Zibersegurtasuneko enpresa eta startup kopuruak gora egin du Euskadin
Zibersegurtasunaren Euskal Zentroak (Basque Cybersecurity Centre-BCSC) egin eta argitaratutako Euskadiko Zibersegurtasunaren Liburu Zuriaren bigarren edizioak agerian uzten du urte bakarrean gora egin duela euskal zibersegurtasun industrialaren ekosistema osatzen duten enpresa eta startup kopuruak. Hala, gaur egun 153 agente daude katalogatuta, 125 enpresa pribaturekin; horietatik 29 startup-ak dira, lehen edizioko 109 enpresen eta 18 startup-en aldean.
Euskadiko zibersegurtasunaren sektorea heterogeneoa da eta tamaina desberdinetako eragileak dauden haren barruan, bai multinazional handiak bai enpresa txiki eta ertainak. Euskadiko zibersegurtasunaren Liburu Zuriak merkatu horren argazkia eta laburpena ematen ditu, eta bere horretan, aldiro berrikusten den katalogo bizia da.
Bigarren argitaraldi honetan 153 eragile katalogatu ditugu, tartean 125 enpresa pribatu; horietatik, 29 startup-ak dira, denak Euskadin kokatutakoak. Konparatze aldera, 1. argitaraldian 109 enpresa pribatu eta 18 startup izan genituen. Esteka honetan bertsio osoa ikus daiteke, sektoreari eta Euskadiko zibersegurtasun-ekosistemari buruzko informazio zehatza eskaintzen duena, bertan diren eragile guztiei buruzko xehetasun guztiak emanez.
Jarraian, bertan jasotako ondorio nagusiei buruzko zertzelada batzuk nabarmenduko ditugu.
Egoera konplexua
Ikuspuntu sozio-ekonomiko globaletik, arrisku digitalen eta haiek ustiatzeko moduaren (zibereroasoen) eremuan dagoen etengabeko aldaketa-dinamika ezagunari COVID-19aren krisia gehitu zaio 2020an, eta horrek baldintzatu egingo du antolakundeek etorkizunean babes-prozesuei ekiteko era, seguruenik protagonismo handiagoa emanez telelanari eta gehiago erabiliz hodeiaren barruko zerbitzuak.
Gainera, sektoreak egonkortzen jarraitzen du: 2018an bat egin zuten S21sec eta Nextel-ek, 2019an Wise Security Global-ek bere negozioak berrantolatu zituen eta LKS Next-ek Secure&ITren gehiengoa erosi zuen, eta 2020aren hasierak Euskadin sortutako bi enpresaren fusioa ekarri digu: Ibermática eta ITS Security. Bestalde, WatchGuard amerikar konpainiak Panda Security erosi du. Azken mugimendu horrek argi uzten du, zalantza gabe, Euskadin sortutako zibersegurtasun-teknologiak garrantzia duela munduan, baina aldiz, haren etorkizunari buruzko erabakigunea Atlantikoaren beste aldera joango da, eta horrek hausnarketa eragin behar luke, kontuan izanda Europak beste ekonomia batzuekiko izan ohi duen mendekotasun teknologikoa.
Egoera konplexu eta aztoratu honetan, lider izateko konpromisoari eusten dio Eusko Jaurlaritzak, gizartearen arlo guztietan zibersegurtasunaren aplikazioa sustatzeko, giltzarria baita enpresa-antolakundeek bizirauteko dituzten aukerak handitu eta, hala, gure industria gaur egungo pribilejiozko tokian mantentzeko.
Industriako Zibersegurtasun Hub bat Garatzeko Euskadiko Plan Estrategikoa
2019an, BCSCk euskal zibersegurtasun-ekosistemaren egoeraren ebaluazioa egin zuen, zibersegurtasuneko eta ekintzailetza digitaleko beste hub global batzuekin alderatuta egoera zein zen ezagutzeko; horrek aukera eman zuen bai indartu beharrekoa bai indar-guneak identifikatzeko. Hausnarketa haren emaitza gaur egungo Industriako Zibersegurtasun Hub bat Garatzeko Euskadiko Plan Estrategikoa izan zen.
