Tapiak nabarmendu egin du Euskadi berrikuntza handiko eskualdeen artean sailkatzen duen EBren txostena
Ekonomi Garapen, Jasangarritasun eta Ingurumen sailburu Arantxa Tapiak nabarmendu egin du Euskadi berrikuntza handiko eskualdeen artean sailkatzen duen Europako Batzordearen txostena, Estatu osoan Madrilgo Erkidegoak bakarrik lortu baitu mugarri hori. Tapiak adierazi du albistea ona dela, baina halere Jaurlaritzak ahalegina egingo duela berrikuntza ez teknologikoa handitzeko enpresa txikienetan. “Hemendik aurrera arreta jarriko diegu gure sistemaren ahulune nagusia indartzeko garatu beharreko ekintzei”.
Eskualdeetako Berrikuntzaren Taula 2021 izeneko txostenak Euskadiren aurrerapenak nabarmendu ditu, berrikuntzaren indizean lehenbizikoz kokatu delako Europar Batasuneko batez bestekoaren gainetik (103,6 puntu, EBko 100eko batez bestekoaren aldean). Txosten honek lau multzotan banatzen ditu EBko eskualdeak euren emaitzen arabera: berrikuntzako liderrak, berritzaile handiak edo berrikuntza handiko eskualdeak, berritzaile moderatuak eta berritzaile hasiberriak. Euskadi bigarren mailan dago goitik hasita.
Tapiak azpimarratu du Euskadik berrikuntza handiko eskualdeen kategoria berreskuratu duela “adierazleek hobekuntza orokorra izan dutelako. Eta hobekuntza hori gertatu da, berrikuntza-maila kalkulatzeko eginiko aldaketa metodologikoak gorabehera; mugak gogortu dira, baina halere iritsi gara Berrikuntza Handiaren mailara”.
Sailburuaren arabera, “duela bi urteko emaitzak akuilu bat izan baziren gure ahulunea gainditzeko, oraingoan, emaitza onak gorabehera, lanean hasi behar dugu denborarik galdu gabe”.
Esan du enpresa txikienekin lanean jarraituko dutela, indarrean dauden Innobideak eta Hazinnova programen bitartez, “eta aitortza egingo zaiela berrikuntzaren ekosisteman “lehen hazia” jartzen duten enpresei irailean abiaraziko den ekimen baten bidez”.
Tapiak hizpide hartu ditu Euskadiren indar-gune garrantzitsuenak, besteak beste, berrikuntzak produktu berrien salmentan duen inpaktu handia, ezagutza intentsiboko sektoreetako enplegua eta biztanleria gaztearen goi-mailako kualifikazioa.
Erronkei dagokienez, Euskadik ETE berritzaileen portzentajea handitu behar du, eta sailburuak aipatu bezala, “adierazle hori duela bi urte baino hobea bada ere, badakigu lanean jarraitu behar dugula”.
“Gure helburuetako bat da “altuerako” berrikuntza bultzatzea, baina baita ere “azken miliakoa”, ETE bat bera ere atzean utzi gabe” adierazi du.
