BIND 4.0 programak, seigarren edizioan, trakzio-enpresa berriak bilatzen ditu mundu osoko startupekin proiektu berritzaileak garatzeko
Azken edizioan 57 konpainia liderrek parte hartu dute; horien artean zeuden, besteak beste, Mercedes-Benz, Unilever, Siemens Gamesa, CAF eta Eroski.
Aukera bikaina da berrikuntza irekiko plataforman parte hartzeko, adimen artifizialeko, errealitate areagotuko, robotikako edo zibersegurtasuneko startup disruptiboekin lankidetzan jardun eta enpresen lehiakortasuna hobetzeko eta 4.0 industriako munduko liderrekin konektatzeko
Martxoaren 17an eta 18an egingo dira BIND 4.0 programaren partner izateko interesa dutenei programaren xehetasunak eta onurak aurkezteko online jardunaldiak
Industria adimenduneko berrikuntza irekiko BIND 4.0 plataformak 6. edizioaren deialdia ireki du, mundu osoko startupen teknologia eta soluzio disruptiboak txertatzeari esker merkatuan lider izateko interesa duten trakzio-enpresek parte har dezaten. Izena emateko epea gaurtik apirilaren 16ra arte egongo da irekita. Aukera paregabea da Euskal Autonomia Erkidegoan ezarritako erreferentziako konpainientzat —fabrikazio aurreratuaren, energiaren, osasunaren eta elikaduraren sektoreetakoak—, adimen artifizialeko, errealitate areagotuko, robotikako edo zibersegurtasuneko soluzio disruptiboak irispidean izateko, lehiakortasuna hobetzeko eta 4.0 industriako munduko liderrekin konektatzeko, startupekiko lankidetzaren bitartez.
- urtean hasi zenetik, BIND 4.0 programak 130 startup baino gehiago azeleratu ditu eta 200 proiektu baino gehiagoren garapena sustatu du, 6,5 milioi eurotik gorako fakturazioarekin. Izan ere, Ekonomiaren Garapen, Jasangarritasun eta Ingurumen Sailaren ekimen publiko-pribatu hori —SPRI Taldearen eta ekintzailetzaren euskal ekosistemaren UpEuskadi plataformaren bitartez kudeatzen da— mundu osoko 4.0 industriaren berrikuntza irekiaren eta azelerazioaren erreferente bihurtu da.
Izatez, BIND 4.0 plataformak irabazi du Enpresa Sustapenerako Europako Sarien XIV. edizioa, enpresa-ingurunearen hobekuntzaren kategorian. Sari horiek Europako Batzordeko Barne Merkatuko, Industriako, Ekintzailetzako eta ETE-etako Zuzendaritza Nagusiak antolatzen ditu. Eta Gartner nazioarteko aholkularitza-enpresak ekosistema industrialen berrikuntza bultzatzeko hautatutako plataformetako bat izan zen.
Programan parte hartzearen onurak
Erreferentziako 57 konpainiak ezagutzen dituzte dagoeneko munduko 4.0 industria azeleratzeko programa garrantzitsuenetako batean parte hartzearen onurak. Izan ere, berrikuntza-ekosistema horretako kide izateak aukera asko eskaini dizkie nazioartean lehiakortasuna eta lidergoa handitzeko. Hori lortzeko, BIND 4.0 programak munduko startup onenak detektatzen, ezagutzen eta haiekin harremanetan jartzen laguntzen du, baita trakzio-enpresen erronka teknologikoak betetzeko gai diren kalitate handieneko enpresen scoutinga ahalbidetu ere. Halaber, proiektu berritzaileen garapena dinamizatzen du, epe laburrean ikus daitezkeen emaitzak lortuta, eta trakzio-enpresei laguntza eskaintzen die gaitasun berriak garatzeko, startup berritzaileekin lan egiteari ahalik eta etekin handiena ateratzeko. Azkenik, berrikuntza irekiko eta 4.0 industriako lider eta adituekin konektatzen ditu partnerrak.
