Amaia del Villar Finantzen Euskal Institutuko zuzendari nagusia arduratu da Inbertsio Plan hori zehazteaz. Hiru jarduketa-ardatzetan egituratu da (enpresen errotzea, eraldaketa eta industria berriaren bultzada eta gorabidean dauden sektoreak).

Aliantzaren baliabideak bideratze aldera, lau bitarteko proposatzen dira: Finantzen Euskal Institutua bera (150 M€), Finkatuz (350 M€), proiektu eraldatzaileetan zuzeneko eta zeharkako inbertsioetarako sortu berri den Indartuz funtsa (400 M€) eta arrisku-kapitaleko funtsak (100 M€), edozein tamainatako enpresek eraldaketarako tresnak izan ditzaten, finantzaketa lor dezaten eta kasuan-kasuan laguntza izan dezaten. Inbertsio pribatua erakartzeak eta beste bazkide eta erakunde batzuekin elkarlanean aritzeak “3.000 milioi gehiago erakartzeko palanka-efektua ahalbidetuko dute, efektu eraldatzailea biderkatuta”, adierazi du Del Villar zuzendari nagusiak.

“Euskadi Eraldatuz 2030” ekimenean aintzat hartzen diren tresna berriak zehaztera begira, azken hilabete hauetan lan egin da enpresa-sarean inbertitzeko beharrak identifikatzen, finantzaketa-gapak hautemango dituen finantza-tresnen eskaintzaren mapeoa egiten, eta Euskadiko testuinguruan aplika daitezkeen nazioarteko jardunbide onenetatik ikasten.

Inplementazio-egutegiaren arabera, tresna gehienak 2026an zehar operatibo egotea aurreikusten da. Finantzen Euskal Institutuko Administrazio Kontseiluak “Euskadi Eraldatuz 2030” ekimena egikaritzen dela zainduko du, talde operatibo baten eta aholku-organoen laguntzarekin.