Makegik retrofitting industrialaren aldeko apustua egin du, nazioarteko hedapenerako bide gisa
Hogeita bost urte baino gehiagoko esperientziarekin, Makegi retrofitting industrialaren esparruan erreferente gisa finkatu da. Teknika horrek lehendik dauden makinak modernizatzea ahalbidetzen du, haien errendimendua hobetzeko, segurtasuna handitzeko eta bizitza baliagarria luzatzeko, ekipo berriak erosi beharrik gabe.
Gaur egun, enpresak hamasei pertsoneko diziplina anitzeko talde bat du, besteak beste, ekipo-ondasunen eta energiaren sektoreetarako piezak mekanizatzen dituen bezero-zorro batentzat lan egiten duena. Hala, bere ibilbidean zehar, Makegik makina-erreminta eta zatitzaileak berregokitzen eta konpontzen jardun du, bezeroaren beharretara eta merkatuaren eskakizunetara egokitzen den zerbitzu pertsonalizatuarekin. “Berrikuntza gure esentziaren parte da. Beharrei erantzuten dioten zerbitzuak eskaintzen ditugu, dauden ereduak hobetuz edo bezeroak proposatutakoan edozein aldaketa planteatuz”, dio José Ángel Egiak, Makegiko zuzendari exekutiboak.
Etengabeko hobekuntzarekiko konpromiso hori hedapen-estrategian ere islatzen da. Enpresa sektore aeroespazialean oinarritutako lan-ildo berriak garatzen ari da, oso espezializatuta dagoen eremu horretan funtsezko hornitzaile gisa kokatzeko. “Benetako erronka merkatu honetan finkatzea da”, azpimarratu du Egiak.
Lortzeko, azken urteotan konpainiak bere hazkundea eta lehiakortasuna indartu ditu, SPRI Taldearen programetan parte hartu duelako, hala nola Hazitek eta Zabaldu programetan. Laguntza horiei esker, I+G proiektuak garatu ahal izan ditu eskualdeko teknologia-zentroekin lankidetzan, eta Estatu Batuetako merkatuan duen presentzia handitu du, hurrenez hurren.
Euskal enpresen artean berrikuntza bultzatzeko, enpresa txiki eta ertainetatik konpainia handietaraino, SPRI Taldeak Hazinnova, BDHI Konexio edo Innobideak bezalako berrikuntzarako programak eta laguntzak ditu.
SPRI Taldeak aukera ematen die euskal enpresei haien jardueraren berri emateko bere informazio-kanaletan. Zure proiektua gure gaiekin lotuta badago (I+G+b, digitalizazioa, internazionalizazioa, ekintzailetza, berrikuntza…), Zutaz mintzo gara ekimenean parte har dezakezu.