Mercedes-Benz, Unilever, Siemens Gamesa, CAF edo Eroski berrikuntza irekiko plataforma horretan parte hartzen duten lehen mailako enpresen adibide batzuk besterik ez dira. Abian jarri zenetik, startupen 2.400 hautagaitza baino gehiago jaso ditu. Izan ere, berrikuntza irekiko plataforma horrek indartu egiten du Euskal Autonomia Erkidegoak nazioarteko erreferentziako berrikuntza industrialeko ekosistema gisa duen posizioa. Hori dela eta, startupek BIND 4.0 programaren aldeko apustua egiten jarraitzen dute, erreferentziako bezeroen eskutik merkatura bizkorrago iristeko.
Zein dira BIND 4.0 programan parte hartzeko baldintzak?
BIND 4.0 programako trakzio-konpainia gisa parte hartu ahal izateko baldintza jakin batzuk bete behar dira. Lehenik, manufaktura aurreratuaren, energiaren, osasunaren edo elikaduraren esparruei lotutako enpresa izan behar du eta, gutxienez, jarduera-zentro bat izan behar du Euskal Autonomia Erkidegoan. Bigarrenik, guztira 250 langile baino gehiago izan behar ditu, eta startupekin lan egiteko interes eta konpromiso handia.
Eta, azkenik, programan aintzat hartutako jardueretan aritzeko eta inplikatzeko prest egon behar du: aurkezpen-ekitaldietan, startupak ebaluatzeko eta hautatzeko prozesuetan, startupen mentorizazioan eta, besteak beste, azelerazio-programaren Demo Day jardunaldian parte hartzen.
Eusko Jaurlaritzako Ekintzailetzaren, Berrikuntzaren eta Informazioaren Gizartearen zuzendari Leyre Madariagaren iritziz: “Trakzio-enpresak BIND 4.0 programaren zutabeak dira. 5 edizio egin ondoren, 200 proiektu baino gehiago gauzatu dituzten 50 partner baino gehiagoren babesa izaten jarraitzea ohore handia da, eta BIND 4.0 programak transformazio digitalari ematen dizkion balioa eta onurak bermatzen ditu. Egingo den 6. edizio honetan lanean jarraituko dugu 4.0 industrian aurrera egiteko behar diren tresna guztiak eskaintzeko eta sektoreko eragile guztien topagunea izateko”, adierazi du.
Partner berrientzako deialdiko jardunaldiak: ezagutu BIND 4.0 programaren onurak eta bertan nola parte hartu
- Martxoaren 17a, 09:00etatik 10:00etara – Enpresa industrialentzako web-mintegia: manufaktura aurreratua eta energia. Batz enpresak parte hartuko du bere esperientzia aurkezteko.
- Martxoaren 18a, 09:00etatik 09:45era – Sektore soziosanitarioko erakundeentzako eta elikaduraren balio-kateko enpresentzako web-mintegia. Quironsalud eta Angulas Aguinaga enpresek beren esperientzien berri emango dute.
Informazio gehiago eskuratzeko eta BIND 4.0 programan partner gisa erregistratzeko: info@bind40.com eta www.bind40.com.
BIND 4.0-ri buruz
BIND 4.0 industria adimenduneko berrikuntza irekiko plataforma publiko-pribatu bat da, Ekonomiaren Garapen, Jasangarritasun eta Ingurumen Sailak SPRI Taldearen eta Euskal Autonomia Erkidegoko ekintzailetzaren ekosistemako UpEuskadi plataformaren bitartez sortua. Gaur egun, Euskal Autonomia Erkidegoan egoitza duten erreferentziako 57 enpresa nagusirekin lankidetzan dihardu, eta nazioarteko laguntzaile teknologikoek ere parte hartzen dute, hala nola Siemens, Microsoft eta Amazon Web Services-ek. Ekimena helburu bikoitzarekin sortu zen, hots, industriaren transformazio digitala bultzatzeko, eta, aldi berean, ekimen berritzaileak sendotzeko prozesua enpresa handien eta startupen arteko lankidetza-eredu baten bitartez azeleratzeko. 2016. urteaz geroztik, BIND 4.0 plataformak 130 startupek baino gehiagok garatu dituzten 200 proiektu azeleratu ditu egin dituen bost edizioetan.
