3D inprimaketaren sektorean ordezko pieza digitalak saltzeko lehen e-commerce-a sortu da Miñanon
Klima-aldaketa XXI. mendeko erronka nagusia izanik, negozio-eredu eta ekoizpen-modu berriak sortzen ari dira industria iraunkorrago baterantz igarotzeko. Testuinguru horretan, eta SPRI Taldearen laguntzarekin, BIC Araba enpresa-inkubagailuaren eta Bind 4.0 programaren bidez, Autentica sortu da duela urtebete eskas, ordezkapen digitalak saltzeko lehen e-commerce plataforma, ekoizpena kudeatu eta koordinatzen duena 3D inprimatze-sare global deszentralizatu batekin.
Inbentario digital enkriptatua, blockchain teknologia eta adimen artifiziala elkartzen dira plataforma honetan, eta horren emaitza 3D inprimaketarako hornidura digitalen kate bat da, edozein unetan eta edonon. Hala azaldu du Irma Vitorianok, Autenticako sortzaile eta CEOak: “Jatorrizko ekipoen fabrikatzaileek (OEMak), marken diseinatzaileek edo jabeek, pieza digitala frogatuta, ziurtatuta eta ekoizpenerako prest dute fabrikazio-informazioarekin. Fitxategi digital horiek Autentica merkataritza elektronikoko plataforman kargatzen dira, azken erabiltzaileak bere eskaera egin dezan, pieza fisiko batekin egingo lukeen bezalaxe. 24 ordutan artxiboa entregatzen da eta klik bakarrarekin inprima daiteke, eskaeraren arabera”.
Horrela, automobil-kontzesionario batek edo autoko tailer mekaniko batek, adibidez, 3D inprimatze-lizentzia eros dezake eta ordezko piezak inprimatu tokian (in-house); edo OEMek, diseinatzaileek edo marken jabeek 3D inprimatze-lizentziak sal ditzakete pieza fisikoen ordez. Horrela, Vitorianok dioenez, “biltegiratze- eta garraio-kostuak eta, azken finean, hornidura-katearen guztizko inbentarioaren kostua % 47 murrizten da”.
Baina ez kostua bakarrik; plataformako CEOak ziurtatzen du Industria NetZero izenez ezagutzen den negozio-eredu berri hori aplikatzeak “% 40 murrizten duela biltegiratzeak eta garraioak sortutako CO2 aztarna. Izan ere, azken kalkuluen arabera, datuak digitalki bidaltzeak CO2 emisioen tona-laurden bat sortzen du, eta itsasoz, lurrez edo airez 1.300 pieza fisiko garraiatzeak, berriz, 300 inguru. Hori adierazgarria da, izan ere, baliabideen eraginkortasuna eta karbono-aztarnaren murrizketa bizi-erronka bihurtu dira gaur egungo fabrikazio industrialerako, eta irmoki uste dut tokiko ekoizpena eta eskariaren araberako produktuen fabrikazioa behar bat bihurtuko dela, soberakinak saihesten baititu, eta baita hondakinak zuzenean gutxitu ere”.
Blockchain kalitatea bermatzeko eta datuak babesteko
Autentica blockchain teknologian oinarritzen da kalitatezko zerbitzu seguru bat eskaintzeko, eta I-Print 3D Spares-ek garatutako blockchain sare pribatuaren bidez egiten du hori, hots, ‘Autentica Printing Audit System’. Smart contract negozio-logika duen auditoretza-sistema bat da, datuen segurtasunari eta kalitateari dagokienez hiru helburu jorratzea ahalbidetzen duena. Alde batetik, artxibo bakoitzaren benetakotasuna eta berezitasuna ziurtatzen ditu. “Algoritmo kriptografiko batek fitxategi bakoitzerako bakarra den ‘hash’ edo aztarna digital bat sortzen du, edukiaren arabera. Horrek esan nahi du bi fitxategik ez dutela ‘hash’ berdina izango, guztiz berdinak ez badira behintzat; datuei buruzko edozein gauza aldatzeak beste ‘hash’ bat ekarriko du. Beraz, bloke-katean biltegiratzen dena ez da fitxategia bera, baizik eta piezaren benetakotasuna eta berezitasuna egiaztatzen duen ‘hash’ hori. Hau da, 3Dko fitxategi inprimagarri bat artefaktu digital bihurtzen da blokeen katean”, zehazten du Vitorianok.
Bestalde, sistema honek datuetarako sarbidea babesten du. 3D fitxategiak zifratu eta tokenizatu egiten dira, eta biltegiratutako ‘hash’-ekin lotzen dira. Objektu inprimagarri bat partekatzen denean, hartzaileak sartzeko aukera ematen duen token bat lortzen du, eta horri esker, CEOak ziurtatzen duenez, “ezinezkoa da fitxategia deszifratzea token hori gabe, eta horrek bermatzen du baimendutako zatiek bakarrik erabil ditzaketela 3Dn inprima daitezkeen datuak”.
Azkenik, soluzioari esker, aktibo jakin batetik abiatuta egin daitekeen inpresio kopurua murriztu daiteke, inpresio bakoitzak token bateko “kostua” baitu. Horrela, Vitorianok azaldu duenez, “enpresek toke horietan oinarritutako ekoizpen-serieak egin ditzakete, artxibo jakin bat edukitzeko sarbide osoa ordaindu beharrean. Horren ondorioz, 3D inprimaketa bideragarriagoa eta eskuragarriagoa da, bai erabiltzaile komertzialentzat, bai ez-komertzialentzat”.
