DifferEnginek gauzen Interneteko softwarea eta hardwarea garatzen du enpresen beharretara egokituta
30 km-rainoko estaldura duen haririk gabeko komunikazio-sistema bat sortu du Bizkaiko enpresa berri horrek
Oraintsu bete da urtebete konpainia lanean hasi zenetik. Enpresaren sortzaileek, hau da, Ángelek, Judithek eta Jordik nahiago dute “nanoETE” deitura startup baino, luzaroan jarraitu nahi baitute euskal enpresa-sarean. Gauzen Interneteko soluzioak garatzen dituzte zenbait sektoretarako, eta harro asko diote bezeroentzat egindako lanak dituztela finantziazio-iturri bakarrak. BIC Bizkaiaren eta Grupo SPRIren CEDEMI eraikinean dute bulegoa, Barakaldon. Aukera ugari ari zaizkie sortzen, eta etengabe dute proiekturen bat ate joka. Enpresaren zuzendari nagusia eta sortzailea den Ángel A. García Gonzálezekin mintzatu gara.
Nola sortu zen DifferEngin?
EHUko Irrati-maiztasuna eta Mikrouhinak Taldean egiten nuen lan; halako batean, nire ezagutza Telefónicak eta Bizkaiko Foru Aldundiak sortutako Bizkaia Open Futureren Ormazabal Erronkan aplikatzea otu zitzaidan, parke eolikoetako transformazio-zentroetako komunikazioak hobetzeko. Ez nuen lehiaketa irabazi, baina nire lanaren berri izan zuen BIC Bizkaiak (CEDEMI), eta proiektu hau bere instalazioetan garatzera gonbidatu ninduen. Ondoren, Bizkaia Open Futureren Dibal Erronkara aurkeztu ginen. Hura ere ez genuen irabazi, baina, geroago, proiektua garatzeko deitu ziguten. Zenbait ekitalditan izanak gara, eta hainbat jende eta enpresa ezagutu ditugu; haietako batzuen proposamenik jaso izan dugu, eta batzuk bezeroak ditugu gaur egun.
Zer egiten du DifferEnginek?
Gauzen Interneteko garapenak egiten ditugu. Gure iritzian, Gauzen Internet (IoT) ez da produktu bat, baizik eta lehendik bazegoen zerbaiten eboluzioa. Kontua da teknologia eta komunikazioak txertatu behar zaizkiela lehendik existitzen diren produktuei, balio erantsia dakarten prestazio berriak izan ditzaten. Hardwarea eta softwarea garatzen ditugu gure bezeroen produktuetan txertatzeko, eta, hartara, lehiakideengandik bereiz daitezen.
Egiten duzuen lanaren adibideren bat emango al zeniguke?
Altzairuaren sektoreko mundu mailako enpresa batekin ari gara lanean. Gaur egun, edozein-eraikuntza-lanetan, 28 bat egun itxaron behar izaten da hormigoia gogortu arte, edozein dela ere tenperatura edo lekua. SmartSteel izeneko soluzio bat sortu dugu; altzairuaren ondoan jartzen da, eta hormigoia noiz gogortu den detektatzen du. Hori dela eta, denbora aurrezten da. Gailu txiki bat da, eta 40 urteko balio-bizitza du, gaur egun lor daitekeen luzeena. Metro baterainoko hormak zeharkatu eta 30 km-raino bidaltzen du informazioa gailu horrek. Geuk garatu dugu haririk gabeko transmisio-sistema hori. Seinalea bidali eta jaso ondoren, algoritmia egin eta datua prozesatzen dugu, bezeroari behar duen hori eskaintzeko.
Nola funtzionatzen du haririk gabeko transmisio-sistema horrek?
Espektro hedatuko sistema bat da, eta bi teknika desberdin erabiltzen ditu. Alde batetik, askotan bidaltzen da datu bera, iristen dela ziurtatzeko eta zer informazio bidaltzen den egiaztatzeko; bestetik, banda-zabalera txikiagoa erabiltzen dugu. Teknologia horiek lehendik ere hor zeuden, baina guk egokitu egin ditugu sistema propio batera, zeinak eremu irekian 30 km baino gehiagora transmititzeko ahalmena baitauka.
4.0 industriaren alorreko zer beste garapen egiten duzue?
Doitasun-balantzak egiten eta mundu osoan saltzen dituen enpresa ospetsu batekin ere egiten dugu lan. Arazo bat dute balantzek: grabitate-indarra ez da berdina mundu osoan. Horregatik, balantzak kalibratu egin behar ditu langile batek, haiek atzerrira bidali aurretik. Gauzen Interneteko soluzio bat asmatu dugu, sentsorez hornitua, toki bakoitzeko grabitatea neurtzeko eta balantza automatikoki kalibratzeko gai dena, gizakion laguntzarik gabe.