Ahalegin handiagoa eskatuko duten eta etorkizunean Hub-aren garapena gehien baldintzatzen duten alderdien artean, nabarmentzekoa zen talentu-sorrera, eta kezka hori Planaren lanketan jardun zuten guztien artean zabalduta zegoen.
Indartu beharreko beste arloei dagokienez, egiaztatu zen euskal ekintzailetzak jasangarritasuna bilatzeko joera izaten duela, hazteko ahalmena bilatzekoa bainoago, eta horrek, nolabait, mugak jartzen dizkie ikusgaitasunari eta teknologiaren eremuko inbertsiogile handiak erakartzeari.
Ifrentzuan, Euskadirentzat etorkizun oparoa iradokitzen duten faktoreak bestelakoak direla ikusi zen: tamaina handia lor dezakeen tokiko merkatua, digitalizatzearen inguruan berritzeko bokazioa duen industriaren baitakoa; ongi finkatutako zibersegurtasun-sektorea; Europako bizi-kalitaterik onenetakoa, hainbat adierazleren arabera; eta eskariaren gainean ekiteko aukera ematen duten eskumen fiskalak.
Zibersegurtasun-ekosistemaren espezializazio teknologikoa
Jakina da zibersegurtasuna enpresa askorentzako negozio-eredu berrien iturburu eta datozen hamarkadetan kalitatezko enplegu jasangarrien sortzaile bihurtzeko bidean dela. Gainera, pandemiak ekonomian eragindako atzerakadak argudioak ematen ditu zibersegurtasuna bultzatzen jarraitzeko, krisi-garaian jarduera ekonomiko gisa izan duen portaera bilakabide orokorraren aurkakoa izan baita. Beste sektore batzuk nabarmen sufritzen ari direnean, konfiantza digitala gorantz doan negozioa da, eta horregatik, are zentzu handiagoa du Plan Estrategikoan adierazitako ekintzak erabakitasunez gauzatzeak.
Hemendik sei urterako anbizioa zibersegurtasun-ekosistemaren espezializazio teknologikoan aurrera egitea da, euskal industria estrategikoaren balio-katerantz. Mugimendu horren berezko bultzatzailea den BCSCrekin batera, funtsezkoa izango da CyBasque euskal zibersegurtasun-industrien elkartearen zeregina, eskaintza egituratu eta sektore pribatuaren etorkizuna diseinatzeko. Bi eragileen etengabeko lankidetzaren bidez, ekosistemak gai izan behar du ideiak, talentua eta inbertsioa erakartzeko, eta ingurune optimo bat sortzeko behar diren harreman guztiak dinamizatzek aldera. Ingurune horrek berrikuntza eta ekintzailetza erraztuko ditu, eta parte hartzen duten enpresen ekoizpen-jarduera globala areagotzea eragingo du, bai hornitzaileena bai erabiltzaileena.
Ilusioz, baikortasunez eta sektore pribatuarekin batera lan eginez ekingo diogun erronka handi horri. Hura arrakastaz gainditzeak zibersegurtasun industrialaren euskal sektorearen marka-irudia aitortzen lagundu behar luke, eta Europan erreferentziazkoa den espezializatutako ekosistema gisa.
Informazio gehiago lortzeko, Liburu Zuriaren bigarren argitaraldia deskarga dezakezu esteka honetan. Horrez gain laguntza behar baduzu zure zibersegurtasuna edo zure enpresarena kudeatzeko, eskura jarriko dizugu online katalogo bat, zure beharrizanetarako enpresa eta konponbide egokienak eskainiko dizkizuna.
