3 milioiko laguntzak euskal enpresetan adimen artifizialeko proiektuak garatzeko
Dagoeneko eskatu daitezke Adimen Artifizial Aplikaturako laguntzak, Eusko Jaurlaritzak urtero SPRI Taldearen bidez eskaintzen dituenak. Programa honen bidez posible duzu itzuli beharrik gabeko dirulaguntza bat jasotzea zure adimen artifizialeko proiektuaren gastu eta inbertsioen % 50 ordaintzeko.
Adimen artifiziala, enpresen eraldaketa digitalaren giltza
Eskaerak egiteko epea zabalik egongo da 2023ko maiatzaren 23tik urriaren 5era.
Adimen Artifiziala (AA) oinarrizko diziplina bilakatu da, eta eragin sakona du gizarte eta ekonomia berrietarantz hasi dugun trantsizio azkar honetan. Iraultza teknologiko horrek aurrera egingo badu, euskal enpresek estrategikoki integratu behar dute AA euren ikerketa, garapen teknologiko eta berrikuntza prozesuetan, irabazi ekonomiko eta sozialak sortzeko gure herriarentzat.
Euskal enpresek erronka handiak dituzte, eta horretarako datuen eta adimen artifizialaren erabilera eskalatu beharko dute beren balio-kate osoan. Erronka garrantzitsuenetako batzuk dira lehiakortasuna bultzatzea, prozesu industrialak automatizatu eta optimizatuz, jasangarritasuna hobetzea, energia eraginkortasuna hobetuz, eta ikuspegi berriak txertatzea osasun tratamenduetan eta zaintza lanetan.
Testuinguru horretan, euskal enpresek aprobetxatu egin behar dituzte adimen artifizialak eskaintzen dizkien aukerak. AAn oinarritutako konponbideak estrategikoki inplementatuz, gai izango dira euren eraginkortasun operatiboa hobetzeko, erabakiak hartzeko prozesuak optimizatzeko eta hazkunderako aukera berriak zabaltzeko. Gainera, inpaktu positiboa izango dute gizartean, bizi-kalitatea hobetuz, jasangarritasuna sustatuz eta euren hondar aletxoa jarriz Euskadiren aurrerapen teknologikoan.
Eusko Jaurlaritzaren eta SPRI Taldearen iritziz, premia estrategiko bat da Adimen Artifizialeko teknikak txertatzea enpresa-sarean. Helburu horrexekin plazaratu da Adimen Artifizial Aplikaturako Laguntza Programaren edizio berri hau. Ekimen honen helburua da enpresek Adimen Artifizialean oinarritutako konponbideak txerta ditzatela, finantza laguntzak eskainiz horrelako teknologiak inplementatu eta euren operazio zein emaitzetan onura ukigarriak eskuratu nahi dituzten enpresei. Aukera hau aprobetxatu nahi baduzu, dagoeneko aurkeztu dezakezu zure eskaera.
Laguntza honekin finantzatu ditzakezun 5 AA teknologia
Adimen artifizialeko proiektuetarako laguntza honen bidez, bultzada bat eman diezaiokezu zure negozioari AA teknologia aurreratuak aplikatuz, zeintzuei esker gai izango baitzara zure produkzioko gaitasunak hobetzeko, prozesuak optimizatzeko eta erabaki informatuagoak hartzeko.
- Ikaskuntza automatikoa (Machine Learning): Teknologia honen bidez zure enpresaren datuetan ezkutatuta dauden patroi eta joerak identifikatuko dituzu, eta gai izango zara etorkizuneko eskaera aurreikusteko, produkzioko botila-lepoak identifikatzeko edo etor daitezkeen arazoei aurrea hartzeko.
- Ikusmen artifiziala: Ikusmen-sistemak erabili ahal izango dituzu produktuak edo osagaia automatikoki ikuskatzeko eta akatsak edo anomaliak denbora errealean detektatzeko. Horrek lagunduko dizu zure produktuaren kalitatea hobetzen, produkzioko kostuak murrizten eta akats garestiak saihesten. Baita ere erabil dezakezu zure produkzio-lerroko produktuen fluxua arakatu eta optimizatzeko.
- Prozesuen automatizazioa: Posible duzu AA erabiltzea produkzioko prozesu batzuk automatizatzeko. Adibidez, robot edo beso robotikoek zeregin errepikakor edo arriskutsuak egin ditzakete, eraginkortasuna hobetuz eta giza akatsen arriskua murriztuz. AA konputagailu bidezko ikusizko sistemekin konbinatzean, posible da orobat prozesu kritikoak automatizatzea, esaterako, kalitatearen kontrola.
- Mantenimendu prediktiboa: Posible duzu AA erabiltzea makineria eta ekipoen mantenimenduan, bai akatsak prebenitzeko, eta baita ere planifikatu gabeko jarduerarik gabeko denbora-tarteak murrizteko. Adibidez, sentsoreak eta datuen denbora errealeko analisia baliatu ditzakezu zure ekipoen errendimendua monitorizatzeko eta higaduraren seinale goiztiarrak edo matxurak detektatzeko.
