Euskadik eta Singapurrek itsas eolikoan dituzten gaitasunak partekatu dituzte webinar baten bidez
Sektore eolikoko euskal enpresek “Offshore Wind in the Basque Country: Market Insights & Collaboration Opportunities” webinarrean parte hartu dute gaur. Basque Trade & Investment erakundeak antolatu du, Singapurreko bulegoaren bitartez, Enterprise Singapore eta BasqueEnergyrekin elkarlanean. Itsas energia eolikoaren euskal ekosistemaren gaitasunak aurkeztea eta Singapurreko eta Euskadiko konpainien arteko harreman berriak bultzatzea izan dira saioaren helburuak.
Euskadin balio eolikoko katean 150 enpresa aktibo baino gehiago dauden momentu batean egin da webinarra. Horri esker, itsasoko energia eolikoan erreferentziazko hub europarra finkatu da, eta eoliko flotatzailearen teknologian munduko lider bihurtu da. Nazioartean haize-energia flotatzailea erakusteko eta merkaturatu aurreko proiektu gehienetan euskal konpainiak egoteak posizionamendu hori indartzen du, eta ur sakonetan instalazioak hedatzera doazen merkatuetarako bazkide estrategiko bihurtzen du lurraldea.
Agertoki hori aztertu da jardunaldian. Hasteko, Baoyue Koh Enterprise Singapore-ren Europarako zuzendariordeak ongietorria egin du, eta Pablo Huidobro Basque Trade & Investment ASEANeko zuzendariak hitz egin du. Biek beraien erakundeen misioa aurkeztu dute, eta bien arteko etengabeko lankidetza nabarmendu dute, potentzial handiko industria- eta teknologia-sektoreetan aukerak garatzeko.
Programan zehar, BasqueEnergyk eta itsas eolikoan liderrak diren euskal enpresek beraien esperientzia eta sektoreari buruz duten ezagutza partekatu dute. Ildo horretan, Ander Gonzalezek, BasqueEnergyko Nazioarteko Jardueren arduradunak, euskal ekosistemaren ikuspegi orokorra eman du, eta balio-kate osoan dituen gaitasunak nabarmendu ditu, ingeniaritzatik eta fabrikaziotik proiektuen garapenera.
Hitzaldi horren ondoren, David Carrascosa Saitec Offshore Technologies-eko Eragiketen zuzendariak konpainiaren garapen teknologikoak eta nazioarteko proiektu-zorroa azaldu ditu; Raquel Juan Sener-eko Itsas Energia Eolikoko Teknologien Negozio Garapeneko arduradunak, berriz, enpresaren ingeniaritza-irtenbide integralak eta mundu mailako itsas proiektu eolikoetan duen esperientzia zehaztu ditu, batez ere Asiako merkatuan.
Webinarrak galdera-erantzunen txanda interaktibo batekin amaitu du, eta Singapurreko zenbait enpresak beraien jarduerak aurkeztu dituzte eta hizlariekin hitz egiteko aukera izan dute. Espazio horri esker, sektorearen joeretan sakondu ahal izan da, hurrengo proiektuen berri eman da eta itsas eolikoa bezalako eremu estrategiko batean lankidetzarako bide posibleak esploratzea erraztu du.
