Tecnaliak TramoIA Intralogistics Robots startupa sortu du, logistikako prozesu konplexuak automatizatzeko soluzio teknologiko bat
Tecnalia ikerketa eta garapen teknologikoko zentroak startup berri bat sortu du logistikaren sektorean berrikuntza sustatzeko. Startuparen izena TramoIA Intralogistics Robots da, eta adimen artifizialeko robot-soluzioak eskaintzen ditu biltegietan eta banaketa-zentroetan manipulazio- eta mugikortasun-prozesuak automatizatzeko. Basque Tek Ventures ekimenaren barruan, funts propioaren kapital-inbertsioarekin lagundu zaio startupari.
TramoIA Intralogistics Robotsen helburua da soluzio berritzaileak garatzea logistika modu seguruan optimizatzeko, eta, horretarako, funtsezko prozesuak arintzea, hala nola eskaeren prestaketa, kamioien zamalanak eta apalategietako maneiua. Bi faktoreren emaitza da: batetik, TECNALIA malgutasun industrialerako robotikaren alorreko ikerketa-lanean aritu da 15 urtez baino gehiagoz; bestetik, logistika-enpresek erreferentzia anitzeko eskaerak prestatzeko gai den robot bat behar dute biltegietarako.
Donostian du egoitza TramoIA Intralogistics Robotsek, Euskadiko Zientzia eta Teknologia Parkean. Aurtengo negozio-planaren ardatza da egungo prototipoa sektoreko enpresekin baliozkotzea; komertzializazioa, berriz, 2026an hasi nahi dute, Europako merkatuan; eta, etorkizunera begira, helburua da robota beste kontinente batzuetara ere zabaltzea.
Arrakasta-kasu berri bat da TECNALIArentzat. Izan ere, partaidetzapeko hogei bat enpresa ditu jada (2024ko abenduan), deeptech startupak den-denak. 2024an, enplegua % 83 hazi zen aurreko urtearekin alderatuta, eta 74 milioi euro fakturatu zituzten.
TramoIAk Eusko Jaurlaritzaren laguntza du, SPRI Taldearen eta Euskal Herriko Arrisku Kapitalaren Sozietate Kudeatzailearen Basque Tek Venture ekimenaren bidez. Basque Tek Ventures ekimen berri bat da, Basque Research & Technology Alliance (BRTA) elkarteari atxikitako zentroek sortutako teknologietan oinarritutako oinarri teknologikoko enpresa berriak (deeptech) sortzen laguntzeko, haiei lagun egiteko eta haietan inbertitzeko.
Ekimenak funts propio bat du (BasqueTek Ventures FCR), sortutako startup berrietan inbertitzen duena. Potentzial handiena duten aktibo teknologikoak identifikatu eta lehenesten ditu, eta laguntza ematen du errendimendu handiko lantaldeak sortzeko, konpainia abian jartzeko eta merkatura sartzeko, transferentzia teknologikorako funts horren bidez.
