Polonian finkatutako euskal enpresek loturak indartu dituzte Varsovian antolatutako topaketan
SPRI Taldeari atxikitako Basque Trade & Investment (BasqueTrade) euskal enpresak nazioartekotzeko agentziaren Poloniako bulegoak herrialde hartan finkatuta dauden 18 euskal enpresa bildu ditu aste honetan Varsovian, esperientziak partekatu, baterako erronkak identifikatu eta merkatu estrategiko horretako euskal presentzia sendotzea xede zuen topaktea batean. Jardunaldian, interes partekatuak dituzten Ukrainako bi konpainiak ere parte hartu dute.
Ekitaldiko buru izan den Nagore Bonilla BasqueTradeko Kontseilariak ongietorriko hitzak esan eta bertatik bertara ezagutu ahal izan du Polonian finkatutako euskal enpresen egungo egoera, oraingo testuinguru geopolitiko eta ekonomikoaren erdian.
Bonillak hitzaldian nabarmendu duenez, “maila globaleko eraldaketa sakonak gertatzen ari diren unean bizi gara: trantsizio energetikoa, hornidura-kateen birkonfigurazioa, adimen artifizialaren sarrera, ziurgabetasun geopolitikoa eta talentu kualifikatuaren eskasia gero eta handiagoa”.
Ildo horretan, argi utzi du, “Euskadik, industria-eskualde aurreratua denez gero, berrikuntza, jasangarritasuna eta munduarekin lotutako industriaren alde apustu eginez aurre egin behar diela erronka horiei. Polonia, bestalde, irmotasunez aurrera egiten ari da ekonomiaren modernizazioan, eta zuen enpresetako asko prozesu horretako eragile aktiboak zarete, balioa sortuz eta gure bi lurraldeen arteko loturak estutuz”.
Azkenik, euskal enpresek herrialde hartan egindako lana eskertu eta horien beharrak entzuteko prest dagoela azaldu du, Poloniako merkatuan sendotzeko babes instituzionala helarazteaz gain. “Bakarrik jakinarazi nahi dizuegu zuen lana babesteko gauzkazuela hemen, herrialde estrategiko honetan dugun presentzia elkarrekin sendotzeko, eta batez ere, zuei guztioi entzuteko”, ziurtatu du.
Topaketaren amaieran, networking-saioa antolatu da bertaratutako enpresen arteko esperientzien trukea sustatu eta harremanak indartzeko.
Honelako ekimenek indartu egiten dute BasqueTradek nazioarteko euskal enpresa-komunitatearekin duen konpromisoa, merkatu estrategikoetan duen erraztaile-lana indartuz.
