IDDTEK: “Industriaren eta talentuaren arteko lotura gara”
IDDTEK izeneko ETEak bere ibilbideko lehen 20 urteak bete berri ditu outsourcingean eta kualifikazio handiko ingeniari eta teknikariak aukeratzen aditu gisa. Enpresa industrialaren beharretan eta talentua industriarekin konektatzean zentratuta, 2004an Irene Rodriguezek bere etxeko logelan sortu zuen enpresa honek ehun langile inguru ditu une honetan Donostiako eta Gasteizko egoitzetan.
Nola azal dezakegu zer den outsourcinga zurearen moduko esparruan, ingeniaritza arloan?
Ingeniaritzaren kasuan, outsourcinga irtenbide estrategikoa da, industria-enpresei beren jarduera teknikoaren zati bat kanpora ateratzeko aukera ematen diena. Horri esker, talentu espezializatua txerta dezakete beren proiektuetan. Gure kasuan, ez gara profesionalak ematera mugatzen, industriaren eta talentuaren arteko lotura gisa jokatzen baitugu, enpresek beren erronka teknologikoei profil onenekin aurre egin ahal izatea ziurtatuz. Malgutasuna, espezializazioa eta sektore bakoitzaren beharrak sakon ulertzea uztartzen ditu gure ikuspegiak. Beste nolabait esanda, talentua eta industria lotzea da helburua.
Baina, enpresek diotenez, errealitatea oso bestelakoa da: ez dago talenturik, ezta ingeniaririk ere…
Egia da enpresa askok zailtasunak dituztela eskatzen dituzten gaitasunak dituzten ingeniariak aurkitzeko. Baina talentu falta baino gehiago, nik esango nuke bi aldeen aurreikuspenen artean desoreka dagoela. Merkatuaren prestakuntza, esperientzia eta beharrak uztartu behar dira. Hain zuzen ere, IDDTEKen arrakala hori ixteko lan egiten dugu: benetako beharra aztertzen dugu, aurreikuspenak egokitzen ditugu, talentua identifikatzen dugu eta proiektuekin konektatzen dugu, balioa eman dezaten. Gure erronka da enpresek ez galtzea aukerarik langile kualifikatu faltagatik, eta profesionalek ere ez mugatuta ikustea beren garapena proiektu egokietara sarbiderik ez dutelako.
Zure kasuan, beti moldatu izan zara ondo marrazketa teknikoarekin eta delineazio industrialarekin eta, gainera, beti erakutsi zenuen salmenten arloarekin eta pertsonekiko harremanekin lotutako interesa… Koktel perfektua izan al zen enpresa hau sortzeko?
Bai, zalantzarik gabe. Hasiera-hasieratik argi izan nuen ezagutza teknikoa eta gaitasun komertzialak uztartzea abantaila izan zitekeela. Bezeroen beharrak ikuspegi tekniko batetik ulertzea eta, aldi berean, konfiantzazko harremanak eraikitzeko gaitasuna izatea funtsezkoa izan zen proiektu hau abian jartzeko garaian. Gure negozio-eredua enpresen eta profesionalen arteko konexio eraginkorrak sortzean oinarritzen da, eta horretarako ezinbestekoa da industriaren zein pertsonen hizkuntza ezagutzea.
Zer oroitzapen duzu lehenengo urte haien inguruan?
Urte gogorrak izan ziren, ikasketa eta ahalegin handikoak. Ekintzailetzari buruzko hitzaldietan astelehenetik igandera 14 orduz lan egiten nuela kontatzen dudanean, ikaratu egiten dira, baina hala da. Bakarrik hasi nintzen etxean, baliabide gutxirekin, baina hori bai, ideia argi batekin: industriari talentuaren bidez ingeniaritzako konponbideak aurkitzen laguntzea. Une zailak ere izan nituen, hasten den edozein enpresatan gertatzen den bezala, baina gure lehen bezeroen konpromisoak eta konfiantzak hazteko aukera eman ziguten. Gure taldea sendotzeko, talentua erakartzeko eta sektore oso zorrotzetan benetako balioa eman genezakeela erakusteko etapa ere izan zen.
Eta, gaur egun, zer da IDDTEK?
Gaur egun, ingeniaritza arloko outsourcingean erreferentea gara, eta talde sendoa eta proiektuak ditugu sektore estrategikoetan. Industriarako funtsezko bazkide gisa sendotu gara, irtenbide malguak eskainiz eta merkatuaren aldaketetara egokituz. Hazten jarraitzen dugu, baina gure esentzia galdu gabe: etorkizuna eraikitzeko industria eta talentua bateratzea.
Bulegoak Derion eta Gasteizen dituzue…
Bai, gure bulegoetatik, Estatu osoko bezeroei eskaintzen diegu zerbitzua. Gure bulegoetatik zein gure bezeroen instalazioetatik lanean ari diren taldeak ditugu; Urrunetik lanean, alegia. Azken finean, proiektu bakoitzaren beharretara egokitzen gara. Eredu horri esker, irtenbide pertsonalizatuak eskain ditzakegu, beti gure profesional eta bezeroekiko gertutasuna mantenduz.