Online katalogo horretan agertu nahi duten Euskadiko zibersegurtasun-enpresa guztiek informazio gehiago eska dezakete info@bcsc.eus helbide elektronikoan.
Lotutako albisteak
Epea eta aurrekontua zabaldu ditugu, adimen artifizialeko teknologiak barne hartzen dituzten eta Euskadiko enpresen datuen azpiegitura optimizatzen duten proiektuak babesteko.
Laguntza horiek Europar Batasunak finantzatzen ditu NextGenerationEU berreskuratze-planaren bidez, pandemiak eragindako kalteak konpontzeko eta etorkizun jasangarriago, digitalago eta erresilienteago baten oinarriak ezartzeko. Espainian, funts horiek Berreskurapen, Eraldaketa eta Erresilientzia Planaren bidez kudeatzen dira.
Iritsi da zure datuak eta zerbitzuak hodeira migratzeko unea. Aprobetxatu euskal enpresentzako Kloud laguntza
Kloud programak Euskadiko enpresei haien zerbitzu edo azpiegitura informatikoak Cloud ingurune komertzialetara migratzeko aukera eskaintzen die. Horretarako, enpresa bakoitzeko 50.000 € arte eskaintzen du hodeirako migrazio-prozesu osoa diseinatzen eta ezartzen lagunduko dien kanpoko enpresa bat kontratatu ahal izateko. Azaroaren 10ean amaituko da laguntza hori eskatzeko epea.
ApplAI 2025 Kongresuak Adimen Artifizial Aplikatuaren erreferente gisa finkatu du Euskadi nazioartean
230 erakunde baino gehiagoko 500 pertsona bildu dira, eta Euskaditik berrikuntza teknologikoarekin konprometitutako komunitate aktiboa sendotu da
Nuavisek balio erantsi handiko ikusmen artifizialeko soluzioak eskaintzen dizkio industriaren eta elikagaien sektoreari
Enpresak aktiboak monitorizatzeko sistemak garatzen ditu prozesu industrialak hobetzeko
ESGI 188 (European Study Group with Industry) Bilbon izango da 2025eko maiatzaren 26tik 30era
Enpresek problema matematikoak aurkezten dituzte azterketa-taldeak konpon ditzan, askotan modelizazio edo optimizazio moduan.
BeDIGITALek zazpigarren edizioa ospatuko du BECen, enpresa eta erakunde liderren partaidetzarekin
Ekainaren 3tik 5era izango da, +INDUSTRYren esparruan, herrialdeko Smart Manufacturing-ari eskainitako topagunerik handienean. SPRI Taldea erakusketarien artean dago, ‘Invest in the Basque Country’ programarekin.
Zinemaldia Startup Challenge 2025
Izen-ematea: apirilaren 15etik ekainaren 2ra arte
Europako ordezkaritza bat etorri da Euskadira industria teknologiko kuantikoaren lider izateko bertako estrategia hobeto ezagutzeko
Finlandia, Grezia, Italia eta Espainiako ordezkariak izan dira Euskadin Europako QUANTUM+ proiektuan aurrera egiteko. GAIA klusterra da proiektuaren kideetako bat, eta helburu du teknologia kuantikoei buruzko ibilbide eta prestakuntza-plataforma bat garatzea goi-mailako hezkuntzako ikasleentzat, irakasleentzat eta enpresa teknologikoetako profesionalentzat
Egin ezazu prestakuntza-plana zure enpresan Gaitasun Digitalen programarekin
«Gaitasun Digital Profesionalak» programaren edizio berriak 2 milioi euroraino igo du bere aurrekontua, euskal enpresen lehiakortasuna sustatzen jarraitzeko helburuarekin, langileen prestakuntza indartuz.
Adimen artifiziala, blockchaina eta zibersegurtasuna izango dira Elkargiko 35. Enpresa Topaketaren erdigunean
Ekitaldia apirilaren 10ean izango da Donostiako Kursaal Jauregian