Beste arazo bat ere badute mundu osora saltzen diren produktu horiek: mantentze-lana, arazoren bat sortuz gero. Hori dela eta, NFC sistema bat ere txertatu dugu balantzetan eta, hari esker, hau egin daiteke: bezeroak fabrikatzaileari deitu, balantzaren ondoan jarri NFCdun mugikor bat, eta harekin, VPN bitartez, teknikariari bidali gertatzen ari denari buruzko informazioa. Urrutiko laguntza tekniko berehalakoa, alegia. Adibide horrek erakusten digunez, sentsorika pixka batek eta komunikazioek nabarmen hobetu dezakete produktu bat, eta izugarri jaitsarazi kostu operatiboak.
Hardwarea fabrikatzen duen enpresa ororen erronka nagusietako bat osagaiak lortzea da, eta haien serieko fabrikazioa ziurtatzea. Nola konpontzen dituzue arazo horiek?
Hardwarea hemen diseinatzen dugu; Sentsorikako osagaiak, berriz, AEBtik ekartzen dituzte, eta plaka nagusiak, Txinatik. Azkenik, Mungiako enpresa batek muntatzen ditu zer horiek guztiak. Guri, berriz, alderdirik gogorrena —eta garestiena— dagokigu: prototipoak egitea. Hurrengo urratsa kantitate handiak fabrikatzea izango da, eta Txinako enpresa batekin harremanetan gaude jada. Serieko ekoizpena hasten denean, DifferEngin dezente haziko da, gure ustez. Teknologia sortu nahi dugu, eta, 50 urte barru, sustraiak oraindik hemen eduki eta erreferentziako enpresa izan.
Lotutako albisteak
Veiss-ek 20 urte baino gehiago dihardu tokiko enpresa eta erakundeen eraldaketa digitalean laguntzen
Arabako enpresak webgune korporatiboak, mugikorretarako aplikazioak edo online dendak garatzen ditu sektore mota guztietarako.
Lancor, altxatzeko motor elektrikoen fabrikazioan Europako liderra
Abanto-Zierbenako enpresak SPRI Taldearen Gaitasun Digital Profesionalen programako laguntza jaso du eta esportaziorako produktu propioak garatzearen aldeko apustua egiten du.
Rebel Tickets, sarreren birsalmentan iruzurrari eta gehiegizko prezioei aurre egiteko sortutako enpresa bizkaitarra
Gaur egun, beren publikoari baimendutako birsalmenta eskaini nahi dioten jaialdi, kontzertu eta bestelako ekitaldien sustatzaileekin lan egiten du.
Mercanza: “Bezeroa bere datuen ustiapenean espezializatua bihurtzen dugu”
Enpresak eraldaketa digital tradizionala gaindituz soluzioak eta zerbitzuak eskaintzen ditu, enpresen eraginkortasuna eta produktibitatea bultzatzeko.
EatAmigo, ostalaritzako eskaerak automatizatzeko AA erabiltzen duen tresna
Gipuzkoako enpresak jatetxeekin, ostalaritza kateekin eta elikagai banaketa enpresekin egiten du lan estatu mailan, eta duela gutxi Mexikon lortu du lehen bezeroa.
Zabalgarbik denbora errealeko analisi-tresnekin modernizatu du bere azpiegitura
Besteak beste, biki digitala eta adimen artifizialean oinarritutako teknologiak ezartzeaz gain, lurrun-gainberogailu bat instalatzea du helburu enpresak, energia-eraginkortasuna eta jasangarritasun operatiboa hobetzeko ekimen estrategiko bat.
GAIAk IKT sektorearen prestakuntza-beharren diagnostikoa egin du eta merkatuaren eskaerei erantzuteko prestakuntza-ibilbideak garatu ditu
GAIAk azpimarratu duenez, sektoreko eta gobernuko erakundeen, sozietate publikoen eta hezkuntza-sistemaren parte-hartzea funtsezkoa izan da azterlanari balio erantsia emateko
Senvia Systems-ek beste enpresa batzuk gidatzen ditu haien sustapenean eta eraldaketa digitalean
Iaz sortutako enpresa gipuzkoarrak sistemetan, komunikazioetan eta zibersegurtasunean oinarritutako IT zerbitzuak eta aholkularitza eskaintzen ditu.
Akting, gizarteari balioa emateko teknologia
Gipuzkoako enpresak euskarri desberdinetarako aplikazioak garatzen ditu eta digitalizazioaren, datuen analisiaren eta prozesuen optimizazioaren aldeko apustua egiten du.
Biotz: “Roca Salvatellarekin egindako akordioak berrikuntza teknologikoaren balio-kate osoa batzen du”
Gipuzkoako enpresak Kataluniakoarekin aliantza bat itxi du bere talentu digitala indartzeko eta nazioarteko merkatu berrietan bere presentzia zabaltzeko.