Prozesu horren guztiaren aurretik, 3D fitxategiei ikuskapen-azterketa egiten zaie, diseinuak 3D inprimaketarako egokiak direla bermatzeko. Horretarako, plataformak Autenticak duen diseinu-gida erabiltzen du, Alemaniako TÜV Süd ikuskapen-agentzia baimenduak ziurtatutako estandarrez gain, ISO 9001, ISO 14001 eta OHSAS 18001 baldintzen arabera.
Orain arte Autenticak automobilgintzaren sektorera bideratu du bere eskaintza. Izan ere, automobilen kontzesionario handi batekin ari da lanean, hornidura digitaleko katea haren operazioetan inplementatzeko, ordezko piezak in situ ekoizteko. Hala ere, beste sektore batzuetara zabaltzen ari da, hala nola kontsumo-elektronikara edo aktiboak kudeatzeko energiara, batez ere zentral hidroelektriko, termiko, eoliko eta orubeen operazio- eta mantentze-jardueretarako ordezkoetara. “Etorkizunean gure sistema 3Dn inprimatutako etxeetarako eta sektore medikorako neurrira egindako protesietarako eskaintzea espero dugu. Horretarako, SPRI Taldeak eskainitako programak eskatzen jarraituko dugu, Bind 4.0 programan parte hartzen esperientzia bikaina izan ondoren. Programa horrek bezero korporatibo askorekin harremanetan jartzen lagundu zigun”, Vitorianok dioenez.
SPRI Taldearen helburuetako bat euskal enpresen eraldaketa digitala da. Besteak beste, Basque Industry 4.0, BDIH Konexio, Zibersegurtasun Industriala, Enpresa Digitala edo Inplantalariak laguntza-programen bidez bultzatzen du.
Lotutako albisteak
Epea eta aurrekontua zabaldu ditugu, adimen artifizialeko teknologiak barne hartzen dituzten eta Euskadiko enpresen datuen azpiegitura optimizatzen duten proiektuak babesteko.
Laguntza horiek Europar Batasunak finantzatzen ditu NextGenerationEU berreskuratze-planaren bidez, pandemiak eragindako kalteak konpontzeko eta etorkizun jasangarriago, digitalago eta erresilienteago baten oinarriak ezartzeko. Espainian, funts horiek Berreskurapen, Eraldaketa eta Erresilientzia Planaren bidez kudeatzen dira.
Iritsi da zure datuak eta zerbitzuak hodeira migratzeko unea. Aprobetxatu euskal enpresentzako Kloud laguntza
Kloud programak Euskadiko enpresei haien zerbitzu edo azpiegitura informatikoak Cloud ingurune komertzialetara migratzeko aukera eskaintzen die. Horretarako, enpresa bakoitzeko 50.000 € arte eskaintzen du hodeirako migrazio-prozesu osoa diseinatzen eta ezartzen lagunduko dien kanpoko enpresa bat kontratatu ahal izateko. Azaroaren 10ean amaituko da laguntza hori eskatzeko epea.
ApplAI 2025 Kongresuak Adimen Artifizial Aplikatuaren erreferente gisa finkatu du Euskadi nazioartean
230 erakunde baino gehiagoko 500 pertsona bildu dira, eta Euskaditik berrikuntza teknologikoarekin konprometitutako komunitate aktiboa sendotu da
Nuavisek balio erantsi handiko ikusmen artifizialeko soluzioak eskaintzen dizkio industriaren eta elikagaien sektoreari
Enpresak aktiboak monitorizatzeko sistemak garatzen ditu prozesu industrialak hobetzeko
BeDIGITALek zazpigarren edizioa ospatuko du BECen, enpresa eta erakunde liderren partaidetzarekin
Ekainaren 3tik 5era izango da, +INDUSTRYren esparruan, herrialdeko Smart Manufacturing-ari eskainitako topagunerik handienean. SPRI Taldea erakusketarien artean dago, ‘Invest in the Basque Country’ programarekin.
Zinemaldia Startup Challenge 2025
Izen-ematea: apirilaren 15etik ekainaren 2ra arte
Europako ordezkaritza bat etorri da Euskadira industria teknologiko kuantikoaren lider izateko bertako estrategia hobeto ezagutzeko
Finlandia, Grezia, Italia eta Espainiako ordezkariak izan dira Euskadin Europako QUANTUM+ proiektuan aurrera egiteko. GAIA klusterra da proiektuaren kideetako bat, eta helburu du teknologia kuantikoei buruzko ibilbide eta prestakuntza-plataforma bat garatzea goi-mailako hezkuntzako ikasleentzat, irakasleentzat eta enpresa teknologikoetako profesionalentzat
Egin ezazu prestakuntza-plana zure enpresan Gaitasun Digitalen programarekin
«Gaitasun Digital Profesionalak» programaren edizio berriak 2 milioi euroraino igo du bere aurrekontua, euskal enpresen lehiakortasuna sustatzen jarraitzeko helburuarekin, langileen prestakuntza indartuz.
% 64 egin dute gora Eusko Jaurlaritzak SPRIren bitartez antolatutako IKT arloko prestakuntzara joandakoek
Enpresa Digitala ekimena 3 lurraldeetako bost gune fisikotan eskaintzen da eta ireki den azkena Ezkerraldekoa izan da, Abantoko campusean
Irudi B2B: 7 urte marketin digital industriala aztertzen bere blogaren bidez
Bere blogaren helburua: ezagutza erabilgarria partekatzea, industriak kanal digitalaren potentziala ahalik eta gehien aprobetxa dezan.