PhotoKrete, hiriak hozteko morteroak garatzen dituen euskal startup-a
PhotoKrete Bilbon egoitza duen deeptech enpresa bat da, “eraikuntzaren sektorea iraultzeko” helburuarekin sortua. Bere berrikuntza nagusia egunez jarduten duen hozte erradiatibo autonomoko morteroak garatzea da; hau da, energia kontsumitu gabe inguruko tenperatura baino 10 edo 12 gradu baxuagoan egon daitezkeen materialak. Teknologia honek irtenbide eraginkor eta jasangarria eskaintzen du bero-uhartearen efektuaren aurrean, eta gainera, klimatizazioari lotutako energia-kontsumoa % 70tik gora murriztea ahalbidetzen du.
Enpresaren sorrera MIRACLE proiektu europarrean (Horizon 2020) lortutako emaitzen ondorioz izan zen eta Jorge Sánchezek gidatu zuen Materialen Fisika Zentroan (CSIC-UPV/EHU). Teknologiaren potentziala ikusita, haren negozio-eredu gisa bideragarritasuna ebaluatzeko gai izango zen talde bat osatu zen. Hasierako garapena UPV/EHUren MBAe3 masterraren barruan landu zen, eta, aldi berean, talde sustatzaileak CSICen ImpulsaT programaren babesa eskatu zuen, transferentzia teknologikoan eta garapen enpresarialean aurrera egiteko aukera emanez. Ondorioz, PhotoKrete CSICek, Nafarroako Unibertsitate Publikoak (UPNA) eta Euskal Herriko Unibertsitateak (EHU) aitortutako Oinarri Zientifikoko Enpresa gisa finkatu zen.
Klima- eta merkatu-eragina duen aukera teknologikoa
PhotoKreteren ekintzailetza bulkada aukera teknologiko argi baten, une egokiaren eta ikuspegi partekatua duen talde baten arteko lerrokadura zorrotz batean oinarritu zen. “Bagenekien esku artean zerbait berezia geneukala: klima-aldaketaren aurkako borrokan benetako ekarpena egiteko gai zen teknologia bat, eta merkatura eramateko prest zegoen talde bat”, dio María Saizek PhotoKrete-ko CEO eta zuzendari exekutiboak. “Ezin genuen aukera galdu: aurrera egiteko momentua zen”.
Gaur egun, zazpi pertsonak osatzen dute taldea, ikerketa zientifikoko eta garapen enpresarialeko profilak uztartzen dituena. Gainera, 1. arloari (Bizkaiko Foru Aldundia) eta Ekintzaile (SPRI) programari laguntza eskatu diote, produktuen industrializazioan aurrera egiteko asmoz.
PhotoKretek, gaur egun, hiru familia patentatu eskaintzen ditu, erradiazio-propietateak dituzten morteroekin, erabilera desberdinetarako diseinatuak: hiri-zoladurak; eraikinen estalkiak; kanpoko elementuak eta birgaitze energetikorako soluzioak. Gainera, enpresak dagoeneko lan egiten du eguzki-energia, biomasa eta datu-zentroetako hozte pasiboa bezalako sektoreetarako garapen espezifikoetan. Hasierako bezero-zorroan zementu-fabrikak, mortero-fabrikatzaileak, enpresa kimikoak, arkitektura-estudioak eta energia-sektoreko agenteak daude, bai maila nazionalean zein nazioartean.
Proiektu europarretan parte hartzea eta startup berritzaile gisa aitortzea
Bere ibilbidean, enpresak eragin handiko proiektu europarrak gidatu eta horietan parte hartu du, hala nola MIRACLE eta COOLCRETE (EIC Pathfinder), azken hori KU Leuven bezalako bazkideekin lankidetzan. Gainera, CSICek ImpulsaT programaren barruan 2024an hautatutako hamar ekimenetako bat izan zen. Apirilean, Rebuild 2025 – Contech Startup Forum-en Startup Onenaren Saria jaso zuen. Sari horrek, Saizen arabera, “eraikuntza-berrikuntzaren arloan erreferente emergente gisa duen posizioa indartzen du”.
Etorkizunari begira, enpresaren helburuak honako hauek dira: morteroen ekoizpena bazkide industrialekin eskalatzea, industrializazioko lehen probak arrakastaz osatzea eta finantzaketa berria lortzea, produktu-zorroa handitu eta merkatu berrietan sartzeko.
SPRI Taldeak laguntza integralaren bidez berrikuntza, ekintzailetza eta barne-ekintzailetza laguntzen ditu, ideiak merkatura modu arrakastatsuan irits daitezen. Aurrera, Basque Fondo, Bind 4.0, Ekintzaile edo Barnekintzailetza ekintzailetzarako laguntza-programen bidez egiten du hori.
SPRI Taldeak aukera ematen die euskal enpresei haien jardueraren berri emateko bere informazio-kanaletan. Zure proiektua gure gaiekin lotuta badago (I+G+b, digitalizazioa, internazionalizazioa, ekintzailetza, berrikuntza…), Zutaz mintzo gara ekimenean parte har dezakezu.