- Programazioaren eta logistikaren optimizazioa: AAko algoritmo aurreratuak lagungarri dira produkzioaren programazioa optimizatzeko, gai baitira zehazteko zein den momentu onena zenbait zeregin egiteko edo produkzioa egokitzeko uneko eskaeraren arabera. Gainera, gauza dira logistika optimizatzeko, produktuen garraiorako ibilbide eraginkorrenak finkatuz edo inbentarioa kudeatuz.
Euskal enpresek dagoeneko erabiltzen dute AA
AAk potentzial handia dauka sektore askotan
Azken urteotan, euskal enpresa gero eta gehiagok aitortu dute Adimen Artifizialaren (AA) potentziala, eta asko inbertitu dute teknologia honetan gure laguntza programari esker. Enpresa horiek emaitza bikainak lortu dituzte euren prozesu nahiz operazioetan AA aplikatu ondoren. Ikuspegi berritzaile horri esker, euskal enpresa asko lider bilakatu dira euren sektoreetan, eta lehiakorrago egin dira bai Estatuan eta bai nazioartean.
- Adimen Artifiziala industrian
Optimitive startup arabarrak AAko algoritmoak eta Machine Learning erabiltzen ditu prozesu industrialetarako doikuntza optimoak gomendatzeko, eta horrek aukera ematen die industriei datuetan oinarritutako erabakiak hartzeko. Bestalde, Couth enpresak trazagarritasun eta ikusmen artifizialeko sistemak erabiltzen ditu produkzioaren eraginkortasuna hobetu eta kalitate gabeziaren kostuak murrizteko. - Adimen Artifiziala osasun arloan
Wattio enpresak AA darabilen sistema domotiko bat garatu du bakarrik bizi diren pertsona nagusien zaintzarako. 30 egunean pertsona horren errutina ikasten du, eta jakinarazpenak bidaltzen ditu anomaliak detektatzen baditu, esaterako, ate bat zabalik badago ordu txikitan edo gelditasuna sumatzen badu. - Adimen Artifiziala eta robotika
Ideko enpresak robot industrial adimendunen belaunaldi berri baten garapena gidatu du itsas, aeronautika eta energia sektoreetarako. AAko teknologiak eta robotika baliatuz lortu dute eskuzko prozesuak automatizatzea eta produkzio-prozesu berrietara egokitzeko kostuak murriztea. - Adimen Artifiziala finantzen arloan
Sherpa.ai enpresak AAko plataforma bat eskaintzen du iruzurrak hobeto detektatzeko banku eta finantza-erakundeetan. AAko algoritmoek datuak aztertzen dituzte modu kolaboratiboan eta bezeroaren pribatutasuna errespetatzen dute. Hala, patroiak eta anomaliak identifikatzen dituzte iruzurrak prebenitzeko eta erakunde nahiz bezeroen interesak babesteko. - Adimen Artifiziala marketin arloan
Quarizmi AdTech enpresak iraultza eragin du onlineko marketinean, bilatzaileetako kanpainen kudeaketa automatikoarekin. Konpainia honen AAk aukerak detektatzen ditu eta norbere zein lehiakideen kanpainak aztertzen ditu. Bestalde, Vidext enpresak AA erabiltzen du bideo profesionalak sortzeko, testuak eta pertsona errealen irudiak sinkronizatuz eta 40 hizkuntza baino gehiagotara itzuliz. - Adimen Artifiziala automobilgintzan
TIMON enpresak AA eta Big Data erabiltzen ditu errepideko mugikortasuna hobetzeko, segurtasuna eta eraginkortasuna handituz. Hona hemen eskaintzen dituen zerbitzu batzuk: denbora errealeko alertak, auto-ilarak prebenitzeko zerbitzuak eta ibilgailu arteko komunikazioa. - Adimen Artifiziala energia arloan
Sherpa.ai plataformak eraginkortasun operatiboa bultzatzen du energiaren industrian AA erabiliz. Ikaskuntza Federatuari esker posible da energia-kontsumoa % 70 gutxitzea ereduen entrenamenduan, baina konpainia honen konponbidea gai da kontsumo hori are gehiago gutxitzeko. - Adimen Artifiziala logistikan
SmartLog enpresak prozesu intralogistikoen automatizazioa optimizatzen du hainbat teknologia konbinatuz: erabateko konektagarritasuna, Big Data, Adimen Artifiziala, Machine Learning… Horri esker, enpresek espazioak berrantola ditzakete eta eskaerak azkarrago prestatu, produktibitatea handituz eraginkortasunaren eta kalitatearen aldetik.
Laburbilduz, AAk potentzial handia dauka sektore askotan, eta teknologia hori aplikatzeak abantaila esanguratsuak sor ditzake eraginkortasunean, zehaztasunean, pertsonalizazioan, datuetan oinarritutako erabakiak hartzeko orduan, etab.
