Uraldi, lurrunaren kontrako lehen sistema automatikoa diseinatu duen ispilu teknologikoen fabrikatzailea
Uraldi Busturiako (Bizkaia) enpresa da eta LED argiztapena, Bluetooth® bozgorailuak edo ukipen-sakagailuak (besteak beste) dituzten goi-teknologiadun ispiluak fabrikatzen ditu. Lurrunaren kontrako mundu osoko lehen sistema automatikoa diseinatu du eta iaz iF Design Award sari entzutetsua jaso zuen. Enpresak SPRI Taldearen Hazinnova programaren laguntza jaso du. Programa horrek doako aholkularitza eskaintzen die ETE-ei negozioaren berrikuntzarako.
Enpresa 1978an sortu zen, kooperatiba gisa, gaur egun Ajangizeko (Bizkaia) Maier enpresaren zentro teknologikoa kokatuta dagoen tokian. Hasieran, bainugeletarako altzarien fabrikatzaile gisa eratu zen, baina laster osagarrietara bilakaera egin zuen. “80ko hamarkadan, kanpoan, Mexikon, saltzen hasi ginen. Hamarkada hartan, kanpoko diseinatzaile ospetsuekin, hala nola Dario Gagliardini edo Jorge Pensirekin, kolaborazio ugari egin zituen enpresak”, azaldu du Aitor Uribeetxebarria zuzendari gerenteak.
90eko hamarkadan, Uraldik kooperatiba izateari utzi eta lan-sozietate gisa, Diseño de Baño Disbainu izena hartu zuen, baina Uraldi marka mantendu. Egun Busturian dituen instalazioetara joan zen. “Orduan ere fabrikatzen ziren ispiluak, baina oraindik jarduera hutsala zen. 2005ean, argiztapena eta hasierako ledak gehitu ziren”.
“Sektorera beranduxeago iritsi zen” 2008ko krisiaren, eta “osagarrietan Asiatik iritsitako lehia basatiaren” ondorioz, bainugeletako osagarriak gehiago baztertu eta ispiluetan zentratu zen. “2015ean, gure produkzioaren % 90 osagarriak ziren eta, gaur egun, ehuneko hori ispiluek hartzen dute eta, gainerako % 10a, aldiz, osagarriek”.
Uraldiren lehiakortasuna neurrira eta pertsonalizatuta egindako ispiluak eskaintzean oinarritzen da. “Txinako produktua, batez ere, neurri estandarretan da eta ez dituzte serie laburrak fabrikatzen prezio lehiakorretan”.
Produktuak ispilu teknologikoak dira; hau da, LED argiztapena, lurrun kontrako sistemak, Bluetooth® bozgorailuak edo ukipen-sakagailuak gehitzen dituzte. Osagarrien gama txikia dute: hala nola toalla-euskarriak, bilkari-euskarria, xaboi-ontziak eta dosifikagailuak. “Fabrikatzaileak gara, eta hor sartuta daude produktuaren diseinua eta amaierako entrega”.
Bezeroak habitatekoak (etxeko atala, azalera handien eta denden bidez) eta “hospitality” izenekokoak (batez ere hotelak) dira. “Eta gero, preskriptoreak ditugu; hau da, bi sektoreetarako lan egiten duten dekoratzaileak, arkitektoak edo barne-diseinatzaileak”.
Lortutako arrakasta agerian geratu zen iaz Cassiopeia izeneko modeloko ispiluari esker, iF Design Award lsaria eskuratu baitzuen. “Produktuaren diseinuan prestigio handiena duen sarietako bat da, Alemaniakoa, eta hainbat diziplina biltzen ditu. Hala, bainugelen kategorian izan ginen irabazleak. Getxoko Muka Design Lab diseinu-estudioaren eskutik aurkeztu ginen. Izan ere, artelan bat inspirazio-iturritzat hartuta, ispilu berezi hau sortu zuten.
Gainera, ispiluetarako mundu osoan parekorik ez duen lurrun kontrako sistema diseinatu du. “Automatikoki detektatzen ditu hezetasun mailak eta, algoritmoen bidez, lurrunaren kontrako plaka aktibatzen eta desaktibatzen du. Gaur egungo sistemek sakagailu baten bidez aktibatzera edo desaktibatzera behartzen dute, eta, ondorioz, sistemak denbora gehiago behar du funtzionatzeko, eta energia-kontsumoa handitu egiten da. Baina sistema honek erabiltzailearen esperientzia hobetzeaz gain, kontsumo hori gutxitzen du”. Orain gutxi eman diete Espainiako patentea.
15 langile ditu guztira eta urteko fakturazioa bi milioi euro ingurukoa da. Salmenten % 80 Espainian kontzentratzen da eta gainerako % 20a atzerrian, batez ere Alemanian eta Frantzian. Urtean 10.000 ispilu inguru fabrikatzen dituzte, ehun bat modelo ezberdinekin. “Pertsonalizazioa da gure balio bereizgarria, eta neurrira egindako produktuak dira”.
I+G arloa garrantzitsua da Uraldirentzat. “Barneko taldea dugu, berrikuntza-ideiak kudeatzeko eta haustura eragin dezaketen gaiak planteatzeko. Horietako bat da, hain zuzen ere, lurrunaren aurkako sistema automatikoa. Eta horren ondorioz, haurrentzako eta makillatzaile eta estilistentzako ispiluak atera dira katalogo berrian”.
SPRI Taldearen Hazinnova programaren laguntza produkzioaren kudeaketa hobetzera bideratu da.
Etorkizunera begira, erronka nagusiak nazioarteko hedapena handitzera zuzenduta daude: Maroko, Portugal eta Italia, adibidez. “Produktuari dagokionez, diseinatzaileekin egindako kolaborazioei esker produktuak atera nahi ditugu etengabe, eta urtero berritasunak sortu. Katalogo berrian, 30 modelo pasatxo izatetik, 100 izatera jauzi egin dugu”.
SPRI Taldeak Euskadiko enpresei aukera ematen die bere kanaletan jardueraren berri emateko. Zure proiektua gure gaiekin (I+G+b arloa, digitalizazioa, nazioartekotzea, ekintzailetza, berrikuntza…) lotuta badago, Zutaz mintzo gara ekimenean parte har dezakezu.
