Kristina Apiñaniz: “Funtsezkoa da kompromiso duten eta diziplina anitzekoak diren taldeak osatzea industriaren erronkei aurre egiteko”

Kristina Apiñaniz, gerente eta Arabako Ingeniari Industrialen Elkargo Ofizialaren dekanoak, ibilbide luzea du enpresa-arloan proiektu estrategikoak eta nazioartekoak sustatzen. 

Apiñanizek 25 urte baino gehiagoko esperientzia izanda zuzendaritza- eta gobernu-postuetan, gerente gisa egiten du lan, enpresa-esparruan gero eta presentzia handiagoa duen figura gisa. Aholkularitza tradizionalean ez bezala, gerenteak enpresaren zuzendaritza-egituran sartzen da aldi baterako, barrutik aldaketa-, profesionalizazio- edo hazkunde-prozesuen buru izateko. Epe zehatzetan emaitzak lortzeko gaitasunean oinarritzen da bere ekarpena, erakundeari trantsizio-une garrantzitsuetan lagunduz. 

Esperientzia horretatik, pyme industrialek hainbat erronkari egin behar dietela aurre azpimarratzen du, hala nola belaunaldi-erreleboa, digitalizazioa eta nazioartekotzea, eta horientzat “jada ez dute balio betiko formulek; gauzak beste modu batera egin behar dira, egokitu eta, batez ere, beste gaitasun batzuk gehitu”, adierazi du. “Dagoeneko ezinezkoa da liderrak ezagutza osoa izatea; horregatik, funtsezkoa da gaitasun horiek dituzten pertsonak integratzea, entzutea eta kompromisoa eta diziplina anitzak duten taldeak izatea erronka horiei aurre egin ahal izateko”.  

Konfiantzan oinarritutako lidergo estiloa defendatzen du Apiñanizek, taldeak sendotzeko gako gisa, eta umiltasuna funtsezko baliotzat jotzen du. “Aitortu behar da gauza batzuk ez dakigula egiten, eta beste batzuek hobeto egiten dituztela. Norbera baino hobea den jendeaz inguratzeak egiten du taldeek funtzionatzea”. 

Urteko zuzendari onenaren saria

Arabako Profesional eta Enpresari Emakumeen Elkarteak (AMPEA) ‘Emakume Zuzendarien Saria’ eman berri dio, eta sari honen bidez, tradizioz maskulinizatuak izan diren sektoreetan emakumeen lidergoa agerian jarri nahi du. “Nire ibilbidearentzat aitortza handia izan zen, eta industria ere emakumeak profesionalki garatu daitezkeen esparrua dela erakusteko modua”, azaldu du. 

Saria ematerakoan, mezu inspiratzaile bat helarazi nahi izan zien emakume profesionalei: “Beren hautagaitzak aurkeztera animatu nituen. Ez da harrokeriazko ekintza bat, autokonfiantza izatea da. Batzuetan autorrekonozimendua falta zaigu, eta hortik hasten da dena. Ausardia behar da lidergo berrian, ausarta izateko kontratatzen zaituztelako”.  

Euskal enpresen nazioarteko proiektuak bultzatzea da SPRI Taldearen helburuetako bat; izan ere, Basque Trade and Investment Nazioartekotzeko Euskal Agentziaren bidez, leihatila bakarraren bidez bere baliabide eta laguntza guztiak jartzen ditu enpresen eskura, adibidez Elkartu, Gauzatu edo BEINT eta Global Training Bekak.