Eusko Jaurlaritzak 32 startup eta Euskadiko 20 ETE konektatu ditu horien berrikuntza bizkortzeko
Eusko Jaurlaritzaren BIND SME programak bosgarren edizioko 32 finalistak zein diren jakitera eman du. 140 hautagaitza jaso ondoren, bertan parte hartzen duten 20 ETEek antolaketa eraginkorraren, negozioaren eta bezero digitalaren, industria adimendunaren, zibersegurtasunaren eta jasangarritasunaren eta trantsizio energetikoaren arloetan planteatutako 7 erronkei ongien erantzun dieten soluzioak hautatu dituzte.
Abenduaren 10eko goizean, ETEak eta startup finalistak aurrez aurre elkartu ziren BIC Ezkerraldean, 2026an garatuko dituzten 53 proiektu posibletan lankidetza ixteko. Hautaketa-prozesuaren fase horren emaitza otsailean emango da jakitera.
Hautaketa-prozesuan, industriaren, manufaktura aurreratuaren, zerbitzuen, elikaduraren eta energiaren sektoreetan erreferenteak diren EAEko 20 ETEk hartu dute parte: Draxton, automobilgintzarako galdaketa-enpresa; Lanik, egituretan espezializatua; Vicrila, beira-fabrikazioan diharduena; Industrias Mail, liderra tresna berezien fabrikazioan; Loramendi, erreferentziazkoa galdaketarako soluzioetan eta makinerian; GHI Hornos, aluminioaren tratamenduan diharduen enpresa; Bronymec, polimeroen banaketan eta mekanizazioan espezializatua; Loire Gestamp, liderra estanpazio-makinerian; Eralki, makineria dardarakorraren produkzioan diharduen ingeniaritza-enpresa; Composites Martiartu, pieza teknikoen diseinuan eta fabrikazioan espezializatua; Zikotz, eraikuntza-enpresa; Gistek, aseguru-etxeentzako IT sistemak garatzen dituen enpresa; Echebarria, industria-hornigaien banatzailea; AAC Acústica, akustikan eta luminikan aditua den ingeniaritza-enpresa; H2Site, erreferentziazkoa hidrogenoaren sorkuntzan eta bereizketan; Grupo Kirol, kirol-apustuetarako softwarea garatzen duen enpresa; Techlab Systems, kalitate-kontrolerako ekipamenduak eta softwarea garatzen dituen enpresa; AZ3 Oeno, upeltegientzako zerbitzuetan espezializatua; Oilasko Berriak, haragi-produktuak banatzen dituen enpresa; eta Xardexka, prestatutako platerak banatzen dituen food service-ko enpresa.
BIND SME ekimenaren helburua da euskal ETEen lehiakortasuna eta eraginkortasuna areagotzea soluzio teknologiko berritzaileekin. Eta, aldi berean, startupei merkatuan dituzten soluzioak baliozkotzen laguntzea, erreferentziako bezeroekin benetako proiektuetan lankidetzan arituz. Gainera, onura nagusien artean, startupek BINDen azelerazio-programarako sarbidea lortzen dute, mentoretzak, prestakuntza eta industriaren euskal ekosistemarekin konexioa barne.
Berrikuntza irekiko 53 proiektu berri 5. edizioan
32 startup finalistak dagoeneko hasi dira 5. edizio honetan parte hartzen duten Euskadiko 20 ETEekin hitz egiten, guztira berrikuntza irekiko 53 proiektu abian jartzeko. Finalisten artean, startupen % 75ek AA aplikatzen dute teknologia nagusi gisa euren soluzioetan, eta, ondoren, Big data, proposamenen % 28tan, eta IoT eta zibersegurtasuna, bakoitza % 22tan.
Teknologia horiekin, edizio honetarako proposatutako proiektuen helburua izango da barneko prozesuak zein logistika optimizatzea, kalitate-ikuskaritza indartzea, zibersegurtasuna areagotzea eta ingurumen-inpaktua murriztea.
Startup finalisten jatorriari dagokionez, % 40 Euskal Autonomia Erkidegokoak dira. Horietatik 3 Arabakoak dira, 6 Bizkaikoak eta 4 Gipuzkoakoak. Beste % 35 Estatuko gainerako lekuetakoak dira. Eta gainerako % 15 nazioartekoak dira, Alemania, Estatu Batuak, Peru, Portugal eta Singapurrekoak.
Hauek dira 32 startup finalistak:
- Acuratio
- Aindeep Technology Solutions
- Aiplux
- Augmented Labs
- Cibersare
- ComexSoft
- Data Value Management
- Dost
- Elevenais
- Eudan
- Fabrex
- Galde
- Greendeal
- Hupi
- iCommunity
- In2AI Intelligence
- Isso Technologies
- Jume
- Mira
- Movizzon
- Muutech Monitoring Solutions
- Ostirion
- Perseus Ciberseguridad
- PLANGPT
- Process Talks
- Querio
- Secrets Vault
- Secur0
- Siali Technologies
- Vors Control
- Xabet Digital Solutions
- Xauen.IO
Hautatzen direnek BIND berrikuntza-programan parte hartzeko aukera izango dute, eta 2026ko otsailean emango da jakitera zein diren. Programan parte hartzen duten startup gisa, mentorizazio pertsonalizatua, industriaren euskal ekosisteman murgiltzea, inbertsiogileekin konektatzea eta urteroko Demo Day ekitaldian sartzea lortuko dute. Ekitaldi horretan Eusko Jaurlaritzaren berrikuntza irekiko plataformak bizkortutako proiektuak aurkeztuko dira, eta 400 parte-hartzailetik gora izango dira.
BINDi buruz
BIND industria adimenduneko berrikuntza ireki publiko-pribatuko plataforma da, Industria, Trantsizio Energetiko eta Jasangarritasun Sailak SPRI Taldearen bidez sortua. BINDek hiru ekimen ditu: BIND Corporate, BIND SME eta BIND GovTech Euskadiko enpresak, ETEak eta sozietate publikoak mundu osoko startup disruptiboekin konektatzeko, berrikuntza-proiektuak garatzeko. Programa 2016an abian jarri zenetik 250 startup eta scaleup baino gehiago azeleratu dira eta 350 proiektu baino gehiago garatu dira, 9,6 milioi eurotik gorako fakturazioa gaindituta. Era berean, plataforma erreferentea da jada sektorean, lurraldeko enpresa-sareari eta industriaren digitalizazioari ematen dion laguntzagatik.
