SPRI Taldeko zuzendariak hasiera eman die ETEentzako laguntza-planak aurkezteko eskualde mailako jardunaldiei
SPRI Taldeko zuzendari nagusi Aitor Urzelaik ostegun honetan eman die hasiera Ekonomi Garapen, Jasangarritasun eta Ingurumen Sailaren 68 laguntzak aurkezteko jardunaldiei. Euskadiko hainbat eskualdetan egingo diren zortzi ekitaldietan aurkeztuko dira laguntza horiek, “Oso ETEzaleak gara” izenburupean eskaintzen direnak, aurten enpresa txiki eta ertainei bereziki zuzenduta.
Topaketa informatzaileak maiatzean eta ekainean egingo dira, presentzialak izango dira eta ezinbestekoa izango da izena ematea, baina posible izango da saio batzuk streaming bidez jarraitzea. Lehen ekitaldia ostegun honetan egin da Tolosan, eta gainerakoak jarraian etorriko dira, hau da, saio bat astean, Azpeitian, Durangon, Barakaldon, Beasainen eta Gasteizen.
Ekonomi Garapen, Jasangarritasun eta Ingurumen Sailak iragan otsailean laguntzei buruz antolatu zituen hiru jardunaldi telematikoetan 1.300 enpresak azalpenak jaso zituzten eskaintzen diren 68 laguntzei buruz, eta saioek 5.500 bistaratze baino gehiago izan dituzte SPRI Taldearen kanalean. Harrezkero, enpresak eta beste erakunde batzuk ere jardunaldiak eskatzen eta antolatzen aritu dira helburu berarekin, esaterako, hauek: Metaleko Lantegien Bizkaiko Federakuntza, Elikaduraren Klusterra, Elkargi, Innobasque, Debabarreneko Garapen Ekonomikorako Elkartea (DEBEGESA), Debagoieneko Garapen Agentzia, SEA Empresas Alavesas, Euskadiko Ekipamendu, Zur eta Diseinu Klusterra (HABIC) eta Basque Health Cluster.
SPRI Taldeko zuzendariaz gain, aurkezpenetan izango dira Leyre Madariaga, Eusko Jaurlaritzako Eraldaketa Digitalaren eta Ekintzailetzaren zuzendaria, Mikel Amundarain, Industriaren eta Energia Trantsizioaren zuzendaria, Ainhoa Ondarzabal, BTI-Nazioartekotzeko Euskal Agentziako kontseilari delegatua, Iñigo Ansola, Energiaren Euskal Erakundeko zuzendaria, Alex Boto, IHOBEko zuzendaria, Javier Plasencia, Elikagaien Kalitate eta Industriako zuzendaria eta Aitor Cobanera, SPRI Taldeko Enpresen Sustapen Saileko zuzendaria.
Hizlari bakoitzak xeheki azalduko ditu bere arloko programak, eta enpresek aukera izango dute laguntza-ildo guztiak xehetasunez ezagutzeko eta euren premietara ongien egokitzen direnak aurkitzeko.
Eusko Jaurlaritzaren planak 433 milioi euroko aurrekontua duten 68 programa barne hartzen ditu, zeintzuen helburua baita ekonomia suspertzea eta kalitatezko enplegua sortzea, arreta berezia eskainiz Euskadiren garapen jasangarriari. Laguntzen katalogoa bertsio digitalean ere eskuratu daiteke.
Modernizazioa eta lehiakortasuna bultzatzea
Laguntzen helburua da euskal enpresa-sarearen modernizazioa eta lehiakortasuna bultzatzea, eta nahiz eta euskal ETEek dagoeneko ezagutzen dituzten horietako asko, badaude alderdi berri eta aipagarriak ere. Adibidez: Azpitek laguntza berriak, ikerketarako ekipamendua erosi eta eguneratzeko; reshoring eta dibertsifikaziorako programa berriak; nazioartekotze bekak, aurten ugariagoak direnak; bertako produktuak garatu eta bultzatzeko laguntzak edo ingurumen eta jasangarritasun proiektuentzako eta ekonomia zirkularreko eta bioekonomiako proiektuentzako laguntzak, klima aldaketaren ondorioei aurre egiteko.
Nahiz eta laguntzen helburuetako bat den pandemiaren ondorioak jasaten ari diren enpresei laguntzea, funtzio nagusia da sortzen ari diren aukera berriak aprobetxatzeko gai diren proiektuak bultzatzea. Horregatik, 433tik gora milioi euroko aurrekontuaren % 40 I+G+B-ko programetara bideratuko da. Halaber, laguntzak emango dira eraldaketa digital, ekintzailetza, industriaren garapen, nazioartekotze, ekonomia zirkular, energiaren trantsizio edo elikadurako industria arloetako proiektuentzat.
