Makina-Erreminta Txinan: Berrikuntza teknologikoak eta hazkundeak bultzatzen dute sektorea

Makina-erremintako industria munduko ekoizpen eta kontsumoaren herena da

Txina munduko bigarren ekonomiatzat finkatu da, eta posizio horren bermea dugu 2024an izandako 18,31 bilioi dolarreko BPGa, eta aurreko urtearen aldean lortutako % 4,7ko hazkundea. Testuinguru honetan, makina-erremintako industria munduko ekoizpen eta kontsumoaren herena da, eta 36.670 milioi dolarreko diru-sarrera operatiboak izan ditu 2024an, 2023an baino % 4,9 gehiago. Zuzeneko nahiz zeharkako 250.000 enplegu baino gehiago mantenduz eta kanpo-merkataritzari gogoan hartzeko moduko ekarpena eginez, Txinako merkatuak ingurune erakargarria eskaintzen die zerbitzuak nazioartera zabaldu nahi dituzten euskal enpresei

Txinako makina-erreminta-merkatuaren azterketa

 Txina makina-erremintaren inportatzaile eta esportatzaile handia da

Dokumentuak islatu duenez, kontsumoak behera egin du 2021az geroztik industria erabiltzaileetan izandako hazkunde txikiagoaren ondorioz eta tentsio geopolitikoen eraginez, baina kontsumoa pixkanaka-pixkanaka suspertuz joango da aurreikuspenen arabera. China Machine Tool & Tool Builders Association (CMTBA), elkartearen esanetan, 2027rako, pizgarrien politikek gutxienez 14.000 milioi dolar gehituko dituzte eskari berrietan, ekipoak berritzeko egungo zikloaren bultzadaz.

Era berean, txostenak argi utzi du, Konputagailu bidezko Zenbakizko Kontrola duten ekipoek osatutako CNC makina-erreminta delakoaren eskarian, automobilgintza (% 40) eta sektorea aeroespaziala (% 17) direla buru. Badira beste sektore garrantzitsu batzuk ere, molde eta trokelaren industria (% 13) eta eraikuntzako makineria (% 10) kasu.

Lau industria-polo

Merkatuak sektoreko 16.000 enpresa biltzen ditu

Bestalde, dokumentuak lau eskualde nagusi bereizi ditu Txinan makina-erremintaren ekoizpenari dagokionez, ekialdean, hegoaldean, hego-mendebaldean eta erdialdean kokatuta, ekialdean guztizko ekoizpen-balioaren % 59 bilduz. Merkatuak sektoreko 16.000 enpresa biltzen ditu, eta horietatik 5.720, urtean 3 milioi dolarretik gorako diru-sarrerak dituzten eragile handiak dira. Tokiko enpresa txikiak nagusi diren arren, atzerriko fabrikatzaileak dira goi-mailako gamako segmentuaren buru, japoniarrak eta alemaniarrak nagusiki, Yamazaki Mazak eta DMG MORI kasu.

Kanpo-merkataritzan, Txina makina-erremintaren inportatzaile eta esportatzaile handia da. Japonia, Alemania eta Espainia dira hornitzaile nagusietako batzuk, eta Espainia zazpigarren postuan dago inportazioen jatorrian. Testuinguru honetan, Txinara egindako esportazioen % 70 Euskadiri dagokio, eta balantza komertziala positiboa da zenbait segmentutan: akaberako makinak, zati eta osagarriak, eta tornuak.

Txostenak azaldu duenez, Txinako merkaturako sarbidea proiektuen bidez antolatu ohi da. Txinako fabrikatzaile gehienek salmenta zuzeneko ereduak erabiltzen dituzte, baina agente edo banatzaile egokiak identifikatzea gomendatzen zaie lehen aldiz sartu nahi duten atzerriko enpresei. Txinan saltzeko kontuan hartu beharreko faktoreen artean, kalitatea, fidagarritasuna, prezioa, bezeroentzako arreta eta laguntza teknikoko zerbitzua nabarmendu behar dira.