Onkoexp, paziente onkologikoen esperientzia hobetzeko euskal plataforma adimenduna
Minbizia duten pertsonen erdiak baino gehiagok antsietate, depresio eta ondoez emozionalaren sintomak ditu, eta horietatik % 30ak nahasmendu psikologikoak ditu. Gainera, ohikoa da pertsonek zailtasun fisiko, sozial, estetiko, ekonomiko eta laboralak izatea. Egoera horrek guztiak eragin handia du pazienteen errekuperazioan eta ondorengo bizimoduan, eta beharrezkoa da diziplina anitzeko ikuspegi berriak planteatzea. Formula pertsonalizatuen bidez, tratamendu kliniko tradizionalak ez ezik, gaixotasunari modu positiboan eta bizi-kalitate handiagoarekin aurre egiteko behar den euskarri soziala, fisikoa edo psikologikoa ere eskaintzen zaio paziente mota bakoitzari.
Onkoexp proiektuak pazientearen arretari ikuspegi integral bat ematea proposatzen du. Pazienteari buruzko informazio ez-klinikoa bermatzen die profesionalei, ingurune osasungarriago bat, bihozberago bat eta baikorrago bat sustatzen laguntzeko. Horrela, tratamenduei eta bizi-kalitateari ematen dien erantzuna hobetzen laguntzen du. “Ikuspegi horrek prozesuak pazientearengana bideratzen lagunduko du, haien dimentsio emozionalak eta sozialak ere kontuan hartuta”, azaldu du Maria Ortiz LKS Next enpresako proiektuko arduradunak.
Helburu horrekin, Mondragon Korporazioko (LKS Next eta Diaradesign), IMQ Zorrotzaurre Klinikarekin, Mondragon Unibertsitatearekin eta Vicomtech zentro teknologikoarekin batera, kontzorzio bat sortu dute, paziente onkologiko guztien informazioa modu sistematikoan biltzeko TIC plataforma bat sortzea planteatzeko, pazienteen zuzeneko informazioa jasotzen duten galdetegi estandarrei jarraituz, PROMS (patient reported outcomes measures) eta PREMS (patient reported experience measures) adierazleetan oinarrituta. Osasun-profesionalei pazienteekiko komunikazioa erraztuko duen tresna bat ematea da helburua; pertsona bakoitzarentzat egokienak diren zerbitzu pertsonalizatuak gomendatzeko sistema bat sortzearekin eta iragartzeko eredu batekin batera, narriadura-arriskua aurreikusteko eta pazienteen profilen balizko aldaketak zehazteko.
Proiektua hasi zenetik, zuzenean lan egin da pazienteekin eta profesional onkologikoekin, benetako beharrak eta proposatutako soluzioen balioa identifikatzeko. “Proiektuaren gakoetako bat pazienteen eta profesionalen parte-hartzea izan da, azterketa, sorkuntza eta testatze prozesu osoan zehar”, adierazi du Olaia Irulegi Diaradesigneko proiektuaren arduradunak.
Lehen prototipoak IMQko paziente eta profesionalekin testatzen ari dira, eta 2021. urtearen amaierarako lehen bertsioa izatea aurreikusten da. “Onkoexp bezalako irtenbideak guztiz bat datoz osasun-zentro pribatu gisa dugun estrategiarekin; izan ere, ospitalearen kontzeptu bihozberago baterantz goaz, pazientearen eta haren ingurunearen esperientzia hobetzean zentratuta”, gaineratu du Isabel Urrutiak, IMQ Taldeko Pazientearen Kalitate eta Segurtasuneko arduradunak.
