Cyber Surgeryren helburua da bizkarrezurreko robot kirurgikoa Estatu Batuetan barneratzea
Cyber Surgery bizkarrezurreko kirurgiarako patentatutako nabigazio zinematikoko teknologia eta CE marka dituen lehen morroi robotiko kirurgikoa merkaturatu berri duen Gipuzkoako enpresa da. Ezarrita duen hurrengo mugarri handia Estatu Batuetako merkatuan sartzea izango da. Enpresak ETE-en berrikuntza bizkortzeko finantza-laguntza emateko programaren, Fast Track Innobideak izenekoaren, laguntza jaso du SPRI Taldearen eskutik.
Enpresa 2017an eratu zuten Donostian, 2013an Egile Mechanics enpresan ikerkuntza aurreratuko spin-off gisa sortu ostean. Hamarkada bat baino gutxiagoan, teknologia medikoaren arloan abangoardiako eta bikaintasuneko berrikuntzan erreferente bihurtu da.
2022an hasi ziren entsegu klinikoak egiten erreferentziazko ospitaleetan, eta benetako pazienteetan eraginkorra zela frogatu zuten. Azken bi urteotan, ISO 13485 eta CE marka lortu ditu enpresak.
Cyber Surgeryk osasungintzaren sektorean egiten du lan eta, modu espezifikoan, kirurgia ortopedikoaren eta traumatologikoaren arloan. Soluzio horiek bizkarrezurreko kirurgiak (bizkarrezurreko fusio, eskoliosia eta hausturak) egiten dituzten ospitale eta kliniketara eta osasun arloko profesionalengana (neurokirurgialariak, traumatologoak eta kirurgia-taldeak, adibidez) zuzentzen dira. Europa eta Estatu Batuak dira merkatu nagusiak.
Produktu nagusia ALAYA da, bizkarrezurreko kirurgiarako morroi robotikoa, “gerrialdeetan eta eremu torazikoetan torlojuak sartzen espezializatuta” dagoena. Bere funtzionalitateen artean, 3Dko planifikazio kirurgikoa, gidatze zehatza, X izpiekiko esposizioa murriztea eta inbasio minimoko kirurgiak daude.
“Bere balio-proposamena honako hauekin lotuta dago: zehaztasun eta segurtasun handiagoa, denbora kirurgikoak eta arriskua gutxitzea, eta ebakuntza-gelako lan-fluxu optimizatua”.
34 langile ditu Cyber Surgery enpresak. I+G arloarekiko konpromiso handia, zorroztasun akademikoa eta ikuspegi ekintzailea dira bere oinarriak. Horren guztiaren helburua da zirujau eta pazienteentzako soluzio disruptiboak eta esanguratsuak eskaintzea.
Enpresak SPRI Taldearen Fast Track Innobideak programaren laguntza jaso zuen 2024an, “TRIALAY “Preclinical Trials and Validations of the ALAYA Robotic System for Market Certification” proiekturako. Jasotako laguntzari esker, Cyber Surgeryk aurrerapauso handiak egin ahal izan ditu ALAYA morroi robotikoa balioztatzeko prozesuan, eta FDAk Estatu Batuetan merkaturatzeko ezarritako araudi mailako baldintzak bete ditu”.
Proiektu horri esker, testing, zuzenketa eta balioztatzeko prozesu zorrotza ezarri ahal izan da, kalitatearen barne-estandarrekin eta FDAren erregulazio-eskakizunekin bat etorrita. “Aurrerapen horiek urrats garrantzitsua dira Cyber Surgeryren nazioarteko hazkundea sendotzeko eta kirurgia robotikoaren arloan erreferentziazko enpresa gisa duen posizionamendua sendotzeko”.
Etorkizuneko erronkak nazioartean hedatzearekin eta kontsolidatzearekin lotuta daude, “FDA ziurtagiria lortzeko eta AEBetan merkatua irekitzeko”. Gainera, dibertsifikazio teknologikoa lortu nahi dute, prozedura askotarako plataforma modularretarako bilakaera egiteko.
Eraldaketa digitala areagotzea ere aurreikusten dute, inteligentzia artifiziala integratuz, plangintza kirurgikorako eta konektatutako ebakuntza-geletarako. “Hauek dira gure erronka estrategikoak: mundu mailan araudia (ISO, MDR, FDA) betetzea, eskalagarritasun industriala lortzea, kostuak optimizatzea eta I+G arlorako talentu espezializatua eta finantzaketa jasotzea”.
SPRI Taldeak Euskadiko enpresei bere kanaletan jardueraren berri emateko aukera ematen die. Zure proiektua gure gaiekin (I+G+b arloa, digitalizazioa, nazioartekotzea, ekintzailetza, berrikuntza…) lotuta badago, Zutaz mintzo gara ekimenean parte har dezakezu.