Adimen Artifizial aplikatuko proiektuetarako laguntzak
Hauxe da unea adimen artifizialaren indar eraldatzailea aprobetxatzeko zure proiektuetan! Eskatu adimen artifizialeko proiektuak garatzeko eskaintzen dugun laguntza; proiektuaren gastu eta inbertsioen % 50erainoko dirulaguntza emango dizugu 100.000 €-ko mugarekin.
Laguntza horri esker, ekintzaile, autonomo edo enpresek finantza babesa izango dute adimen artifiziala aplikatzeko behar diren hardware eta software espezializatuak erosteko. Gainera, dirulaguntzaren barruan sartzen dira beharrezko aholkularitza eta ingeniaritza zerbitzuak, proiektuak arrakasta izan dezan.
Aukera paregabea da zure ideia berritzaileak bultzatu eta hurrengo mailara eramateko. Ez itxaron gehiago, eskatu gure laguntza urriaren 5a baino lehen!
Lotutako albisteak
EBN 2025 kongresua BIC Bizkaia Ezkerraldean egingo da
Kongresua aukera paregabea izango da industria-energia trantsizioaren inguruan eztabaidatzeko, gure lurralde eta ekonomien etorkizunerako funtsezko gaia baita.
Epea eta aurrekontua zabaldu ditugu, adimen artifizialeko teknologiak barne hartzen dituzten eta Euskadiko enpresen datuen azpiegitura optimizatzen duten proiektuak babesteko.
Laguntza horiek Europar Batasunak finantzatzen ditu NextGenerationEU berreskuratze-planaren bidez, pandemiak eragindako kalteak konpontzeko eta etorkizun jasangarriago, digitalago eta erresilienteago baten oinarriak ezartzeko. Espainian, funts horiek Berreskurapen, Eraldaketa eta Erresilientzia Planaren bidez kudeatzen dira.
INIZIA sariak banatu dituzte, INIZIA DAY jardunaldian
Horien helburua da oinarri teknologikoa duten eta/edo berritzaileak diren enpresa egitasmoak biltzen dituzten proiektuak aitortzea
Ekintzaileentzako laguntzak: Bihur ezazu zure negozio ideia enpresa berritzaile eta errentagarri Ekintzailerekin
Ideia berritzaile bat duzu eta enpresa bihurtu nahi duzu? Orduan interesatzen zaizu Ekintzaile 2025, programa ezagutzea. Ekintzailetza bultzatzeko laguntza horrek laguntza ekonomikoa eta adituen aholkularitza eskainiko dizkizu zure proiektua bideragarria eta arrakastatsua izan dadin.
Nola izan enpresa ekintzaile bat Barnekintzaile programarekin, barne-ekiteko laguntza.
800.000 euroko aurrekontua du Barnekintzaile 2025 barne-ekintzailetzarako laguntza-programaren edizio berriak. Enpresa-proiektu berriak garatzeko edo jarduera berrietara dibertsifikatzeko laguntza eskuratu nahi duten enpresek abenduaren 11ra arte aurkez ditzakete eskaerak.
Iritsi da zure datuak eta zerbitzuak hodeira migratzeko unea. Aprobetxatu euskal enpresentzako Kloud laguntza
Kloud programak Euskadiko enpresei haien zerbitzu edo azpiegitura informatikoak Cloud ingurune komertzialetara migratzeko aukera eskaintzen die. Horretarako, enpresa bakoitzeko 50.000 € arte eskaintzen du hodeirako migrazio-prozesu osoa diseinatzen eta ezartzen lagunduko dien kanpoko enpresa bat kontratatu ahal izateko. Azaroaren 10ean amaituko da laguntza hori eskatzeko epea.
ApplAI 2025 Kongresuak Adimen Artifizial Aplikatuaren erreferente gisa finkatu du Euskadi nazioartean
230 erakunde baino gehiagoko 500 pertsona bildu dira, eta Euskaditik berrikuntza teknologikoarekin konprometitutako komunitate aktiboa sendotu da
Eusko Jaurlaritzak startup teknologikoak sortzea bultzatuko du, 2,5 milioirekin ekintzailetzarako laguntzetan
Maiatzaren 16an irekiko ditu SPRIk Ekintzaile eta Barnekintzaile programak
Nuavisek balio erantsi handiko ikusmen artifizialeko soluzioak eskaintzen dizkio industriaren eta elikagaien sektoreari
Enpresak aktiboak monitorizatzeko sistemak garatzen ditu prozesu industrialak hobetzeko
Eusko Jaurlaritzak startup disruptiboen talentua eskuratzeko aukera emango die EAEko ETEei
SPRIk BIND SMEren 5. edizioa ireki du, EAEko ETEek startup berritzaileekin elkarlanean jardun eta haien lehiakortasuna hobetzeko. Deialdia uztailaren 4ra arte egongo da zabalik. Hautatutako ETEek teknologia disruptiboetara eta talentu berritzailera sarbidea izango dute, IA, jasangarritasuna edo Smart Factory bezalako arloetan soluzioak garatzeko.