Laguntza-programez gain, Jaurlaritzak bi funts-ildo berri eta beste zerbitzu batzuk ere sartu ditu urteroko katalogo informatzaile berrian, Euskadiko enpresa txiki eta ertainen garapena eta lehiakortasuna bultzatzeko.
Ikerketa, berrikuntza, eraldaketa digital eta ekintzailetza arloetako programei dagokienez, helburua da Euskadi Europa mailako berrikuntza-gune izan dadila, enpresa teknologikoen sorkuntza % 10 handitzea eta Euskadi tokiko industriarekin lankidetzan aritzen diren nazioarteko startup-en trakzio-ekosistema bihurtzea.
Industriaren garapen, nazioartekotze, energia eraginkortasun, energia berriztagarri eta ingurumen arloko laguntzen kasuan, euren helburua da industria eta zerbitzu aurreratuak BPGaren % 40 izan daitezela. Baita ere enpresen nazioartekotzea Covid-ak eragin duen egungo nazioarteko testuingurura egokitzea, eta energiaren amaierako kontsumoaren % 20 energia berriztagarrien bidez asetzea.
Horrez gain, asmoa da berotegi efektuko gasen isurketa % 30 murriztea, hondakinen sorkuntza gutxitzea eta horien balorizazioa eta berrerabilpena areagotzea, ingurumen-estrategia politika transbertsal gisa inplementatzea eta uraren, lurzoruaren eta airearen adierazleak hobetzea, bioaniztasuna hobeto defendatu eta errespetatzeko.
Lehenengo sektorera zuzendutako laguntzei dagokienez, programa horiekin lortu nahi dena da elikagaien produkzioa handitzea Euskadin eta lurralde arteko oreka handiagoa bermatzea, bizi-kalitatea emanez landa-guneetan eta itsasertzeko guneetan bizi diren eta lan egiten duten pertsonei.
Lotutako albisteak
Euskal enpresek Estatu Batuetako itsas-sektore eolikoan duten presentzia sendotu dute
Euskadiko ordezkaritza bat International Partnering Forum 2025 ekitaldian egon da merkatuaren azken joerak aztertzeko, saio teknikoetan parte hartzeko eta sektoreko eragile estrategikoekin zuzeneko harremanak ezartzeko
Koreako automatizazioa eta robotika industriala, aztergai
Basque Trade & Investmentek euskal enpresen eskura jarri ditu Smart Factory + Automation World 2025 ekitaldian egindako bi txosten, Hego Koreako merkatuaren joerak eta aukerak jasotzen dituztenak
Euskadik eta Japoniak lankidetza sendotu dute berrikuntza teknologikoan eta energia berriztagarrietan
Euskadik Japoniako Mie prefekturako ordezkaritza baten bisita jaso du aste honetan, sektore estrategikoetan balizko lankidetza-arloak esploratzeko asmoz
ESGI 188 (European Study Group with Industry) Bilbon izango da 2025eko maiatzaren 26tik 30era
Enpresek problema matematikoak aurkezten dituzte azterketa-taldeak konpon ditzan, askotan modelizazio edo optimizazio moduan.
BeDIGITALek zazpigarren edizioa ospatuko du BECen, enpresa eta erakunde liderren partaidetzarekin
Ekainaren 3tik 5era izango da, +INDUSTRYren esparruan, herrialdeko Smart Manufacturing-ari eskainitako topagunerik handienean. SPRI Taldea erakusketarien artean dago, ‘Invest in the Basque Country’ programarekin.
Zinemaldia Startup Challenge 2025
Izen-ematea: apirilaren 15etik ekainaren 2ra arte
Sei euskal ikerketa-erakundek bat egin dute ITTHACAn zahartze osasuntsua sustatzeko
Elkartek programak finantzatutako proiektu honek biomarkatzaileak, iragarpen-ereduak eta osasunaren zuzeneko monitorizazioa erabiltzen ditu.
Kontsulta irekia: Spri Taldearen laneko prebentzio-zerbitzuak definitzeko zure aukera
Sprik merkatuko aurretiazko kontsulta jarri du abian, lan-arriskuen prebentzioaren eta osasunaren zaintzaren sektorearen benetako beharretara egokitutako lizitazioa diseinatzeko. Horren bidez, operadore ekonomikoen ekarpenak bildu nahi dira, kontratazio-prozesu lehiakor, garden eta merkatuko jardunbide egokienekin lerrokatua egituratzeko.
Euskadik energia eolikoan duen gaitasuna erakutsi du WindEurope 2025 azokan
Euskal parte-hartzeak ordezkaritza zabala bildu du Wind Energy Basque Country stand bateratuan, 17 enpresa eta erakunde hauei abian dituzten soluzioak eta teknologiak ezagutzeko aukera emanez
Ukrainako susperraldi ekonomikoa, Bruselan eztabaidagai
Bertaratutako erakundeen artean egon da SPRI Taldeari atxikitako Basque Trade & Investment (BasqueTrade) enpresak nazioartekotzeko euskal agentzia