Erbi: “Enpresa askok adimen artifiziala eskaintzen dute benetan nola aplikatu jakin gabe, eta horrek nolabaiteko mesfidantza sortzen du merkatuan”
Erbi duela urte eta erdi inguru sortu zen, hasiera batean bezeroen webguneetan erabiltzailearen esperientzia hobetzeko web-laguntzaileetan zentratuta. Hala ere, hainbat sektoretako enpresekin (besteak beste, hotelgintza, handizkako merkataritza edo higiezinen arlokoekin) izandako harreman zuzenak behar askoz sakonago bat antzematera eraman zuen taldea: barne-eraginkortasuna hobetzea. Izan ere, bere bezero-zorroa askotarikoa bada ere, guztiek ezaugarri komun bat partekatzen dute: jendaurrean lan egitea eta oraindik eskuz egiten diren prozesu operatibo, administratibo eta komertzial ugari kudeatzea.
Une horretan, Erbik bere jarduera prozesuen azterketa eta optimizaziora bideratu zuen, erakundeek egunerokoan nola lan egiten duten ulertzeko, botila-lepoak eta zeregin errepikakorrak identifikatzeko eta prozesu horiek teknologian eta adimen artifizialean oinarritutako fluxu automatizatuetan bihurtzeko. “Gaur egun adimen artifizialeko tresna asko daude, baina enpresek benetan zer egin daitekeen eta zer ez jakitea behar dute”, aitortu du Jon Garmendiak, enpresaren sortzaileetako batek eta operazio-arduradunak. Horrela, Erbik bezeroek “AAri buruz entzuten duten zarata guztia lurreratzen” laguntzen du, ezarpen-prozesu osoaz arduratuz.
Garmendiaren arabera, gaur egun “enpresa askok AA eskaintzen dute benetan nola aplikatu jakin gabe, eta horrek nolabaiteko mesfidantza sortzen du merkatuan”. Horregatik, Gipuzkoako enpresak datuaren garrantzia aldarrikatzen du, oinarritik gauzak ondo egiteko ezinbesteko baldintza gisa. “Daturik gabe ez dago adimen artifizialik”, ziurtatu du operazio-arduradunak.
Erronka horri aurre egiteko, Erbik adimen artifizialean oinarritutako prozesu-automatizazioko sistemak garatzen ditu, RPAren, machine learning ereduen eta API bidezko integrazioen konbinazioan oinarrituta. Gainera, enpresak CRM, ERP eta bestelako plataforma digitalak konektatzen ditu, datuetan oinarritutako prozesuak sortzeko, denbora errealeko analitikarekin eta erabaki-hartzea laguntzen duten sistemekin. Hori guztia operatiba eraginkorragoa eta eskalagarriagoa izan dadin, ahalik eta eskuzko esku-hartze txikienarekin.
Hori guztia enpresa bakoitzak dagoeneko erabiltzen dituen tresnen artean benetako automatizazioak diseinatu, ezarri eta integratuz egiten du, haien lan egiteko modura egokituta. “Helburua beti bera da: enpresak denbora aurreztea, akatsak murriztea eta lan-karga erritmo berean handitu gabe haztea”, ondorioztatu du Garmendiak.
Hala, etorkizunari begira, Erbik bezero berriak erakartzeko erritmo etengabea mantentzen du, eta bere zerbitzuetan interesa duen enpresa-talde handi batekin ari da lanean. Hala ere, bere gaur egungo lehentasuna ezarpen bakoitza ondo landuta egotea eta emaitza sendoak sortzea bermatzea da.
SPRI Taldeak laguntza integralaren bidez berrikuntza, ekintzailetza eta barne-ekintzailetza laguntzen ditu, ideiak merkatura modu arrakastatsuan irits daitezen. Aurrera, Basque Fondo, Bind 4.0, Ekintzaile edo Barnekintzailetza ekintzailetzarako laguntza-programen bidez egiten du hori.
SPRI Taldeak aukera ematen die euskal enpresei haien jardueraren berri emateko bere informazio-kanaletan. Zure proiektua gure gaiekin lotuta badago (I+G+b, digitalizazioa, internazionalizazioa, ekintzailetza, berrikuntza…), Zutaz mintzo gara ekimenean parte har dezakezu.