Zer sektoretan barnera daiteke zuen negozio-eredua?
Batez ere sektore industrial estrategikoetan egiten dugu lan, hala nola aeronautikan, automobilgintzan, makina-erremintan, tren arloan, azpiegituretan, osagai elektroniko eta elektrikoetan… Sektore horietan, funtsezkoak dira berrikuntza eta ingeniaritza aurreratua, eta eskaintzen dugun malgutasunak eta espezializazioak aldea sortzen dute.
Zein da enpresan gaur egun betetzen duzun rola?
Enpresarekin batera, nire rolak ere bilakaera izan du. Sortzailea naizen aldetik, estrategian eta negozioaren garapenean parte hartzen jarraitzen dut, eta orain Komunikazio arloko arduradun lanetan murgilduta nago Nire arrakastarik handiena delegatzen ikastea izan da, gure ikuspegia partekatzen duen talde sendoaz inguratuta. Eta nire helburua IDDTEKek honaino ekarri gaituzten balio berberekin hazten jarraituko duela ziurtatzea da.
Beti esan duzu delegatzea funtsezko alderdia dela enpresa haz dadin, baina jende askok gero eta gehiago saihesten du erantzukizuna… Nola uztar dezakegu hori guztia?
Delegatzea ez da lan edo erantzukizun bat transferitu eta desagertzea. Hori beharrean, trebatzea, laguntzea eta hazten uztea da. Profesionalei beharrezko konfiantza eta tresnak ematen dizkiegunean, inplikazioa eta emaitzak hobetu egiten dira. Delegatzea enpresaren hazkundean eta enpresa osatzen duten pertsonen garapenean egindako inbertsioa da. Eta horrela lortzen dugu industria eta talentua konektatzea, eta etorkizuna sortzen jarraitzea.
Lotutako albisteak
MEPRO Medical Reproductive Solutions, gizarte-helburu teknologia: ugalkortasun maskulinoa berritzen
Gure helburua osasun-profesionalei eta bikoteei antzutasunaren erronkei aurre egiteko tresna berritzaile, seguru eta eraginkorrak eskaintzea da
Aloka, profesionalen artean ikus-entzunezko materiala alokatzeko plataforma
Gipuzkoako startup-ak hainbat ekipo eskaintzen ditu, hala nola kamerak, grabagailuak, mikrofonoak, droneak. Mobile World Congress-eko 4YFN biltzarrean parte hartu zuen, SPRI Taldeak kudeatutako stand batekin, webgunea inbertsore eta bezero potentzialei aurkezteko.
Metagra, mende erdiko berrikuntza automobilgintzarako hotzeko estanpazioan
Bergarako enpresa pieza konplexuen fabrikazioan sendotu da, jasangarritasunaren eta berrikuntzaren alde eginez.
Jon Ander Egaña: “BASQUE FOOD CLUSTERrek elikadura euskal industriaren sektore estrategiko gisa kokatzea lortu du”
Elikatze-katearen euskal elkartea 150 enpresa eta erakunde baino gehiagoren lehiakortasuna hobetzeko lanean ari da, berrikuntzaren garapenarekin, lankidetza-proiektuekin eta teknologien integrazioarekin.
Siteco, 30 urte automatikoki ordaintzeko makinak ekoizten
Arabako enpresak administrazio publikoarekin eta ostalaritza sektorearekin egiten du lan, eta urteak daramatza nazioarteko merkatuan.
Mecanizados Patro enpresak “fidagarritasuna, segurtasuna eta eraginkortasuna” eskaintzen ditu trenbide-sektorean
Serie laburretarako eta luzeetarako pieza espezifikoak fabrikatzen ditu enpresa arabarrak, doitasun handiko lan-tresna eta makinekin.
Icónica, errotulua artelan bihurtzen denean
Arabako enpresa da kartelak fabrikatzen dituen Euskadiko azken enpresetako bat. Hain zuzen ere, bost hamarkada daramatza lanean eta teknika eta artisautza uztartzen ditu bere produkzioak
Lorra, lau hamarkada inguru Bizkaiko nekazaritzako elikagaien kooperatibismoaren funtsezko zutabe gisa
Gaur egun, erakundearen lehentasuna zahartutako sektore honetako erretiroak ordezkatzea da, belaunaldi-erreleboaren bidez.
Utilmaik tresna industrial aurreratuak diseinatzen ditu ekoizpen industriala optimizatzeko
Bizkaiko enpresak berrikuntza eta ezagutza teknikoa uztartzen ditu funtsezko sektoreetan mekanizazio-prozesuak hobetzeko, hala nola garraioan, makineria astunean eta aeronautikan.
AVVI laguntzaile birtualak etxebizitzen salmenta eraberritu du, etxeak eraiki aurretik bisitatzeko aukera ematen baitu
Trivima enpresa donostiarrak soluzio berritzaile bat garatu du, salmenta epeak murriztu eta transformazioa areagotzen duen esperientzia interaktiboa ahalbidetzen duena.