BIND 4.0 trakzio-enpresak:
ABB, Aernnova, Angulas Aguinaga, Arcelor Mittal, Artadi Alimentación, AVIA, BATZ, Biele Group, Bridgestone, BTI, CAF, CIE Automotive, Cikautxo Group, Coca-Cola European Partners, DanobatGroup, EDP España, Egile, Elecnor, Enagás, Erhardt, Eroski, Euskaltel, FAES Farma, Fagor Ederlan, Ferrovial, Gestamp, GH Cranes & Components, Grupo Alcor, Iberdrola, IMQ Group, Ingeteam, ITP Aero, Keralty, Maier, Mercedes-Benz, Michelin, Mondragon BDC, Natra, OBE Hettich, Onkologikoa, Orona, Quirónsalud, Repsol – Petronor, Roxall Group, RPK, Sarralle, Sener, Sidenor, Siemens Gamesa, SNA Europe, Tubacex, Tubos Reunidos, Ulma, Unilever, Uvesco Group, Vidrala, Viuda de Sainz.
Lotutako albisteak
Eusko Jaurlaritzak startup disruptiboen talentua eskuratzeko aukera emango die EAEko ETEei
SPRIk BIND SMEren 5. edizioa ireki du, EAEko ETEek startup berritzaileekin elkarlanean jardun eta haien lehiakortasuna hobetzeko. Deialdia uztailaren 4ra arte egongo da zabalik. Hautatutako ETEek teknologia disruptiboetara eta talentu berritzailera sarbidea izango dute, IA, jasangarritasuna edo Smart Factory bezalako arloetan soluzioak garatzeko.
ESGI 188 (European Study Group with Industry) Bilbon izango da 2025eko maiatzaren 26tik 30era
Enpresek problema matematikoak aurkezten dituzte azterketa-taldeak konpon ditzan, askotan modelizazio edo optimizazio moduan.
BeDIGITALek zazpigarren edizioa ospatuko du BECen, enpresa eta erakunde liderren partaidetzarekin
Ekainaren 3tik 5era izango da, +INDUSTRYren esparruan, herrialdeko Smart Manufacturing-ari eskainitako topagunerik handienean. SPRI Taldea erakusketarien artean dago, ‘Invest in the Basque Country’ programarekin.
Zinemaldia Startup Challenge 2025
Izen-ematea: apirilaren 15etik ekainaren 2ra arte
Europako ordezkaritza bat etorri da Euskadira industria teknologiko kuantikoaren lider izateko bertako estrategia hobeto ezagutzeko
Finlandia, Grezia, Italia eta Espainiako ordezkariak izan dira Euskadin Europako QUANTUM+ proiektuan aurrera egiteko. GAIA klusterra da proiektuaren kideetako bat, eta helburu du teknologia kuantikoei buruzko ibilbide eta prestakuntza-plataforma bat garatzea goi-mailako hezkuntzako ikasleentzat, irakasleentzat eta enpresa teknologikoetako profesionalentzat
Egin ezazu prestakuntza-plana zure enpresan Gaitasun Digitalen programarekin
«Gaitasun Digital Profesionalak» programaren edizio berriak 2 milioi euroraino igo du bere aurrekontua, euskal enpresen lehiakortasuna sustatzen jarraitzeko helburuarekin, langileen prestakuntza indartuz.
NudgeXperience Bilbon: CX eta Portaera Zientzien ekitaldia
Zuzendariei eta gerenteei, Cx-eko arduradunei eta berrikuntza eta marketineko profesionalei zuzendua
Wake Up! Albiste ekintzaile batzuk sarean 250324
Euskadiko talentu ekintzaile guztia. Wake up! -ek komunikabide eta sareko blog desberdinek argitaratutako albisteen hautaketa txiki bat egunero partekatzen du Linkedinen: ideiak, proiektuak, negozioak, startupak, enpresak etab.
Zabalik dago MAKE IN! Ekintzailetza Industriala programaren 4. ediziorako izen-emate epea
Apirilaren 25a izango da programan izena emateko azken eguna
Wake Up! Albiste ekintzaile batzuk sarean
Euskadiko talentu ekintzaile guztia. Wake up! -ek komunikabide eta sareko blog desberdinek argitaratutako albisteen hautaketa txiki bat egunero partekatzen du Linkedinen: ideiak, proiektuak, negozioak, startupak, enpresak etab.