BT&I-ren Nazioarteko Behatokia: Ekonomia globala % 2,5 haziko da 2025ean, AEBetako politika eta muga-zergen ziurgabetasunaren eraginpean
Munduko ekonomiko-egoeraren hiruhileko azterketa
Euskal enpresek eskuragarri dute dagoeneko SPRI Taldeari atxikitako Basque Trade & Investment (BasqueTrade) euskal enpresak nazioartekotzeko agentziaren Nazioarteko Behatokiaren azken edizioa. Dokumentuak maila global zein eskualde mailako aurreikuspenei buruzko informazio eguneratua jaso du, nazioarteko merkatuei eragin diezaieketen arrisku geopolitiko nagusiekin batera. Deskargatu hemen txostena.
Muga-zergen politikaren ziurgabetasunak markatuko ditu munduko aurreikuspen ekonomikoak
Txostenaren arabera, munduko ekonomia % 2,2 haziko da 2025ean, eta honek ehuneko 0,3 puntuko beherakada ekarriko die martxoan egindako aurreikuspenei. Doikuntza hau nazioarteko testuinguru batean kokatzen da, Estatu Batuen merkataritza-gerra globalak baldintzatuta, zeinak ziurgabetasuna sortzen jarraitzen baitu abuzturako iragarritako muga-zergen ondorioz, bai eta Ekialde Hurbileko tentsioen ondorioz ere.
Egoera honetan, moderazioaren zantzuak agertu dira inflazio globalean, baina ez da espero interes-tasak pandemiaren aurreko mailetara itzultzerik. Merkataritzari dagokionez, Estatu Batuek % 50 igo dituzte altzairuaren eta aluminioaren gaineko muga-zergak, eta aldi berean, hainbat herrialderi gutunak bidali dizkiete muga-zergen berrikuspena eta igoera iragarriz; dirudienez, neurri horiek abuztuan aktibatuko dira. Bestetik, Europar Batasuna esportazioen gaineko % 30eko muga-zergak saihesteko ahaleginak egiten ari da, industria eta defentsa-politika indartzen dituen bitartean, balizko errepresaliak aztertzeaz gain. Lasaitasun erlatiboko egoera honek eragin positiboa izan du finantza-merkatuetan, eta burtsa-indize nagusiek igoerak izan dituzte.
Hazkunde ekonomiko desberdina eskualde bakoitzean
Txostenak eskualdekako aurreikuspenak ere eguneratu ditu. Ipar Amerikan BPGaren uzkurdura aurreikusi da: -% 0,1 Estatu Batuetan, -% 0,6 Kanadan eta -% 0,2 Mexikon, azken hau muga-zergen eta T-MEC akordioaren etorkizunari buruzko ziurgabetasunaren eraginez.
Aldiz, Latinoamerikak % 1,8ko hazkundea izango du, eta Brasilen erresilientzia nabarmenduko da herrialde honek energia zein merkataritza arloetan abian duen estrategiari esker.
Europak, bestalde, % 1etik gorako hazkunde-aurreikuspena du, baina honen bilakaera egonkortasun politikoaren eta merkataritza-tentsioen amaieraren araberakoa izango da. Gainera, Alemania % 0,1eko hazkunde-proiekzioarekin aterako da atzeralditik.
Asia-Pazifikoa eskualdeari dagozkio aurreikuspenik onenak, izan ere, % 3,5eko hazkundea kalkulatu zaio, baina kopuru hau kolokan jar liteke uztailean eta abuztuan muga-zergak berriz aktibatuko balira, bereziki Txinaren kasuan. Eskualde honen barruan, Indiak % 6,2ko hazkundea lortuko du eta Txinak % 4,4koa, azken honek nazioartean hedatzeko estrategia indartzen duen bitartean.
Saharaz hegoaldeko Afrikan eta Ekialde Hurbilean, % 3,7ko eta % 3,1eko hazkunde sendoa aurreikusi da, hurrenez hurren. Hala ere, bi bloke hauek desegonkortasun politikoari zein gatazka armatuei atxikitako arriskuen eraginpean daude.
Kontuan hartu beharreko faktore politikoak eta ekonomikoak
Behatokiak datozen hilabeteotan kontuan hartu beharreko giltzarrizko hainbat gertaera ere zehaztu ditu. Merkataritzaren kasuan, abuztuaren 1a eta 13a funtsezko datak izango dira, izan ere, AEBen eta Txinaren arteko egungo muga-zergen su-etena amaitu eta neurri berriak indarrean jartzeko mugarri izan daitezke. Egoera honen aurrean, Europar Batasuna erantzunezko muga-zergak aplikatu eta defentsa ekonomikorako tresnak aktibatzeko aukera aztertzen ari da, ACI delakoa kasu.
Bestalde, Txina merkataritza dibertsifikatzeko estrategia bizkortzen ari da Asia Erdialdera, Afrikara eta Latinoamerikara begira, eta merkataritza-superabit errekorrari eutsi dio Estatu Batuetarako esportazioak murriztu arren. Ekialde Hurbilean, Israelek Gazan erasoaldiari berriro ekin izanak aldi baterako su-etena ekar lezake, baina akordio iraunkorra lortzeko itxaropenik gabe.
Europan, Txekiar Errepublikako eta Poloniako hauteskundeek eragin nabarmena izango dute kontinentearen bilakaera politiko eta ekonomikoan hurrengo hiruhilekoetan.
Euskadiko enpresentzako nazioartekotze-laguntzak eta -txostenak
Basque Trade & Investmentek Euskadiko enpresen nazioarteko hedapena bultzatu du zerbitzu eta programa espezializatuen gama zabalaren bidez.
Ekimen horien guztien artean, ZABALDU, SAKONDU eta NAZIOARTEKO GAUZATU laguntzak nabarmendu behar ditugu. Laguntza horiek nazioarteko sustapena, atzerriko merkatuen kontsolidazioa eta enpresa-lankidetza bultzatzeko diseinatuta daude.
Gainera, aholkularitza estrategiko pertsonalizatua, merkatuko azterketen eta sektoreko txostenen bidezko adimen lehiakorra eskaintzen du. Horietako bat da, adibidez, Nazioarteko Behatoki hau. Tresna estrategikoa da dagoeneko nazioarteko merkatuetan diharduten euskal enpresentzat eta atzerrian beren presentzia zabaldu nahi dutenentzat. Hala, laguntza estrategikoa eskaintzen du negozio-aukerak identifikatzeko eta arriskuak kudeatzeko hazkundea moteldu egin den tentsio geopolitikoak nagusi diren mundu mailako ingurunean.
Basque Trade & Investmentek, gainera, nazioarteko ekitaldietan, azoketan eta misio komertzialetan parte hartzeko aukera ematen du, eta tokiko laguntza eskaintzeko 20 bulego baino gehiagoko sarea du 87 herrialdetan.
Zerikusia duten beste txosten batzuk:
-
Ekonomia globala % 2,5 haziko da 2025ean, AEBetako politika eta muga-zergen ziurgabetasunaren eraginpean. -
Ekonomia globalak hazkunde moderatua izango du 2025erako, ziurgabetasun geopolitikoaren egungo ingurunean. -
Hazkunde ekonomiko apalak eta tentsio globalek 2025eko lehen seihilekoa baldintzatuko dute. - BT&I-ren Lehengaien Nazioarteko Behatokia
- BT&I-ren Nazioarteko Merkataritzaren Behatokia
