Basque Digital Innovation Hubek adimen artifizialean espezializatutako nodo berria gehitu du
Euskal enpresek erronka teknologiko gero eta konplexuagoei egin behar diete aurre, eta horiei erantzuna eman behar zaie, berrikuntzak egiteko eta merkatu globalean lehiatzeko. Helburu horrekin, Basque Digital Innovation Hubak (BDIH) Adimen Artifizialeko nodo bat gehitzea erabaki du, Basque Artificial Intelligence Centerrek (BAIC) koordinatua, Euskadiko Adimen Artifizialeko Ekosistemaren erakunde liderra.
Nodo hau Zientzia, Teknologia eta Berrikuntzaren Euskal Sareko bederatzi erakundek osatuko dute, Euskadiko zentro teknologikoak eta lehen mailako unibertsitateak barne. Eragile horiek aktibo-katalogo oso bat eskainiko diote euskal enpresei, adimen artifizialeko teknologien ezarpenaren balio-kate osoa kontuan hartzen duena, eta enpresei azken belaunaldiko baliabideak inolako kosturik gabe eskuratzeko aukera paregabea aurkeztuko die.
Adimen Artifizialaren nodoaren helburu nagusia euskal enpresei beren datuak soluzio berritzaile eta eraginkor bihurtzen laguntzea da, funtsezko lau aplikazio-eremuren bidez: azpiegituraren hornidura, IAren ereduen garapena, zerbitzu eta produktu berrien hedapena, eta kalitate handiko datuen kudeaketa. Gainera, ikuspegi horrek iraunkortasuna ere bultzatzen du, ingurumen-inpaktua minimizatzen duten eta garapen arduratsua sustatzen duten konponbideen alde eginez.
Nodo honen aukerak aprobetxatu eta BDIHk enpresen eskura jartzen dituen aktibo ugarietan sartu nahi duenak formulario hau bete dezake, bere beharrak zehatz-mehatz ebaluatzeko eta kasu bakoitzari egokitutako laguntza eskaintzeko.
Ezagutu BDIHren aktibo guztiak BDIH Konexio programaren bidez
Basque Digital Innovation Hub Eusko Jaurlaritzak bultzatutako eta SPRIk koordinatutako lankidetza-sare publiko-pribatua da, euskal enpresen eraldaketa digital eta jasangarria erraztuko duen azpiegitura bat ezartzeko helburuarekin. Partzuergo hau osatzen duten Zientzia, Teknologia eta Berrikuntzaren Euskal Sareko (ZTBES) 30 agente baino gehiagok irabazi-asmorik gabeko zerbitzu teknologikoak ematen dizkiote euskal ekosistema industrialari, bereziki ETE industrialei.
BDIH euskal enpresetara hurbiltzeko, “BDIH Konexio” laguntza-programaren seigarren deialdia abiarazi da. Programak laguntza teknikoa eskaintzen du ekintza-plan bat diseinatzeko edo kontzeptu-proba bat egiteko, BDIHren nodoek ematen dituzten teknologia digital eta jasangarriak xurgatzeko gaitasuna handitzeko.
Azken bost urteetan, eragile teknologiko espezializatu horiek 340 euskal enpresa baino gehiagori lagundu diete, eta 430 berrikuntza-proiektu baino gehiago gauzatzea bultzatu dute.
Aprobetxatu BDIHren aktiboak eta BDIH Konexio programaren abantailak, eskuratu laguntzak hemen.
